ជាតិ
សង្គមជាតិ
ព្រះមហាក្សត្រលើកលែងទោសលោក មឿង សុន 12, May 2015 , 3:39 pm
![](https://image.thmeythmey.com/pictures/2015/05/12/thumb2/meung_sonn.jpg)
×![]()
ព្រះមហាក្សត្រខ្មែរ បានព្រះរាជទានទោសដល់ លោក មឿង សុន ប្រធានក្រុមប្រឹក្សាភិបាល មូលនិធិទ្រទ្រង់អរិយធម៌ខ្មែរ។ នេះបើយោងតាមកាសែតភ្នំពេញប៉ុស្តិ៍ ដែលចុះផ្សាយផ្អែកតាមព្រះរាជក្រឹត្យចុះថ្ងៃទី ៥ ខែ ឧសភា ឆ្នាំ ២០១៥ ។
បើតាមភ្នំពេញប៉ុស្តិ៍ដដែល ព្រះរាជក្រឹត្យរបស់ព្រះមហាក្សត្រ ព្រះបាទ សម្តេច នរោត្តម សីហមុនី បានសរសេរយ៉ាងនេះថា « ត្រូវបានលើកលែងទោសឲ្យទណ្ឌិតឈ្មោះ មឿង សុន ភេទប្រុស អាយុ ៦២ឆ្នាំ ដែលត្រូវបានតុលាការសម្រេចផ្តន្ទាទោសដាក់ពន្ធនាគារ តាមអំណាចសាលដីកាស្ថាពរលេខ ៨១ ចុះថ្ងៃទី ១១ មេសាឆ្នាំ២០១២ របស់តុលាការកំពូល និងលោកនាយករដ្ឋមន្ត្រី ហ៊ុន សែន ត្រូវទទួលបន្ទុកអនុវត្តឲ្យបានសម្រេចតាមព្រះរាជក្រឹត្យនេះ » ។
លោក មឿង សុន បានគេចខ្លួនទៅរស់នៅក្រៅប្រទេសក្រោយពីតុលការដាក់ទោសឲ្យជាប់ ពន្ធនាគារ ២ឆ្នាំនិងពិន័យប្រាក់ ៤ លានរៀលតាំងពីខែ កក្កដា ឆ្នាំ២០០៩ ពីបទរិះគន់អាជ្ញាធរអប្សរា បើកឲ្យក្រុមហ៊ុនឯកជន ស៊ូជីន ដាក់អំពូលភ្លើងលម្អប្រាសាទអង្គរវត្តថាជាការធ្វើឲ្យប៉ះពាល់ដល់ ថ្មប្រាសាទ។ នៅឆ្នាំ២០០៩ ដដែល លោក មឿង សុន ត្រូវតុលាការក្រុងភ្នំពេញកាត់ទោសកំបាំងមុខដាក់ពន្ធនាគាររយៈពេល ២ ឆ្នាំ និងពិន័យជាប្រាក់ ១៥ លានរៀល ពីបទផ្សាយព័ត៌មានមិនពិត តាមពាក្យបណ្តឹងរបស់រដ្ឋាភិបាល។ នៅខែឧសភា ឆ្នាំ២០១១ សាលាឧទ្ធរណ៍ បានប្រកាសតម្កល់សេចក្តីសម្រេចផ្តន្ទាទោសកំបាំងមុខដោយរក្សា ការផ្តន្ទាទោសឲ្យជាប់ពន្ធនាគារ២ឆ្នាំដដែល ក៏ប៉ុន្តែបានសម្រេចបន្ធូរបន្ថយលើការពិន័យបង់ប្រាក់ពី១៥លានរៀល មកនៅត្រឹម៤លានរៀល និងកែប្រែបទចោទប្រកាន់ ពីបទផ្សាយព័ត៌មានមិនពិត មកជាបទញុះញង់ស្របតាមច្បាប់ក្រមព្រហ្មទណ្ឌថ្មី ៕
© រក្សាសិទ្ធិដោយ thmeythmey.com