ពលរដ្ឋនៅឃុំជ្រោយស្តៅមិនទាន់ដឹងពីតារាងតម្លៃសេវាសាធារណៈ

ជាតិ

សង្គមជាតិ

ពលរដ្ឋនៅឃុំជ្រោយស្តៅមិនទាន់ដឹងពីតារាងតម្លៃសេវាសាធារណៈ

02, Jun 2015 , 8:20 pm

រូបភាព

ដោយ: ថ្មីៗ

បាត់ដំបង៖ តារាងតម្លៃសេវាសាធារណៈ ត្រូវបានបិទនៅគ្រប់សាលាឃុំសង្កាត់នានានៅទូទាំងប្រទេសព្រោះវាជាគោលនយោបាយរបស់រដ្ឋាភិបាល និងជាចំណែកមួយនៃកាត់បន្ថយអំពើពុករលួយ។តែទោះជាយ៉ាងនេះក្ដីក៏នៅមានប្រជាពលរដ្ឋមួយចំនួនមិនទាន់បានដឹងពីអត្ថប្រយោជន៍នៃតារាងតម្លៃសេវាសាធារណៈនេះដដែល។តើមកពីមួលហេតុអ្វី?

ចុចទីនេះដើម្បីទទួលបានព័ត៌មានរហ័ស

លោក ពូ ចាន់(ឈ្មោះដែលអ្នកសរសេរដាក់អោយ) រស់នៅក្នុងឃុំជ្រោយស្ដៅបាននិយាយថា គាត់មិនដែលបានដឹងថាមានតារាងតម្លៃសេវាសាធារណៈអ្វីឡើយព្រោះគាត់មិនដែលបានទៅសាលាឃុំសោះជាច្រើនឆ្នាំមកហើយ។ «បើមានតារាងតម្លៃមែនល្អហើយព្រោះមិនបាច់ចំណាយលុយច្រើនហើយនៅចាំអង្វរមេឃុំអោយធ្វើទៀត។ ពីមុន ទៅធ្វើឯកសារម្ដងៗនៅចាំយូរ ហើយអស់លុយច្រើនណាស់»។ នេះជាការរៀបរាប់របស់ពូ ចាន់។

មីងសំ វិញដែលរស់នៅក្នុងឃុំជ្រោយស្តៅដូចគ្នា ក៏បានអះអាងថា មិនដែលមានអ្នកណាបានផ្ដល់ដំណឹងដល់អ្នកភូមិ អំពីតារាងតម្លៃសេវាសាធារណៈនោះទេ។មីងសំ បានបន្តទៀតថាមេឃុំនៅភូមិជ្រោយស្ដៅនេះមិនងាយជួបស្រួលៗទេព្រោះគាត់មានការងារច្រើន។

លោក ង៉ែត នឹម មានអាយុ ៧១ឆ្នាំដែលជាមេឃុំជ្រោយស្ដៅបានអោយដឹងថា លោកមិនបានផ្សព្វផ្សាយអំពីតារាងតម្លៃសេវាសាធារណៈទៅប្រជាជននោះទេ ដោយលោកសំអាងថា តារាតម្លៃនេះ ត្រូវបានបិទនៅសាលាឃុំហើយ ដែលពលរដ្ឋអាចមើលឃើញ។ «ខ្ញុំគិតថាមកពីពលរដ្ឋខ្លួនឯងមិនទៅសាលាឃុំឬទៅហើយមិនមើលហើយចាំតែបន្ទោស។ អ្នកធ្វើគឺចាំតែខុស»។ នេះជាប្រតិកម្មលោកមេឃុំជ្រោយស្តៅដែលមានវ័យ៧១ឆ្នាំ៕