ជាតិ
សង្គមជាតិ
ក្រសួងអប់រំនឹងចុះត្រួតពិនិត្យគុណភាពអប់រំតាមគ្រឹះស្ថានថ្នាក់ឧត្តមសិក្សា 04, Jun 2015 , 10:58 pm
![](https://image.thmeythmey.com/pictures/2015/06/04/thumb2/041___201503025001___ew1g0068.jpg)
×![]()
ក្រសួងអប់រំ យុវជន និងកីឡា នឹងធ្វើការចុះត្រួតពិនិត្យ នៅតាមគ្រឹះស្ថានអប់រំចំនួន១១ ដើម្បីប្រមូលព័ត៌មានស្ដីពីគុណភាពអប់រំ នៅតាមគ្រឹះស្ថានទាំងនោះ។គម្រោងនេះស្ថិតនៅក្នុងយុទ្ធនាការ នៃវាយតម្លៃ និងការពង្រឹងគុណភាពអប់រំថ្នាក់ឧត្តមសិក្សានៅឆ្នាំ២០១៦ខាងមុខ។
រដ្ឋមន្ត្រីក្រសួងអប់រំ នឹងបញ្ជូនមន្ត្រីខ្លួន ចុះទៅត្រួតពិនិត្យស្ថានភាពជាក់ស្ដែង និងពិភាក្សាជាមួយសាកលវិទ្យាធិការតាមគ្រិះស្ថានអប់រំទាំង១១នោះ ដើម្បីប្រមូលព័ត៌មាន និងវាយតម្លៃគុណភាពអប់រំ។បេសសកម្មត្រួតពិនិត្យតាមគ្រឹះស្ថានអប់រំថ្នាក់ឧត្តមសិក្សានេះនឹងចាប់ផ្ដើមយុទ្ធនាការពីខែកក្កដា ដល់ចុងឆ្នាំ២០១៥នេះ។ ព័ត៌មាននេះត្រូវបានបង្ហើបពីលោក រស់ សាលីន អ្នកនាំពាក្យក្រសួងអប់រំ ប្រាប់សារព័ត៌មានថ្មីៗដូច្នេះថា៖«បច្ចុប្បន្ននេះយើងកំពុងរៀបចំសកម្មភាពចុះប្រមូលព័ត៌មានពីគ្រឹះស្ថានចំនួន១១ជាមុនសិន ដោយមានមន្ត្រីក្រសួងអប់រំ ក្រុមប្រឹក្សាក្រសួងអប់រំ នាយកដ្ឋានក្រសួងអប់រំ ចុះទៅត្រួតពិនិត្យ និងពិភាក្សាជាមួយសាកលវិទ្យាធិការ។ អំពីកម្មវិធីសិក្សា សា្ថនភាពជាក់ស្ដែង ដើម្បីពង្រឹងស្ដង់ដារជំនាញ ពង្រឹងផ្ដោតលើគុណភាពអប់រំថ្នាក់ឧត្តមសិក្សាឆ្នាំ២០១៦»។
លោក រស់ សាលីន បន្ថែមថា មិនមែនតែគ្រឹះស្ថានអប់រំចំនួន១១នេះទេ ដែលក្រសួងចុះត្រួតពិនិត្យ ពោលគឺក្រសួងនឹងចុះត្រួតពិនិត្យ ប្រមូលព័ត៌មានពីគ្រឹះស្ថានអប់រំទូទាំងប្រទេស។ ហើយលោកក៏ជំរុញឲ្យគ្រឹះស្ថានអប់រំថ្នាក់ឧត្តមសិក្សាទាំងអស់ ចាប់ផ្ដើមពង្រឹងគុណភាពអប់រំក្នុងកម្មវិធីសិក្សារបស់ខ្លួនចាប់ពីពេលនេះដែរ។
គ្រឹះស្ថានឧត្តមសិក្សាចំនួន១១ ដែលក្រសួងគ្រោងនិងចុះត្រួតពិនិត្យមុនគេ គឺគ្រឹះស្ថានសិក្សារដ្ឋចំនួន៦ និងឯកជនចំនួន៥ ក្នុងនោះរួមមាន សាកលវិទ្យាល័យជាតិគ្រប់គ្រង សាកលវិទ្យាភូមិន្ទភ្នំពេញ សាកលវិទ្យាល័យសុខាភិបាលជាដើម៕
© រក្សាសិទ្ធិដោយ thmeythmey.com