ជាតិ
សង្គមជាតិ
ICC-Angkor នឹងនិយាយពីក្រមសីលធម៌ដែលអ្នកទេសចរគួរធ្វើក្នុងតំបន់ប្រាសាទខ្មែរ 04, Jun 2015 , 4:07 pm
![រូបភាព៖ Google](https://image.thmeythmey.com/pictures/2015/06/04/thumb2/11304467_10206013157042243_543289234_n.jpg)
រូបភាព៖ Google
×![]()
សៀមរាប៖ មន្ត្រីនៃអាជ្ញាធរជាតិអប្សរាបានឲ្យដឹងថា ក្រមសីលធម៌ក្នុងប្រាសាទ ដែលអប្សរាបានរៀបចំនាពេលកន្លងមកនោះ ក៏នឹងត្រូវលើកយកមកពិភាក្សាក្នុងកិច្ចប្រជុំគណៈកម្មាធិការ អន្តរជាតិ ដើម្បីសម្របសម្រួលកិច្ចគាំពារ និងអភិវឌ្ឍរមណីយដ្ឋានប្រវត្តិសាស្ត្រអង្គរ ហៅកាត់ថា ICC-Angkor លើកទី២៤នេះដែរ។ ក្រមនេះ នឹងត្រូវយកមកប្រើប្រាស់ក្នុងប្រាសាទខ្មែរ ប្រសិនណាវាត្រូវបានអនុម័តនោះអង្គប្រជុំនៃគណៈកម្មាធិការ ICC-Angkor។
ឆ្លើយតបនឹងសំណួរអ្នកសារព័ត៌មាន លោក ឡុង កុសល ប្រធាននាយកដ្ឋានប្រព័ន្ធផ្សព្វផ្សាយនៃអាជ្ញាធរជាតិអប្សរា បានឲ្យដឹងថា ក្រៅពីរបៀបវារៈផ្សេងៗក្នុងការងារអភិរក្ស និងអភិវឌ្ឍរមណីយដ្ឋានអង្គរនោះ កិច្ចប្រជុំនៃគណៈកម្មាធិការអន្តរជាតិ ដើម្បីសម្របសម្រួលកិច្ចគាំពារ និងអភិរក្សរមណីយដ្ឋានប្រវត្តិសាស្ត្រអង្គរ ក៏គ្រោងនឹងពិភាក្សាពីក្រមសីលធម៌មួយចំនួន ដែលតម្រូវឲ្យភ្ញៀវទេសចរទាំងអស់គោរពតាម ក្នុងនោះមានទាំងការស្លៀកពាក់ ការស្រែកឡូឡា និងការថតអាក្រាតក្នុងប្រាសាទជាដើម។ល។
យ៉ាងណាមិញ លោក ឡុង កុសល មិនបានលម្អិតរាល់ចំណុចមួយៗនៃក្រមសីលធម៌ ដែលអាជ្ញាធរអប្សរាបានរៀបចំនោះនៅឡើយទេ តែគេនៅចាំថា ក្រមសីលធម៌នេះ ធ្វើឡើងក្រោយមានរឿងអាស្រូវជាច្រើនទាក់ទងនឹងភ្ញៀវទេសចរ ដែលតែងបង្កផលប៉ះពាល់ដល់ប្រពៃណីវប្បធម៌ខ្មែរ ដូចជាតាមរយៈការថតអាក្រាតជាច្រើនលើកនៅក្នុងបរិវេណប្រាសាទជាដើម។ ហើយបញ្ហានេះ កន្លងមកសាធារណៈជនតែងស្តីបន្ទោសខ្លាំងៗដល់ស្ថាប័នអាជ្ញាធរអប្សរា ដែលគ្រប់គ្រងមិនបានល្អ។
គួរបញ្ជាក់ថា កិច្ចប្រជុំ ICC-Angkor លើកទី២៤ ធ្វើឡើងរយៈពេល២ថ្ងៃនៅសាលសន្និសីទអង្គរ នៃអាជ្ញាធរអប្សរា គឺចាប់ពីថ្ងៃទី ៤ ដល់ថ្ងៃទី៥ មិថុនា ដែលមានប្រទេសចំនួន ៣៧ចូលរួម។ សហប្រធានគណៈកម្មាធិការអន្តរជាតិ ICC-Angkor មានលោក តាកាហ៊ីសា ហ្សូហ្គាវា (Takahisa Tsugawa) អនុប្រធានបេសកកម្មនៃស្ថានទូតជប៉ុន និងលោក រ៉ូមុាំង លូវ៉េ (Romain Louvet) ទីប្រឹក្សាផ្នែកសហប្រតិបត្តិការ និងកិច្ចការវប្បធម៌នៃស្ថានទូតបារាំង។ ការងារគ្រប់គ្រងប្រព័ន្ធទឹក ការបណ្តុះបណ្តាលធនធានមនុស្ស ។ល។ កិច្ចប្រជុំនេះ ក៏នឹង ត្រួតពិនិត្យ និងតាមដានរាល់អនុសាសន៍ដែលអង្គប្រជុំដាក់ឲ្យអាជ្ញាធរអប្សរាធ្វើកន្លងមក និងចំណុចដែលមិនបានអនុវត្តបានជាដើម៕
© រក្សាសិទ្ធិដោយ thmeythmey.com