ជាតិ
សង្គមជាតិ
ការប្រែប្រួលអាកាសធាតុ កំពុងគំរាមកំហែង សន្តិសុខស្បៀង
05, Jun 2015 , 5:20 pm
×![]()
ដោយ: ថ្មីៗ
ការប្រែប្រួលអាកាសធាតុ និងគ្រោះមហន្តរាយធម្មជាតិ បានជះឥទ្ធិពលយ៉ាងធ្ងន់ធ្ងរ ដល់ពិភពលោក ក្នុងរយៈពេលចុងក្រោយនេះ។ ការខ្វះខាតទឹក គ្រោះរាំងស្ងួត និងការខូតខាតដី ការបំផ្លិចបំផ្លាញធនធានធម្មជាតិ បានបង្កឲ្យប៉ះពាល់ដល់ការអភិវឌ្ឍសង្គម និងសេដ្ឋកិច្ចរបស់ប្រទេសផងដែរ។ ការខ្ជះខ្ជាយម្ហូបអាហារ ទឹក ថាមពល និងធនធានធម្មជាតិផ្សេងៗទៀត ធ្វើអោយមានការប៉ះពាល់ដល់បរិស្ថាន និងបង្កអោយមានការកើនឡើងកំហាប់ឧស្ម័នផ្ទះកញ្ចក់។
លោក តឹក វណ្ណារា នាយកវេទិកានៃអង្គការមិនមែនរដ្ឋាភិបាលស្តីអំពីកម្ពុជា NGO Forum បានមានប្រសាសន៍ នៅក្នុងទិវាបរិស្ថាន នៅខេត្តស្ទឹងត្រែងថា៖«កម្ពុជាជាប្រទេសងាយរងគ្រោះ ពីការប្រែប្រូលអាកាសធាតុពិភពលោក ហើយបញ្ហាសន្តិសុខស្បៀង កំពុងប្រឈមមុខ និងការគំរាមកំហែងយ៉ាងខ្លាំងពីឥទ្ធិពលអវិជ្ជមានរបស់អាកាសធាតុ ដូចជាការប្រែប្រួលរបប ទឹកភ្លៀង ទឹកជំនន់ ខ្យល់ព្យុះ គ្រោះរាំងស្ងួត ជំងឺ និងសត្វល្អិតចង្រៃជាដើម»។
លោកបន្តថា៖«ក្រៅពីផលប៉ះពាល់ពីការប្រែប្រួលអាកាសធាតុ កម្ពុជាក៏កំពុងប្រឈមនឹងបញ្ហាមួយចំនួនទៀតដែរ ដូចជាការ ថយចុះនៃធនធានព្រៃឈើ ការថយចុះនៃធនធានជីវចម្រុះ ការលប់តំបន់ដីសើមសំរាប់ពង្រីកទីក្រុង និងទីប្រជុំជន ជម្លោះលើការប្រើប្រាស់ដីធ្លី ធនធានខ្សាច់ និងធនធានទឹក និរន្តរភាពអាងទន្លេសាប អាងទន្លេមេគង្គ និងដៃរបស់វា ដែលបញ្ហាទាំងនេះកើតចេញពីអតុយ្យភាពនៃការអភិវឌ្ឍន៌ និងការអភិរក្សដែលកំពុងកើតមានឡើងនៅពេលបច្ចុប្បន្ន»។
នៅថ្ងៃទី៥មិថុនានេះ ជាទិវាបរិស្ថានជាតិ និងទិវាបរិស្ថានពិភពលោក។ នៅឆ្នាំនេះ នៅទូទាំងពិភពលោក និងរួមទាំងកម្ពុជាផងនោះ បានរៀបចំទិវានេះ ក្រោមប្រធានបទ«៧លានសុបិន ភពផែនដីតែមួយ រសនៅដោយចិរភាព » ។
ទិវានេះ រៀបចំឡើងដើម្បីលើកកម្ពស់ការយល់ដឹងជាសាធារណៈអំពីភាពចាំបាច់ និងសារៈប្រយោជន៍នៃកិច្ចគាំពារបរិស្ថាន ការអភិរក្សជីវៈចម្រុះ និងការប្រើប្រាស់ធនធានធម្មជាតិឲ្យបានសមស្រប៕
© រក្សាសិទ្ធិដោយ thmeythmey.com
