គ្រឿងស្រវឹងអាចបណ្តាលឲ្យកើតជំងឺផ្លូវចិត្តនិងក្លាយជាជនវិកលចរិត

ជាតិ

សង្គមជាតិ

គ្រឿងស្រវឹងអាចបណ្តាលឲ្យកើតជំងឺផ្លូវចិត្តនិងក្លាយជាជនវិកលចរិត

12, May 2015 , 8:40 am

រូបភាព

ដោយ: ម៉ៅ សុផា

ជារៀងរាល់ថ្ងៃ អ្នកជំងឺផ្លូវចិត្ត និងជនវិកលចរិត ប្រមាណជា ៤០០ ទៅ៥០០នាក់ ដែលបណ្តាលមកពីការពិសារគ្រឿងស្រវឹង ត្រូវបានបញ្ជូនមកព្យាបាលនៅមន្ទីរពេទ្យមិត្តភាពខ្មែរ-សូវៀត ។

ចុចទីនេះដើម្បីទទួលបានព័ត៌មានរហ័ស

គ្រឿងស្រវឹងគឺជាប្រភេទគ្រឿងញៀនមួយប្រភេទ ដែលអាចបង្កផលប៉ះពាល់ដ៏ធ្ងន់ធ្ងរ ដល់បញ្ហាសុខភាពផ្ទាល់ខ្លួន បង្កឲ្យមានអំពើហិង្សាក្នុងគ្រួសារ និងជាជំងឺសង្គមទាំងមូលផងដែរ ។ គ្រឿងស្រវឹងមិនត្រឹមតែប៉ះពាល់ដល់សុខភាពផ្លូវកាយប៉ុណ្ណោះទេ ថែមទាំងអាចបណ្តាលឲ្យមានជំងឺផ្លូវចិត្តដល់ធ្ងន់ធ្ងរ ហើយរហូតដល់ប្រជាពលរដ្ឋយើងមួយចំនួនក្លាយជាជនវិកលចរិត ពិបាកព្យាបាល ។ លោកសាស្ត្រាចារ្យវេជ្ជបណ្ឌិត យឹម សុបុត្រា ប្រធានផ្នែកសុភាពផ្លូវចិត្ត និងការបំពានគ្រឿងញៀន នៃមន្ទីរពេទ្យមិត្តភាពខ្មែរ-សូវៀតបានមានប្រសាសន៍ថា ការពិសាគ្រឿងស្រវឹង ជាហេតុបណ្តាលឲ្យប៉ះពាល់ទាំងសុភាពផ្លូវកាយ និងសុខភាពផ្លូវចិត្ត អ្នកខ្លះធ្លាប់តែមានអត្តចរិតស្លូតបូត ក៏ក្លាយទៅជាកាចសាហាវ អាចប្រព្រឹត្តអំពើឃោរឃៅដោយឥតខ្លាចញញើត ។

លោកវេជ្ជបណ្ឌិតបញ្ជាក់ដូច្នេះថា៖ «ការពិត អត្តចរិតខ្មែរយើង គឺទន់ភ្លន់ សុភាពរាបសារ តែដោយសារតែ ការទទួលទានគ្រឿងស្រវឹង ធ្វើប្រជាពលរដ្ឋខ្មែរយើងមួយចំនួន ផ្លាស់ប្តូរទៅជាកាចសាហាវ ហ៊ានធ្វើអំពើឃោរឃៅផ្សេងៗ ប្រើប្រាស់អំពើហិង្សាក្នុងគ្រួសារ បង្កបញ្ហាដល់សង្គម ដូចជាការលួចប្លន់ ចាប់រំលោភ និងរហូតធ្វើឲ្យមានជំងីផ្លូវចិត្ត ក្លាយជាជនវិកលចរិត» ។

លោកពូ ម៉ែន ត្រាន់ អាយុ ៤០ឆ្នាំ ជាប្រជាពលរដ្ឋខេត្តស្វាយរៀង មានប្រសាសន៍ថា រូបគាត់បានពិសារស្រាតាំងពីអាយុ១៨ ឆ្នាំ មកម្ល៉េះ ឥឡូវធ្វើឲ្យគាត់មានបញ្ហាផ្លូវចិត្ត រវើរវាយច្រើន ភ្លេចក៏ច្រើន រហូតដល់គាត់សំរានមិនសូវលក់ បណ្តាលឲ្យសុភាពធ្លាក់ចុះ ធ្វើការអ្វីមិនបានយូរឆាប់អស់កម្លាំង ។

បើតាមតួលេខនៃមន្ទីរពេទ្យមិត្តភាពខ្មែរ-សូវៀត អ្នកជំងឺផ្លូវចិត្ត និងវិកលចរិតជាង៤០០ ទៅ ៥០០ នាក់ ដែលបណ្តាលមកពីការទទួលទានគ្រឿងស្រវឹង ត្រូវបានបញ្ជូនមកព្យាបាលជារៀងរាល់ថ្ងៃ។