ជាតិ
សង្គមជាតិ
តំណាងកុមារស្នើរដ្ឋាភិបាលលុបឲ្យបាននូវការកេងប្រវ័ញ្ចកម្លាំងពលកម្មកុមារ 01, Jun 2015 , 3:44 pm
![](https://image.thmeythmey.com/pictures/2015/06/01/thumb2/038___20150529004___3h8a5912.jpg)
×![]()
ភ្នំពេញ ៖ តំណាងកុមារជាង ២ពាន់នាក់មកពីគ្រឹះស្ថាន សិក្សារដ្ឋ និងឯកជនព្រមទាំងកុមារកំព្រាតាមមណ្ឌលនានា បានស្នើរដ្ឋាភិបាលឲ្យជួយដោះស្រាយបញ្ហាប្រឈមរបស់កុមារមួយ ចំនួនក្នុងនោះរួមទាំង ការលុបបំបាត់ការ កេងប្រវ័ញ្ចកម្លាំងពលកម្មធ្ងន់ធ្ងរលើកុមារដែរ។សំណើរនេះត្រូវបានប្រព្រឹត្តទៅក្នុងឱកាសខួបលើកទី៦៦ទិវាកុមារអន្តរជាតិ នៅថ្ងៃទី១ ខែមិថុនា ឆ្នាំ២០១៥នាមជ្ឈមណ្ឌលកោះពេជ្រ។
បញ្ហានានាដែលតំណាងកុមារទូទាំងប្រទេសកម្ពុជាបានស្នើសុំឲ្យជួយដោះស្រាយនោះមានដូចជាទីមួយ, ការពង្រឹង និងពង្រីកនូវកម្មវិធីផ្តល់អាហាររូបត្ថម្ភដល់កុមារព្រមទាំង ចាត់វិធានការចុះត្រួតពិនិត្យគុណភាព និងសុវត្ថិភាពចំណីអាហារឲ្យបានតឹងរ៉ឹងនៅតាមសាលារៀន និងសហគមន៍ឲ្យបានជាប្រចាំ។
ទីពីរ, ការផ្តល់ទឹកស្អាត តាមរយៈការបង្កើនការជីកអណ្តូង និងផ្តល់ថ្នាំសម្លាប់មេរោគក្នុងទឹកព្រមទាំងផ្តល់ធុងចម្រោះទឹក ស្អាតដល់ប្រជាពលរដ្ឋ នៅតាមសហគមន៍និងសាលារៀនឲ្យបានគ្រប់គ្រាន់។ ទីបី, ជួយផ្សព្វផ្សាយបន្ថែមទៀតអំពីសារសំខាន់និងបញ្ហាកង្វះអាហារូបត្ថម្ភឲ្យបានទូលំទំលាយជាមុន ព្រមទាំងផ្តល់ថ្នាំវីតាមីន និងការចាក់ថ្នាំបង្ការជាដើម។
ទីបី, កុមារស្នើឲ្យក្រសួងសុខាភិបាល រៀបចំគោលនយោបាយត្រួតពិនិត្យសុខភាពកុមារ តាមសាលារៀនឲ្យបានពី ៣ ទៅ៤ដងក្នុងមួយឆ្នាំ ជាពិសេសកុមារតាមតំបន់ដាច់ ស្រយាល។
ទីបួន,ពង្រឹងការអនុវត្តច្បាប់ ដើម្បីកាត់បន្ថយការកេងប្រវ័ញ្ចកម្លាំងពលកម្មកុមារនិងឈាន ទៅលុបបំបាត់ទម្រង់ធ្ងន់ធ្ងរនៃពលកម្មកុមារ និងរឹតបន្តឹងលើការផ្តល់ការងារដល់កុមារ ដែលស្ថិតក្នុងវ័យសិក្សា ដោយធានាថា ពួកគេទទួលបាននូវលក្ខខណ្ឌការងារ និងបរិយាកាសការងារសមស្របមួយ។
ទីប្រាំ,ផ្សព្វផ្សាយអំពីផលប៉ះពាល់កុមារបម្រើការងារតាមផ្ទះ និងបង្កើតច្បាប់ស្តីពីការបម្រើ ការងារតាមផ្ទះ ដើម្បីជាផលប្រយោជន៍ផ្លូវច្បាប់នៅពេលកុមារ ទទួលរងនូវការបំពានកម្លាំង ពលកម្ម។ និងទីប្រាំមួយ,ក្រសួងការងារ និងបណ្តុះបណ្តាលវិជ្ជាជីវៈ ត្រូវពង្រឹង និងពង្រីកការលើកកម្ពស់វិធានការការពារនិងកម្មវិធីអន្តរាគមន៍ និងចុះធ្វើអធិការកិច្ច តាមសិប្បកម្មតាមផ្ទះ រោងចក្រកសិដ្ឋាន និងសហគ្រាស ដែលមានការងារគ្រោះថ្នាក់ច្រើន ដើម្បីការពារកុមារព្រមទាំង លុបបំបាត់ការក្លែងបន្លំនូវលិខិត បញ្ជាក់កំណើត ដើម្បីឲ្យគ្រប់អាយុចូលធ្វើការ។
ជាការឆ្លើយតប ឧបនាយករដ្ឋមន្ត្រី និងជារដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច លោកស្រី ម៉ែន សំអនបានយល់ព្រមទទួសំណើរ ហើយលោកស្រីថា សំណើរនេះនឹងត្រូវយកទៅធ្វើការសិក្សា និងពិភាក្សាជាមួយស្ថាប័ន ពាក់ព័ន្ធបន្ថែមទៀត។ «ខ្ញុំនឹងលើកយកបញ្ហាដែលក្មួយ បានសំណូមពរទៅធ្វើការពិចារណានិងដាក់ជូនស្ថាប័នណា ដែលធ្វើការទាក់ទងនឹងបញ្ហានោះហើយនឹងដាក់ឲ្យស្ថានប័នទាំង អស់នោះជួយធ្វើការដោះស្រាយឲ្យបានឆាប់និងឲ្យបានលឿន»។ នេះជាការបញ្ជាក់របស់ លោកស្រី ម៉ែន សំអន ដែលតំណាងឲ្យប្រមុខរដ្ឋាភិបាលកម្ពុជា៕
© រក្សាសិទ្ធិដោយ thmeythmey.com