ជាតិ
សង្គមជាតិ
តុលាការកំពុងដំណើរការកាត់ក្តីរឿងបរទេស៣នាក់ថតស្រាតនៅប្រាសាទតាព្រហ្ម 12, May 2015 , 10:47 am
![រូបភាព៖ អាជ្ញាធរជាតិអប្សរា](https://image.thmeythmey.com/pictures/2015/05/12/thumb2/10981992_391062991100635_2480825738187514541_n.jpg)
រូបភាព៖ អាជ្ញាធរជាតិអប្សរា
×![]()
សៀមរាប៖ ជនបរទេស៣នាក់ ត្រូវបានឃាត់ខ្លួនភ្លាមៗ ក្រោយពេលពួកគេធ្វើសកម្មភាពថតរូបអាក្រាតនៅបរិវេណប្រាសាទតាព្រហ្ម កាលពីរសៀលថ្ងៃ១០ ឧសភា។ នៅព្រឹកថ្ងៃអង្គារនេះ តុលាការកំពុងដំណើរការសាកសួរ ជនទាំង៣នាក់នោះ ពីបំណងពិតប្រាកដនៃការថតរូបអាក្រាតខាងលើ។
ចៅក្រមស៊ើបសួរ លោក ហុក ពៅ កំពុងដំណើរការសាកសួរលើសំណុំរឿងភ្ញៀវទេសចរបរទេស៣នាក់ ដែលបានថតរូបអាក្រាតនៅបរិវេណប្រាសាទតាព្រហ្ម។ ជនបរទេសទាំង៣នាក់នោះ ត្រូវគេស្គាល់ថា មានជនជាតិអាហ្សង់ទីន អ៊ីតាលី និងហូឡង់ ដែលបានធ្វើសកម្មភាពថតស្រាតនៅផ្នែកខាងក្រោយចំនួន២សន្លឹក កាលពីរសៀលម៉ោង៣កន្លះ ថ្ងៃទី១០ ឧសភា នៅប្រាសាទតាព្រហ្ម។
យោងតាមទំព័រហ្វេសប៊ុករបស់អាជ្ញាធរអប្សរា បានបញ្ជាក់ថា ការឈានដល់ការឃាត់ខ្លួនជនបរទេសខាងលើ ធ្វើឡើងដោយមានកិច្ចសហការរវាងបុគ្គលិកអាជ្ញាធរអប្សរា និងនគរបាលការពារបេតិកភណ្ឌ។ ក្រោយធ្វើការឆែកឆេរ ឃើញថាជនបរទេសទាំងនោះ បានប្រើប្រាស់ទូរសព្ទដៃ ថតរូបអាសអាភាសចំនួនពីរសន្លឹកនៅចំណុចរានហាលខាងកើតនៃប្រាសាទតាព្រហ្ម និងមួយសន្លឹកទៀតថតនៅមុំបរិវេណអង្គរធំ ឫបាយ័ន។
បើតាមផ្លូវច្បាប់ ភ្ញៀវបរទេស៣នាក់ អាចនឹងប្រឈមនឹងការបណ្តេញចេញពីប្រទេសកម្ពុជារយៈពេល៤ឆ្នាំដូចគ្នា បន្ទាប់ពីករណីទាំងនេះ ធ្លាប់កើតច្រើនដងមកហើយនៅតំបន់ប្រាសាទខ្មែរ។ កាលពីថ្ងៃទី២៩ ខែមករា ជនជាតិបារាំង៣នាក់ បានថតរូបអាក្រាតកាយនៅប្រាសាទបន្ទាយក្តី ហើយត្រូវតុលាការកាត់ទោសមិនឲ្យចូលប្រទេសកម្ពុជារយៈពេល៤ឆ្នាំ។ នៅថ្ងៃទី៦ កុម្ភៈ ស្ត្រីបងប្អូនជនជាតិអាមេរិក២ ត្រូវបានកាត់ទោសដូចគ្នានឹងករណីជនជាតិបារាំង ក្រោយពេលស្ត្រីទាំងនោះ បានលួចថតរូបអាក្រាតនៅក្នុងបរិវេណប្រាសាទព្រះខ័ន។
គួរបញ្ជាក់ថា ភ្ញៀវបរទេសដែលលួចធ្វើសកម្មភាពថតអាក្រាតនៅប្រាសាទតាព្រហ្មកាលពីថ្ងៃអាទិត្យនោះ មានទីមួយឈ្មោះ LUCIANO GASTÓN MUŇOZ ភេទ ប្រុស អាយុ៣០ឆ្នាំ ជនជាតិអាហ្សង់ទីន ជាអ្នកអាក្រាត ទីពីរ ឈ្មោះ BRUNO MARGRINI ភេទប្រុស អាយុ៣០ឆ្នាំ ជនជាតិអ៊ីតាលី ជាអ្នកអាក្រាត និងទីបី ឈ្មោះ KIKI STAMOU ភេទស្រី អាយុ១៩ឆ្នាំ ជនជាតិហូឡង់ ជាអ្នកកាន់ទូរស័ព្ទដៃថត៕
© រក្សាសិទ្ធិដោយ thmeythmey.com