ជាតិ
សង្គមជាតិ
បក្សប្រឆាំង និងសង្គមស៊ីវិល ស្នើឲ្យឈប់ទទួលជនភៀសខ្លួនទៀត ទោះស្ម័គ្រចិត្តក៏ដោយ 04, Jun 2015 , 7:20 pm
![](https://image.thmeythmey.com/pictures/2015/06/04/thumb2/nehru_cambodia_credit.jpg)
×![]()
គណបក្សប្រឆាំង សង្គមស៊ីវិល និងអ្នកវិភាគ ជំរុញឲ្យរដ្ឋាភិបាលឈប់ទទួលយកជនភៀសខ្លួនពីប្រទេសណូរូ បន្ដទៀត បើទោះជាស្ថិតនៅក្រោមគោលការណ៍ស្ម័គ្រចិត្តនៃកិច្ចព្រមព្រៀងអូស្ត្រាលី-កម្ពុជា ក៏ដោយ ព្រោះកម្ពុជាជាប្រទេសក្រីក្រ មិនទាន់មានលទ្ធភាពគ្រប់ក្នុងការទទួលយកជនភៀសខ្លួនឡើយ។ ជនភៀសខ្លួន៤នាក់ពីប្រទេសណូរូ ដែលមានជនជាតិភាគតិច រ៉ូហ៊ីងយ៉ា ១នាក់ និងជនជាតិអ៊ីរ៉ង់៣នាក់ (ស្រី១នាក់) បានមកដល់កម្ពុជាហើយ កាលពីព្រឹកថ្ងៃទី៤មិថុនានេះ។
ថ្វីបើវត្តមានជនភៀសខ្លួន៤នាក់ដំបូង ពីប្រទេសណូរូ នៅក្នុងប្រទេសកម្ពុជាក្ដី តែគណបក្សនយោបាយ និងសង្គមស៊ីវិល នៅតែរក្សាជំហរមិនពេញចិត្តឡើយចំពោះរដ្ឋាភិបាលកម្ពុជា ដែលទទួលយកជនភៀសខ្លួន ខណៈដែលកម្ពុជានៅទទួលយកជំនួយពីបរទេសនៅឡើយ។ គណបក្សប្រឆាំងដែលតែងតែចេញមុខបដិសេធចំពោះជនភៀសខ្លួនទាំងនេះ បានប្រកាសជាថ្មីថា ខ្លួនមិនគាំទ្រគោលនយោបាយស្ម័គ្រចិត្តរបស់រដ្ឋាភិបាលកម្ពុជា និងអូស្ត្រាលីនេះទេ។ លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានបញ្ជាក់ថា ប្រទេសកម្ពុជាស្ថិតនៅស្ថានភាពក្រីក្រ មិនទាន់មានលទ្ធភាពគ្រប់គ្រាន់ ក្នុងការទទួលយកជនភៀសខ្លួនឡើយ។ ហើយបញ្ហាផ្ទៃក្នុងប្រទេស បញ្ហាសិទ្ធិមនុស្ស បញ្ហាសេដ្ឋកិច្ច បញ្ហាដីធ្លីជាដើម មិនទាន់ដោះស្រាយចប់ ដូចនេះការទទួលយកជនភៀសខ្លួននេះ គឺជាការដាក់បន្ទុកមកប្រទេសកម្ពុជាទៅវិញទេ។
អ្នកនាំពាក្យបក្សប្រឆាំងរូបនេះបន្ថែមដូច្នេះថា៖គណបក្សជំទាស់មិនទាន់ដល់ពេលគាំទ្រចំណុចនេះទេ (មិនគាំទ្រជនភៀសខ្លួន) ព្រោះប្រទេសយើងក្រជាងអូស្ត្រាលីឆ្ងាយណាស់ គេមានលទ្ធភាពគ្រប់គ្រាន់ជាងយើង។ យើងនៅក្រមិនទាន់មានលទ្ធភាពទេ ដូចនេះមិនទាន់ចាំបាច់ទទួលជនភៀសខ្លួនមកទេ »។
ចំណែកលោក អំ សំអាត មន្ត្រីស៊ើបអង្កេតសិទ្ធិមនុស្សនៃអង្គការលីកាដូ យល់ថា ការទទួលយកជនភៀសខ្លួននេះ គឺរដ្ឋាភិបាលកម្ពុជាមើលឃើញថិវការជំនួយពីអូស្ត្រាលីប៉ុណ្ណោះ។ ត្រង់ចំណុចនេះ លោក អំ សំអាត យល់ថា ជាបញ្ហាដែលគួរព្រួយបារម្ភបំផុតនាពេលអនាគត ដូចនេះលោកជំរុញឲ្យរដ្ឋាបាលកម្ពុជាគិតគូឡើងវិញពីបញ្ហានៃកិច្ចព្រមព្រៀងMOUនេះ។ «យើងមិនមានការរើសអើងជនភៀសខ្លួនទាំងនោះទេ តែយើងខ្លាចយកពួកគេមកហើយ ធ្វើឲ្យប៉ះពាល់ដល់ការរស់នៅ ជីវភាពពួកគេ។ នៅពេលនេះរដ្ឋាភិបាលអូស្ត្រាលីផ្ដល់ជំនួយមកកម្ពុជាសម្រាប់ផ្គត់ផ្គង់ពួកគេ តែបើគេមិនឈប់ផ្ដល់ជំនួយតើរដ្ឋាភិបាលកម្ពុជាមានលទ្ធភាពពីណា បើកម្ពុជាកំពុងអំពាវនាវសុំជំនួយបរទេស ស្នើឲ្យបរទេសយកពលករកម្ពុជាទៅធ្វើការដែរហ្នឹង»។ នេះជាការបញ្ជាក់របស់លោក អំ សំអាត។
ដោយឡែកលោក អ៊ូ វីរៈ អ្នកវិភាគស្ថានការណ៍សង្គម យល់ថា រដ្ឋាភិបាលអូស្ត្រាលីកំពុងយកប្រាក់មកទិញប្រទេសកម្ពុជាសម្រាប់ដាក់ជនភៀសខ្លួន ហើយការណ៍ដែលអូស្រា្តលីធ្វើបែបនេះ គឺដើម្បីបង្ហាញទៅកាន់ពិភពលោកថា អូស្ត្រាលីមិនទទួលយកជនភៀសខ្លួនទៀតនោះទេ។ ទន្ទឹមនឹងនេះលោក អ៊ូ វីរៈ ក៏ជំរុញឲ្យរដ្ឋាភិបាលកម្ពុជា បញ្ឈប់គោលការណ៍ស្ម័គ្រចិត្តនៃកិច្ចព្រមព្រៀងអូស្ត្រាលី-កម្ពុជា (MOU)នេះ ដើម្បីកុំឲ្យបរទេសមើលងាយកម្ពុជា ថាជាប្រទេសសុំទានគេទៀតពោលគឺទទួលយកជនភៀសខ្លួន ដោយសារជំនួយ។
ជនភៀសខ្លួនពីប្រទេសណូរូ៤នាក់ បានមករស់នៅប្រទេសកម្ពុជា ដែលរួមមាន ជនជាតិភាគតិចរ៉ូហ៊ីងយ៉ានៃប្រទេសមីយ៉ាន់ម៉ា១នាក់ និងជនជាតិអ៊ីរ៉ង់៣នាក់ (ស្រី១នាក់) ក្រោមកិច្ចព្រមព្រៀងរវាងអូស្ត្រាលី-កម្ពុជា ដែលត្រូវបានចុះហត្ថលេខាកាលពីចុងឆ្នាំ២០១៤ ។ ជនភៀសខ្លួនទាំង៤នាក់ នឹងត្រូវស្នាក់នៅក្នុងខណ្ឌច្បារអំពៅ។ នេះបើតាមការបញ្ជាក់របស់មន្ត្រីជាន់ខ្ពស់នៃក្រសួងមហាផ្ទៃ៕
© រក្សាសិទ្ធិដោយ thmeythmey.com