កីឡាជាតិ
ជាតិ
កម្ពុជាប្រកួតមិត្តភាពជាមួយមីយ៉ាន់ម៉ារនៅទឹកដីថៃនាវេលាម៉ោង៦ល្ងាចនេះ 05, Jun 2015 , 3:19 pm
![](https://image.thmeythmey.com/pictures/2015/06/05/thumb2/562015152507untitled-1.jpg)
×![]()
ក្រុមកីឡាបាល់ទាត់ជម្រើសជាតិកម្ពុជា ក្រោមការដឹកនាំរបស់គ្រូបង្វឹកជប៉ុន Kazunori Ohara ជួបប្រកួតមិត្តភាពអន្តរជាតិជាមួយមីយ៉ាន់ម៉ារនាវេលាម៉ោង៦ល្ងាចនេះ នៅកីឡាដ្ឋានMunicipal Nonthaburi Stadium ខណៈក្រុមទាំងពីរត្រៀមខ្លួនសម្រាប់ការប្រកួតវគ្គជម្រុះជុំទីពីរប្រចាំតំបន់អាស៊ី ក្នុងដំណើរឆ្ពោះទៅកាន់ព្រឹត្តិការណ៍ World Cup ឆ្នាំ២០១៨ ។
សម្រាប់ក្រុមទាំងពីរ នេះជាការប្រកួតចុងក្រោយនៅមុនព្រឹត្តិការណ៍ប្រកួតជម្រុះ World Cup ដែលត្រូវចាប់ផ្តើមនៅថ្ងៃទី១១ ខែមិថុនា ខាងមុខ។ កាលពីថ្ងៃទី២ ខែមិថុនា កម្ពុជាបានបញ្ចប់ការប្រកួតក្នុងលទ្ធផលស្មើ ១-១ ជាមួយក្រុមភ្ញៀវឡាវ និងជាគូប្រជែងមួយរបស់មីយ៉ាន់ម៉ារនៅក្នុងពូល G ។
នាជំនួប១៦លើកកន្លងមកដែលត្រូវបានកត់ត្រាដោយសហព័ន្ធកីឡាបាល់ទាត់អន្តរជាតិ មីយ៉ាន់ម៉ារទទួលជ័យជម្នះ ១៣លើក កម្ពុជាឈ្នះ១លើក និងស្មើគ្នា១លើក។ នាជំនួបចុងក្រោយ មីយ៉ាន់ម៉ារបានទទួលជ័យជម្នះលើកម្ពុជា ១-០ ក្នុងការប្រកួតជម្រុះ AFF Suzuki Cup ឆ្នាំ២០១៤ ដែលជាការស៊ុតបាល់ប៉េណាល់ទីរបស់ Kyaw Ko Ko។
កម្ពុជាបានទទួលជ័យជម្នះចុងក្រោយលើមីយ៉ាន់ម៉ារកាលពីការប្រកួតក្នុងពូល B នៃកីឡាស៊ីហ្គេមឆ្នាំ១៩៩៧ (ដែលកាលណោះមិនទាន់មានការកំណត់អាយុកីឡាករ) ប៉ុន្តែក្រោយមក កម្ពុជាបានចាញ់មីយ៉ាន់ម៉ារ៧លើកជាប់ៗគ្នា។
សម្រាប់ការប្រកួតជម្រុះ World Cup នៅថ្ងៃទី១១ ខែមិថុនា កម្ពុជាទទួលភ្ញៀវសឹង្ហបុរី មុននឹងមានការប្រកួតជាបន្តបន្ទាប់ជាមួយអាហ្វហ្គានីស្ថាន ជប៉ុន និងស៊ីរី រីឯ មីយ៉ាន់ម៉ារបើកការប្រកួតជាមួយម្ចាស់ផ្ទះឡាវក្នុងពូល G មុននឹងជួបកូរ៉េខាងត្បូង គូវែត និងលីបង់។
យោងតាមតារាងចំណាត់ថ្នាក់ FIFA World Ranking ដែលផ្សាយកាលពីថ្ងៃទី៤ ខែមិថុនា មីយ៉ាន់ម៉ារស្ថិតនៅចំណាត់ថ្នាក់ទី១៤៣ ខណៈកម្ពុជាស្ថិតនៅចំណាត់ថ្នាក់ទី១៧៨៕
© រក្សាសិទ្ធិដោយ thmeythmey.com