ជាតិ
សង្គមជាតិ
CDC៖ មិនទាន់មានករណី ជំងឺផ្លូវដង្ហើមនៅមជ្ឈឹមបូព៌ា (MERS) នៅកម្ពុជានៅឡើយទេ
05, Jun 2015 , 8:30 pm
×![]()
ដោយ: ខន ចំប៉ា
នាយកដ្ឋានប្រយុទ្ធនឹងជំងឺឆ្លង CDC បានបញ្ជាក់ថា រហូតដល់ថ្ងៃទី ៥ ខែមិថុនា ឆ្នាំ២០១៥នេះពុំទាន់រកឃើញករណីជំងឺផ្លូវដង្ហើមនៅមជ្ឈឹមបូព៌ា (MERS) នៅកម្ពុជានៅឡើយទេ។ តែយ៉ាងណាក៏ដោយ ក្រសួងសុខាភិបាលកម្ពុជា កំពុងតាមដានជំងឺនេះយ៉ាងយកចិត្តទុកដាក់ ទាំងនៅឧបទ្វីបមជ្ឈឹមបូព៌ា ប្រទេសកូរ៉េខាងត្បូង និងពង្រឹងប្រព័ន្ទតាមដានក្នុងប្រទេស ។ ជាមួយគ្នានោះ ក្រសួងសុខាភិបាល ក៏ស្នើឲ្យប្រជាពលរដ្ឋមានការប្រុងប្រយ័ត្នខ្ពស់ និងត្រូវទៅមន្ទីរពេទ្យជាបន្ទាន់ ប្រសិនបើសង្ស័យថា ខ្លួនមានជំងឺនេះ។
រហូតមកដល់ថ្ងៃទី៥ខែមិថុនានេះ មិនទាន់មានករណីជំងឺផ្លូវដង្ហើមនៅមជ្ឈឹមបូព៌ា (MERS) នៅកម្ពុជានៅឡើយទេ។ ក្រសួងសុខាភិបាលកំពុង តាមដានជំងឺនេះយ៉ាងយកចិត្តទុកដាក់ ទាំងនៅឧបទ្វីបមជ្ឈឹមបូព៌ា និងប្រទេសកូរ៉េខាងត្បូង និងពង្រឹងប្រព័ន្ទតាមដានក្នុងប្រទេស ។ ការអះអាងនេះ ត្រូវបានសរសេរនៅក្នុងគេហទំព័រហ្វេកប៊ុកផ្លូវការរបស់នាយកដ្ឋានប្រយុទ្ធនឹងជំងឺឆ្លង CDC។
បើតាមCDC ជំងឺ MERS មានរោគសញ្ញាដូចជា គ្រុនក្តៅ ក្អក រាករូស ឈឺសាច់ដុំ និងពិបាកដកដង្ហើម ។ ដូច្នេះក្រសួងសុខាភិបាល បានសំណូមពរឲ្យប្រជាពលរដ្ឋទាំងអស់ ប្រុងប្រយ័ត្ន និងទៅមន្ទីរពេទ្យជាបន្ទាន់ ប្រសិនបើមានរោគសញ្ញាអស់ទាំងនេះ។ មិនត្រឹមតែប៉ុណ្ណោះ ក្រ សួងបានណែនាំឲ្យប្រជាពលរដ្ឋ ត្រូវសម្អាតដៃឲ្យបានញឹកញាប់ និងត្រូវចំអិនម្ហូបអាហារឲ្យឆ្អិនល្អមុនបរិភោគ។ ចំណែកអ្នកដែលធ្វើដំណើរទៅតំបន់មជ្ឈឹមបូព៌ា ឬប្រទេសដែលមានជំងឺ MERS រាលដាល ត្រូវមានការប្រុងប្រយ័ត្នខ្ពស់បំផុត ចៀសវាងប៉ះពាល់ជាមួយអ្នកជំងឺផ្លូវដង្ហើម MERS លាងសម្អាតដៃឲ្យបានញឹកញាប់ ជាពិសេសបន្ទាប់ ពីប៉ះពាល់ដោយផ្ទាល់ជាមួយអ្នកជំងឺ ឬបរិស្ថានជុំវិញ រក្សាអនាម័យ និងសុវត្ថិភាពម្ហូបអាហារ ព្រមទាំងចៀសវាងប៉ះពាល់ជិតស្និទ្ធជាមួយកសិដ្ឋាន ឬសត្វរស់ដែលជាកន្លែងមានវត្តមានវីរុសចរាចរ។
ខណៈដែលជំងឺនេះ កំពុងផ្ទុះឡើងនៅកូរ៉េខាងត្បូង លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានសរសេរនៅលើហ្វេកប៊ុករបស់លោក ដោយបានអំពាវនាវឲ្យបងប្អូនពលករខ្មែរដែលកំពុងធ្វើការនៅប្រទេសកូរ៉េជាង៣ម៉ឺននាក់ ឲ្យមានការប្រុងប្រយ័ត្នផ្នែកសុខភាពស្តាប់តាមការណែនាំរបស់ថៅកែ ជាពិសេសការណែនាំផ្នែកសុខាភិបាលពីរដ្ឋាភិបាលកូរ៉េ កុំបរិភោគចំណីផ្តេសផ្តាស ឬដើរយប់ជ្រៅត្រូវទឹកភ្លៀង ឬអន្សើម ហើយបើមានបញ្ហាពីបាកដកដង្ហើម ឬក្តៅខ្លួន ត្រូវប្រញាប់ទៅពេទ្យជាបន្ទាន់។
ជំងឺឆ្លងមជ្ឈិមបូព៌ា MERS បានបន្តរាតត្បាតយ៉ាងរហ័សនៅក្នុងប្រទេសកូរ៉េខាងត្បូងគួរឲ្យបា រម្ភយ៉ាងខ្លាំង។ ជំងឺគ្មានថ្មាំព្យាបាលនេះ គិតមកត្រឹមថ្ងៃសុក្រ បានសម្លាប់មនុស្សរហូតដល់ ៤នាក់ហើយ។ បើតាមអាជ្ញាធរ ករណីអ្នកឆ្លងជំងឺសរុបនៅប្រទេសកូរ៉េកើនឡើងដល់ ៤១នាក់ និងមនុស្សជាង១៣០០នាក់ ត្រូវបាន ដាក់ឲ្យដាច់ដោយឡែកពីគេ ដើម្បី តាមដានសុខភាព។
ជំងឺផ្លូវដង្ហើមមជ្ឈឹមបូព៌ា MERS បង្កឡើងដោយមេរោគឈ្មោះ កូរ៉ូណាវីរុស (Corona Virus) ដែលរកឃើញដំបូងក្នុងឆ្នាំ២០១២ ក្នុងប្រទេស អារ៉ាប៌ីសាអូឌីត ដែលអ្នកវិទ្យាសាស្ត្រសង្ស័យថា ចំលងមកពីសត្វអូដ៏ និងសត្វព្រៃដទៃទៀត និងអាចឆ្លងពីអ្នកឈឺទៅមនុស្សម្នាក់ទៀត តាមរយៈការប៉ះពាល់ផ្ទាល់ និងរស់នៅជិតដិត។
បើតាមរបាយការណ៍របស់អង្គការសុខភាពពិភពលោក ជំងឺMERS បានសម្លាប់មនុស្សចំនួន៤៤២នាក់នៅប្រទេសចំនួន២៥ ក្នុងចំណោម១,១៧៩ករណីដែលបានរកឃើញ។ អ្នកដែលឆ្លងជំងឺហើយវិវត្តន៏ទៅជំងឺធ្ងន់ធ្ងរ និងស្លាប់ ច្រើនកើតលើ មនុស្សចាស់ចាប់ពី៦០ឆ្នាំឡើងទៅ និងមនុស្សដែលមានជំងឺរ៉ាំរ៉ៃក្នុងខ្លួន៕
© រក្សាសិទ្ធិដោយ thmeythmey.com
