ជាតិ
សង្គមជាតិ
អ្នកនាំពាក្យ៖ អាជ្ញាធរកម្ពុជានឹងបញ្ជូនពលករខ្មែរជាង ១០០នាក់មកពីឥណ្ឌូនេស៊ី និងម៉ាឡេស៊ីវិញ 09, May 2015 , 11:27 am
![](https://image.thmeythmey.com/pictures/2015/05/09/thumb2/952015112746koy_kuong_g.jpg)
×![]()
ភ្នំពេញ៖ អាជ្ញាធរក្រសួងការបរទេសកម្ពុជា នឹងបញ្ជូនពលការិនី និងនារីជំនួយការមេផ្ទះចំនួន ៣នាក់ មកពីប្រទេសម៉ាឡេស៊ី ថ្ងៃទី៩ ឧសភានេះ។ ដោយឡែក ពលករខ្មែររងគ្រោះលើទូកនេសាទ នៅក្នុងប្រទេសឥណ្ឌូនេស៊ីជាង ១០០នាក់ផ្សេងទៀត នឹងបញ្ជូនត្រូវមកវិញជាបន្តបន្ទាប់ នាពេលខាងមុខ។
អ្នកនាំពាក្យក្រសួងការបរទេស លោក កុយ គួង បានឲ្យដឹងថា ស្ថានទូតកម្ពុជាបានសហការ ជាមួយអាជ្ញាធរឥណ្ឌូនេស៊ី ក្នុងការជួយសង្គ្រោះពលករខ្មែរចំនួន ៥៩នាក់ ចេញពីទូកនេសាទ ខុសច្បាប់។ ដោយឡែក ចំពោះករណីព័ត៌មាន ដែលថាមានពលករខ្មែរចំនួន ៣៦នាក់ទៀត នៅលើកោះបេនជីណា (Benjina) ប្រទេសឥណ្ឌូនេស៊ីនោះ លោកបន្ថែមតាមរយៈសេចក្តីប្រកាស ព័ត៌មានថា មន្ត្រីស្ថានទូត និងមន្ត្រីអង្គការទេសន្តរប្រវេសន៍អន្តរជាតិ នឹងទៅជួបសម្ភាសន៍ផ្ទាល់ នៅថ្ងៃទី ១២ ខែ ឧសភា ឆ្នាំ២០១៥ ខាងមុខនេះ ដើម្បីបញ្ជូនពលករទាំងនោះមកមាតុប្រទេសវិញ។
បើតាមប្រភពដដែល នាពេលថ្មីៗនេះ ស្ថានទូតកម្ពុជាក៏បានសហការជាមួយអាជ្ញាធរឥណ្ឌូនេស៊ី ជួយសង្គ្រោះពលករខ្មែរចំនួន ៣២នាក់ផ្សេងទៀតដែរ។ «ស្ថានទូតបានសហការជាមួយអង្គការទេសន្តរប្រវេសន៍អន្តរជាតិ ដើម្បីបញ្ជូនពលករខ្មែរទាំង៣២នាក់នេះមកកម្ពុជាវិញ នាពេលខាងមុខ»។ នេះបើតាមការបញ្ជាក់របស់លោក កុយ គួង។
ចំពោះពលការិនី និងនារីជំនួយការមេផ្ទះចំនួន៣នាក់ក្នុងប្រទេសម៉ាឡេស៊ីវិញនោះ លោក កុង កួយ ឲ្យដឹងថា អាជ្ញាធរស្ថានទូតកម្ពុជាប្រចាំប្រទេសម៉ាឡេស៊ីបានចេញលិខិតធ្វើដំណើរ និងអន្តរាគមន៍ជួយទាមទារប្រាក់ខែពីថៅកែឲ្យពលការិនី និងនារីជំនួយការមេផ្ទះវិញ។
ពលការិនីទាំនេះ រួមមាន ទី១, ពលការិនី ឈ្មោះ គឹង ឆវី មានស្រុកកំណើតនៅស្រុកកោះសូទិន ខេត្តកំពង់ចាម។ ទី២, ពលការិនី ឈ្មោះ សុខ រ៉េន មានស្រុកកំណើតនៅស្រុកព្រៃឈរ ខេត្តកំពង់ចាម។ ទី៣, ជំនួយការមេផ្ទះ ឈ្មោះ ផល ផារ័ត្ន មានស្រុកកំណើតនៅស្រុកសង្គមថ្មី ខេត្តព្រះវិហារ ។ ពួកគេនឹងត្រឡប់មកកម្ពុជាវិញ នៅថ្ងៃទី៩ ខែ ឧសភានេះ ឆ្នាំ ២០១៥ នៅអាកាសយានដ្ឋានអន្តរជាតិភ្នំពេញ៕
© រក្សាសិទ្ធិដោយ thmeythmey.com