ជាតិ
សេដ្ឋកិច្ច
លោក គង់ វិបុល ព្រមានម្ចាស់សហគ្រាសដែលមិនទៅទូទាត់បំណុលពន្ធតាមពេលកំណត់ 05, Jun 2015 , 1:30 pm
![](https://image.thmeythmey.com/pictures/2015/06/05/thumb2/tax.png)
×![]()
លោក គង់ វិបុល អគ្គនាយកដ្ឋានពន្ធដារ បានព្រមាននាយកសហគ្រាសទាំងអស់ដែលជំពាក់ពន្ធ ឲ្យទូទាត់បំណុលរបស់ខ្លួន នៅអគ្គនាយកដ្ឋានពន្ធដារ ឲ្យបានមុនបំណាច់ខែមិថុនានេះ។ ករណីដែលម្ចាស់សហគ្រាសខកខានមិនបានទៅទូទាត់បំណុល តាមកាលកំណត់ អគ្គនាយកដ្ឋានពន្ធដារ នឹងចុះផ្សាយលើទំព័រសារព័ត៌មាននូវឈ្មោះសហគ្រាស និងកម្មសិទ្ធ ព្រមបន្តចាត់វិធានការតឹងរ៉ឹងទារបំណុលពន្ធតាមច្បាប់សារពើពន្ធជាធរមានផងដែរ។
ការបង់ពន្ធគឺជាកាតព្វកិច្ចរបស់ប្រជាពលរដ្ឋ។ យ៉ាងណាក៏ដោយ អគ្គនាយកដ្ឋានពន្ធដារ បានគូសបញ្ជាក់នៅក្នុងសេចក្តីជូនដំណឹងរបស់ខ្លួនចុះថ្ងៃទី២មិថុនាថា នៅមានសហគ្រាសមួយចំនួនទៀត នៅមិនទាន់បានទៅទូទាត់បំណុលពន្ធដែលខ្លួនជំពាក់នៅឡើយ។ ដូច្នេះ ម្ចាស់សហគ្រាសដែលជំពាក់ពន្ធ ត្រូវទៅទូទាត់បំណុលពន្ធរបស់ខ្លួនឲ្យបានមុនបំណាច់ខែមិថុនានេះ ឆ្នាំ២០១៥ ។
បើតាមសេចក្តីជូនដំណឹង ករណីដែលម្ចាស់សហគ្រាសខកខានមិនបានមកទូទាត់បំណុលពន្ធ ទៅតាមកាលកំណត់ អគ្គនាយកដ្ឋានពន្ធដារ នឹងចុះផ្សាយលើទំព័រសារព័ត៌មាននូវឈ្មោះសហគ្រាស និងកម្មសិទ្ធក្នុងពេលឆាប់ៗខាងមុខ ព្រមបន្តចាត់វិធានការតឹងរ៉ឹងទារបំណុលពន្ធតាមច្បាប់សារពើពន្ធជាធរមានដូចជា បញ្ឈប់ការនាំចេញ នាំចូល ឃាត់ទុកគណនេយ្យ ធនាគារ និងការទុកជាមោឃៈនូវលិខិតអនុញាត និងអាជ្ញាប័ណ្ណផ្សេងៗ ៕
© រក្សាសិទ្ធិដោយ thmeythmey.com