ជាតិ
សង្គមជាតិ
នយោបាយជាតិ
អង្គភាពប្រឆាំងអំពើពុករលួយ មានអំពើពុករលួយ? 08, May 2015 , 7:00 pm
![](https://image.thmeythmey.com/pictures/2015/05/08/thumb2/om-yiengtieng.jpg)
×![]()
ប្រជាពលរដ្ឋរស់នៅគល់ស្ពានតាំងក្រសាំង ឃុំតាំងក្រសាំង ស្រុកសន្ទុក ខេត្តកំពង់ធំ បានសរសេរលិខិតមួយ ទៅកាន់អង្គភាពប្រឆាំងអំពើពុករលួយ(ACU) ទាមទារឲ្យACUធ្វើការស៊ើបអង្កេតករណីអំពើពុករលួយ ដែលកើតមាននៅក្នុងអង្គភាពផ្ទាល់។
តាមរយៈលិខិតជាលាយលក្ខណ៍អក្សរដែលបានទៅដល់ ACU តាំងតែពីថ្ងៃទី២៣ ខែមីនាឆ្នាំ២០១៥ ហើយ ACU ទើបតែធ្វើការផ្សព្វផ្សាយជាសាធារណៈកាលពីប៉ុន្មានថ្ងៃមុននេះ បានសរសេរថា «យើងខ្ញុំជាប្រជាពលរដ្ឋរស់នៅគល់ស្ពានតាំងក្រសាំង ស្រុកសន្ទុក ខេត្តកំពង់ធំ ដែលបានចូលផឹកកាហ្វេ និងបានស្តាប់លឺការជជែកគ្នា របស់មន្ត្រីរដ្ឋបាលព្រៃឈើ និងមន្ត្រីបរិស្ថាន ដែលបានអួតប្រាប់គ្នា មេគេ១ឆ្នាំឡើងដំណែង២ដង ជាពិសេសមន្ត្រីសង្កាត់រដ្ឋបាលព្រៃឈើ គឺដំបូងជាមន្ត្រី ដើមឆ្នាំតែងតាំងជានាយរង ចុងឆ្នាំតែងតាំងជានាយសង្កាត់ ឲ្យតែពូកែរកលុយទៅឲ្យថ្នាក់លើនោះ»។
លិខិតដដែលសរសេរបន្តទៀតថា «នេះពិតជាមានការឃុបឃិតគ្នា រវាងមន្ត្រីរដ្ឋបាលព្រៃឈើថ្នាក់កណ្តាល និងសាម៉ីខ្លួន ពីព្រោះយើងសង្កេតឃើញថា មន្ត្រីមានចំណេះដឹងជាច្រើន និងធ្វើការជិតចូលនិវត្តន៍ទៅហើយ ក៏មិនបានទទួលដំណែងនេះដែរ»។
«មន្ត្រីបរិស្ថាន និងមន្ត្រីរដ្ឋបាលព្រៃឈើ បាននិយាយនៅក្នុងហាងកាហ្វេមួយកន្លែងនៅឃុំតាំងក្រសាំង ដោយមន្ត្រីបរិស្ថានបាននិយាយថាចំពោះអង្គភាពបរិស្ថានអ្នកដែលធ្វើខុសត្រូវបណ្តេញចេញពីការងារ វាអយុត្តិធម៌ពេក ខណៈមន្ត្រីរដ្ឋបាលព្រៃឈើដែលបានប្រព្រឹត្តខុស យកលុយអ្នកដឹកឈើក្រញូងពេញបន្ទុក បែរជាឡើងបុណ្យសក្តិ។ មន្ត្រីរដ្ឋបាលព្រៃឈើបានតបទៅវិញថា មកពីខាងបរិស្ថានមិនចេះធ្វើការសូកប៉ាន់ទៅអង្គភាពប្រឆាំងអំពើពុករលួយ ពីព្រោះអង្គភាពប្រឆាំងអំពើពុករលួយ ក៏ពុករលួយដែរ។ ដូច្នេះរដ្ឋបាលព្រៃឈើគេពុំដែលខ្លាចទេ ព្រោះពេលអង្គភាពហៅទៅសាកសួរម្តងៗ គេចំណាយតែ៥ពាន់ដុល្លារ រួចត្រឡប់ទៅកន្លែងដើមវិញ ដូចជាករណីកាលពីប៉ុន្មានខែមុន គេហៅនាយផ្នែកទាំង៣ទៅសាកសួរនៅភ្នំពេញ រួចឲ្យត្រឡប់មកវិញ។ មន្ត្រីរដ្ឋបាលព្រៃឈើម្នាក់ បាននិយាយថា ចំពោះអង្គភាពព្រៃឈើចង់ផ្លាស់ប្តូរទីកន្លែងគឺទាក់ទងទៅ ចេង សាផេង ដែលជាមន្ត្រីជំនិតនឹងប្រតិភូ ហើយដាក់ស្រោមសំបុត្រតែ៥ពាន់ដុល្លារទៅបានហើយ។ ករណីដូច អ៊ិត ប៊ុនថេង ពីមុនជាមន្ត្រីរដ្ឋបាលព្រៃឈើថ្នាក់កណ្តាល បានផ្លាស់ប្តូរទៅកំពង់សោមបានតែ៦ខែ មកជួប ចេង សាផេង បានមកនៅសង្កាត់រដ្ឋបាលព្រៃឈើតាខ្មៅ»។ នេះបើតាមខ្លឹមសារនៃលិខិតដដែលនោះ។
លិខិតដដែលបន្តទៀតថា តាមមតិមហាជនដែលស្តាប់ឮមន្ត្រីទាំងនោះនិយាយគ្នា បានសន្និដ្ឋានថាACU ពិតជាមានអំពើពុករលួយ ដែលធ្វើឲ្យប៉ះពាល់ដល់កេរ្តិ៍ឈ្មោះរបស់អង្គភាព ដូចនេះសូមACU បើកការស៊ើបអង្កេត តើពិតដូចជាពួកគេជជែកគ្នាមែនឬអត់?
© រក្សាសិទ្ធិដោយ thmeythmey.com