ជាតិ
សង្គមជាតិ
អាជ្ញាធរអប្សរាប្រតិកម្មនឹងវិទ្យុសំបុកឃ្មុំដែលថាខ្លួនមិនបានកាត់ដីឲ្យពលរដ្ឋតាមស.ជ.ណ 01, Jun 2015 , 10:08 am
![រូបភាព៖ អាជ្ញាធរអប្សរា](https://image.thmeythmey.com/pictures/2015/06/01/thumb2/1620151010184.jpg)
រូបភាព៖ អាជ្ញាធរអប្សរា
×![]()
សៀមរាប៖ តាមរយៈសេចក្តីជូនដំណឹងរបស់ខ្លួន អាជ្ញាធរអប្សរាបានបញ្ជាក់ថា ខ្លួនបានរៀបចំឯកសារ កាត់ដីឲ្យប្រជាពលរដ្ឋតាមអនុក្រឹត្យរបស់រដ្ឋាភិបាលកម្ពុជា ដែលបានសម្រេចកាលពីពាក់កណ្តាលខែមេសាហើយ។ ការបញ្ជាក់នេះ ធ្វើឡើងតបតាមការផ្សាយរបស់វិទ្យុសំបុកឃ្មុំ ដោយនិយាយថា អាជ្ញាធរអប្សរាមិនបានគោរពតាមសេចក្តីជូនដំណឹង (ស.ជ.ណ) ឫអនុក្រឹត្យរដ្ឋាភិបាលទេ ជារួមស្ថាប័ននេះមិនបានកាត់ដីឲ្យពលរដ្ឋក្នុងតំបន់ដែលខ្លួនកំពុងកាត់កាប់នោះទេ។
យោងតាមសេចក្តីបំភ្លឺដែលចេញផ្សាយកាលពីថ្ងៃទី៣១ ឧសភា អាជ្ញាធរអប្សរាបានបញ្ជាក់ថា ខ្លួននិងសាលាខេត្តសៀមរាប បាននិងកំពុងរៀបចំឯកសារកាត់ក្បាលដីជូនពលរដ្ឋ តាមអនុក្រឹត្យលេខ ៥១ និងលេខ ៥២ ។ អនុក្រឹត្យលេខ ៥១ ដែលសម្រេចកាត់ដីទំហំ ១១៥,៤១ ហិកតា និង ១១១,៤៩ ហិកតា ចេញពីបុរីសណ្ឋាគារអង្គរសៀមរាប (បុរីវប្បធម៌ និងទេសចរណ៍អង្គរ) ដើម្បីប្រទានកម្មសិទ្ធិជូនប្រជាពលរដ្ឋ ដែលកាន់កាប់ ប្រើប្រាស់ និងដាំដុះជាក់ស្តែងនៅក្រុងសៀមរាប ខេត្តសៀមរាប ចុះថ្ងៃទី១៧ មេសា ឆ្នាំ២០១៥ ។
ក្នុងសេចក្តីបំភ្លឺរបស់ខ្លួន អាជ្ញាធរអប្សរាបានរៀបរាប់ចាប់ពីការធ្វើការយ៉ាងជិតសិ្នទ្ធជាមួយសាលាខេត្ត ក្នុងការវាស់វែងក្បាលដីតាមអនុក្រឹត្យទាំង២ខាងលើ ការបើកកិច្ចប្រជុំនឹងពលរដ្ឋដែលអះអាងថា ដីពួកគេស្ថិតនៅក្នុងផែនទីឧបសម្ព័ន្ធនៃអនុក្រឹត្យដែលត្រូវកាត់ចេញនោះដែរ តែធាតុពិតជាក់ស្តែង ពួកគេរស់នៅតំបន់ភូមិសាស្ត្រក្រៅតំបន់ខាងលើជាដើម។ អាជ្ញាធរអប្សរាបបានបញ្ជាក់ថា រហូតមកដល់ពេលនេះ ឯកសារក្បាលដីដែលត្រូវកាត់ចេញពិតប្រាកដ ភាគីសាលាខេត្តកំពុងរៀបចំ ហើយគ្រោងនឹងបញ្ចប់ក្នុងពេលឆាប់ៗខាងមុខនេះ។
អាជ្ញាធរអប្សរា បានហៅការផ្សព្វផ្សាយព័ត៌មានរបស់វិទ្យុសំបុកឃ្មុំ ដែលផ្សាយកាលពីថ្ងៃទី២៨ ឧសភា ឆ្នាំ២០១៥ ថាមានបំណងចោទប្រកាន់ខ្លួន ដែលផ្ទុយពីការពិតទាំងស្រុង ក្នុងន័យបម្រើផលប្រយោងជន៍របស់ក្រុម ដែលអាចបង្កការថ្នាំងថ្នាក់ពីប្រជាពលរដ្ឋ មកលើស្ថាប័នអាជ្ញាធរអប្សរា ក៏ដូចជាប្រមុខរដ្ឋាភិបាលកម្ពុជា។ ក្រៅពីនេះ ការផ្សព្វផ្សាយនេះ ក៏ជាគោលបំណងអាក្រក់របស់ឈ្មួញដី និងអ្នករំលោភដីផងដែរ។
គួរបញ្ជាក់ថា រដ្ឋាភិបាលកាលពីថ្ងៃទី ១៧ មេសា ឆ្នាំ២០១៥ បានសម្រេចកាត់ដីទំហំ ២២៦,៩ហិកតា តាមរយៈអនុក្រឹត្យ២ដាច់ដោយឡែក គឺទី១ កាត់ដីទំហំ ១១៥,៤១ ហិកតា ឲ្យពលរដ្ឋក្នុងភូមិដូនប៉ា និងភូមិចុងកៅស៊ូ ទី២ កាត់ដីទំហំ ១១១,៤៩ ហិកតាឲ្យពលរដ្ឋរស់នៅភូមិព្រៃគុយ និងភូមិគោកចាន់ សង្កាត់អំពិល ក្រុងសៀមរាប ដែលដីទាំងនោះ ស្ថិតនៅតំបន់បុរីសណ្ឋាគារអង្គរ ដែលគ្រប់គ្រងដោយអាជ្ញាធរអប្សរា ហើយដែលកន្លងមកតែងមានជម្លោះគ្នា ទាក់ទងនឹងការកាន់កាប់នេះ។ ផ្ទៃដីបុរីសណ្ឋាគារអង្គរមានទំហំ ១០០៧ហិកតា (យោងតាមអនុក្រឹត្យ ឆ្នាំ១៩៩៥ និងឆ្នាំ១៩៩៩) ដូច្នេះក្រោយពេលកាត់ដីឲ្យពលរដ្ឋ ដីនៅក្នុងបុរីនេះ នៅសល់ត្រឹម ៧៨០,១០ហិកតាតែប៉ុណ្ណោះ៕
© រក្សាសិទ្ធិដោយ thmeythmey.com