ជាតិ
សង្គមជាតិ
បាក់ឌុប ២០១៥៖ មន្ត្រីអប់រំពុករលួយនឹងប្រឈមមុខជាប់ពន្ធនាគារ
13, May 2015 , 8:19 am
×![]()
ភ្នំពេញ៖ក្នុងសម័យប្រឡងបាក់ឌុប ដែលនឹងប្រព្រឹត្តទៅនៅថ្ងៃទី២៤ ខែសីហា ឆ្នាំ២០១៥ ខាងមុខ ក្រសួងអប់រំមិនត្រឹមតែប្រកាន់យកពាក្យមួយឃ្លាថា «អ្នកចេះគឺជាប់»ដូចឆ្នាំមុននោះទេ ក្រសួងនឹងវិធានការតឹងរឹង ចំពោះមន្ត្រីអប់រំដែលប្រព្រឹត្តអំពើពុករលួយអំឡុងពេលប្រឡងដែរ។ មន្ត្រីទាំងនោះ អាចប្រឈមមុខនឹងជាប់ពន្ធនាគារហើយថា បេក្ខជនដែលលួចចម្លងនឹងត្រូវទម្លាក់ដោយស្វ័យប្រវត្តិតែម្តង។
ក្រសួងអប់រំនឹងមិនបន្ធូរដៃចាត់វិធានការរឹងបន្តឹងការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឡើយ ពោលគឺក្រសួងនឹងអនុវត្តតាមវិធានការដូចឆ្នាំ២០១៤ ដដែល។
អ្នកនាំពាក្យក្រសួងអប់រំលោក រស់ សាលីន បានថ្លែងថា ក្រសួងអប់រំ និងអង្គភាពប្រឆាំងអំពើ ពុករលួយនៅតែសហការគ្នា ដើម្បីរៀបចំវិធានការប្រឡងដូចឆ្នាំមុន។ ប៉ុន្តែលោកថា វិធាន ការដែល ខុសពីឆ្នាំមុននោះ គឺវិធានការចំពោះមន្ត្រីអប់រំដែលបានប្រព្រឹត្តអំពើពុករលួយ អំឡុង ពេលប្រឡង។
«យើងនឹងមិនលែងដល់មន្ត្រីទាំងឡាយណា ដែលជាអ្នកប្រព្រឹត្តអំពើពុករលួយជាដាច់ខាត សម័យប្រឡងឆ្នាំនេះ ដូចអ្វីដែលឯកឧត្តមប្រធានអង្គភាពប្រឆាំងអំពើពុករលួយបានបញ្ជាក់ កន្លងមក មន្ត្រីអប់រំពុករលួយនឹងត្រូវចាប់បញ្ជូនឡើងតុលាការ ហើយត្រូវប្រឈមមុខនឹងជាប់ ក្នុងពន្ធនាគារ តាមច្បាប់ប្រឆាំងនឹងអំពើពុករលួយ»។ នេះជាប្រសាសន៍បញ្ជាក់របស់លោក រស់ សាលីន។
នៅឆ្នាំ២០១៤កន្លងមក អនុរក្ស និងប្រធានមណ្ឌលនៅតាមមណ្ឌលប្រឡងក្នុង ខេត្ត ស្វាយរៀង កណ្តាល ព្រៃវែង និងខេត្តកំពង់ចាមជាង ២០នាក់ ត្រូវបានឃាត់ខ្លួនដោយអង្គភាព ប្រឆាំងអំពើពុករលួយ។ កាលនោះ មន្ត្រីទាំងអស់ គ្រាន់តែទទួលការណែនាំ និងការព្រមាន ជាលាយលក្ខណ៍អក្សរតែប៉ុណ្ណោះ។
កាលពីចុង ខែមេសាកន្លងមក ប្រធានអង្គភាពប្រឆាំងអំពើពុករលួយ(ACU) លោក ឱម យ៉ិនទៀង បាននិយាយថា ការប្រឡងបាក់ឌុបឆ្នាំនេះ នឹងតឹងជាងឆ្នាំមុន។ ហើយថា តុលាការ អាចនឹងកាត់ទោសដាក់ពន្ធនាគារផង។ លោកសង្ងត់ធ្ងន់ថា៖«បើចាប់បាន យកទោសទាប មិនមែនក្រោមទាប ដូចឆ្នាំមុន ដែលគេកំណត់ឲ្យដាក់៦ខែ ទៅ២ឆ្នាំទេ។ បើចូលគុកគឺទាប ៦ខែ ហើយឆ្នាំក្រោយទៀតគឺលើសពីទាបទៀត។ បើ៦ខែទៅ២ឆ្នាំ អាចដាក់ទោសឡើងពី ៩ខែ ទៅ១ឆ្នាំ គឺការធ្វើ Step by step»។
គួរបញ្ជាក់ថា នាពិធីចែកសញ្ញាបត្រដល់និស្សិត ក្នុងវិទ្យាស្ថានជាតអប់រំ នៅថ្ងៃទី១១ ម្សិលមិញនេះ ប្រមុខរដ្ឋាភិបាល លោក ហ៊ុន សែន ក៏បានបញ្ជាក់ដែរថា ការប្រឡងបាក់ឌុបឆ្នាំ នេះ និងឆ្នាំតទៅមុខ ក្រសួងអប់រំត្រូវតែពង្រឹងជាប់ជានិច្ច ដើម្បីពង្រឹងគុណភាពក្នុងវិស័យអប់រំ គ្រប់កម្រិតសិក្សារបស់កម្ពុជា។
គួររម្លឹកថា ក្នុងសម័យប្រឡងដែលមានការរឹតបន្តឹងកាលពីឆ្នាំ២០១៤ACU បានពង្រាយ អ្នកសង្គេតការណ៍ស្ម័គ្រចិត្តជាង ៣ពាន់នាក់នៅក្នុងមណ្ឌលប្រឡងទូទាំងប្រទេស។ជាលទ្ធផលការប្រឡងលើកទី១បានបង្ហាញថា ចំណោមបេក្ខជនសរុបចំនួន ជាង៩ម៉ឺននាក់ មានតែបេក្ខជនជាង ២០ភាគរយប៉ុណ្ណោះ ដែលជាប់ការប្រឡង ហើយការប្រឡងនោះ ទៀតសោតមានបេក្ខជនជាប់និទ្ទេសA មានចំនួន១១នាក់។ ចំពោះលទ្ធផលប្រឡង លើកទី២ នៅខែតុលាវិញ បេក្ខជនដែលជាប់ចំនួនជាង ១០ភាគរយ ក្នុងចំណោមបេក្ខជនជាង ៦ម៉ឺននាក់៕
© រក្សាសិទ្ធិដោយ thmeythmey.com
