កីឡាជាតិ
ជាតិ
ស៊ីហ្គេម៖ កម្ពុជាបើកយុទ្ធនាការស្វែងរកមេដាយចាប់ពីថ្ងៃនេះតទៅ 06, Jun 2015 , 6:30 am
![លោក ថោង ខុន និងលោក ហង់ ជួន ណារ៉ុន ចុះសួរសុខទុក្ខប្រតិភូ និងអត្តពលិក។ រូបថត Shin Long](https://image.thmeythmey.com/pictures/2015/06/05/thumb2/shinglong.jpg)
លោក ថោង ខុន និងលោក ហង់ ជួន ណារ៉ុន ចុះសួរសុខទុក្ខប្រតិភូ និងអត្តពលិក។ រូបថត Shin Long
×![]()
មុនឈានមកដល់ការបើកព្រឹត្តិការណ៍កីឡាស៊ីហ្គេមលើកទី២៨ជាផ្លូវការកាលពីថ្ងៃសុក្រ ម្ចាស់ផ្ទះសឹង្ហបុរី កំពុងនាំមុខគេលើតារាងដោយទទួលបានមេដាយសរុប១៨ ខណៈវៀតណាម ថៃ ម៉ាឡេស៊ី ហ្វីលីពីន និងឥណ្ឌូនេស៊ី ស្ថិតនៅលេខរៀងជាបន្តបន្ទាប់។ កម្ពុជា ក៏ដូចជាមីយ៉ាន់ម៉ារ ឡាវ ប្រ៊ុយណេ និងទីម័រខាងកើត រំពឹងដណ្តើមបានកិត្តិយសជូនជាតិរបស់ខ្លួនចាប់ពីថ្ងៃនេះតទៅ។
មួយសប្តាហ៍មុនការបើកសម្ពោធព្រឹត្តិការណ៍កីឡាស៊ីហ្គេមលើកទី២៨ ការប្រកួតកីឡាបីប្រភេទរួមមាន កីឡាសម្តែងក្នុងទឹក កីឡាគុនដាវ និងកីឡាវាយកូនឃ្លីលើតុ បាននាំឲ្យម្ចាស់ផ្ទះសឹង្ហបុរី ទទួលបានមេដាយមាស៧ ប្រាក់៤ និងសំរឹទ្ធ៧ ហើយវៀតណាម ថៃ ម៉ាឡេស៊ី ហ្វីលីពីន និងឥណ្ឌូនេស៊ី ក៏ចូលក្នុងបញ្ជីប្រទេសដែលទទួលបានមេដាយផងដែរ។
កម្ពុជា ឡាវ ប្រ៊ុយណេ ទីម័រខាងកើត រួមទាំងមីយ៉ាន់ម៉ារដែលជាម្ចាស់ផ្ទះកាលពីឆ្នាំ២០១៣ មិនទាន់ទទួលបានមេដាយណាមួយឡើយ ខណៈកម្ពុជាបានចាប់ផ្តើមការប្រកួតប្រជែងលើកីឡាវាយកូនឃ្លីលើតុ គុនដាវ និងកីឡាបាល់ទាត់អាយុក្រោម២៣ឆ្នាំ។
ការប្រកួតលើវិញ្ញាសាមួយចំនួននៃកីឡាវាយកូនឃ្លីលើតុ និងគុនដាវ មិនទទួលលទ្ធផលវិជ្ជមានឡើយ ប៉ុន្តែភាពសប្បាយរីករាយសម្រាប់ក្រុមអ្នកគាំទ្រកម្ពុជា បានកើតឡើងបន្ទាប់ពីពួកគេមើលឃើញពីជ័យជម្នះ ៣-១ របស់ក្រុមកីឡាបាល់ទាត់យុវជនជម្រើសជាតិអាយុក្រោម២៣ឆ្នាំ លើហ្វីលីពីន នាការប្រកួតដំបូងនៅក្នុងពូលរបស់ខ្លួន។
សូមបញ្ជាក់ថា ព្រឹត្តិការណ៍កីឡាស៊ីហ្គេមលើកទី២៨ បន្តការប្រកួតរហូតដល់ថ្ងៃទី១៧ ខែមិថុនា ដោយមានអត្តពលិកប្រមាណ៧០០០នាក់មកពី១១ប្រទេសក្នុងតំបន់ ចូលរួម។ ពួកគេប្រកួតប្រជែងលើកីឡាចំនួន៣៦ប្រភេទ និង៤០២វិញ្ញាសា ហើយប្រកួតប្រព្រឹត្តទៅនៅលើទីតាំងជាង៣០កន្លែងនៅទូទាំងប្រទេសសឹង្ហបុរី។
សម្រាប់ព្រឹត្តិការណ៍កីឡាស៊ីហ្គេមលើកទី២៨នេះ កម្ពុជាមានអត្តពលិក១៨០ ចូលរួមប្រកួតលើ២២ប្រភេទកីឡា។ មេដឹកនាំស្ថាប័នកីឡាកម្ពុជាបានធ្លាក់ចុះនូវក្តីសង្ឃឹមរបស់ខ្លួន បើប្រៀបធៀបកាលពីឆ្នាំ២០១៣ ដោយសារម្ចាស់ផ្ទះសឹង្ហបុរី មិនបានដាក់កីឡាដ៏មានសក្តានុពលរបស់កម្ពុជាដូចជា ចំបាប់ វ៉ូវីណាម និងតេក្វាន់ដូទម្ងន់ធ្ងន់សម្រាប់ធ្វើការប្រកួតប្រជែងយកមេដាយ។
ទោះបីជាយ៉ាងណាក៏ដោយ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជានាយបេសកកម្មប្រតិភូកីឡាកម្ពុជា មានក្តីសង្ឃឹមថា កម្ពុជានឹងទទួលបានមេដាយមាសលើកីឡាប៉េតង់ សីឈិនឡូន និងប្រដាល់សកល។ លោកក៏បានមើលឃើញពីការរីកចម្រើនដ៏ភ្ញាក់ផ្អើលនៃវិស័យកីឡាបាល់ទាត់ និងបាល់បោះខ្មែរនៅក្នុងការប្រកួតកីឡាស៊ីហ្គេមនេះដែរ ខណៈកីឡាវាយកូនបាល់ កីឡាតេក្វាន់ដូ និងអត្តពលិក គឺមិនអាចមើលរំលងបានឡើយ។
ក្រោយការបើកកម្មវិធីជាផ្លូវការ ប្រទេសទាំងអស់នឹងមានភាពកាន់តែមមាញឹកតែលើការប្រកួតប្រជែងដណ្តើមយកមេដាយ ហើយនៅនេះ កម្ពុជាត្រូវប្រកួតប្រជែងលើប្រភេទកីឡាហែលទឹក ប្រដាល់សកល ប្រណាំងទូកកានូ ជិះសេះ គុនដាវ បាល់ទាត់ ប៉េតង់ បាល់ឱប សីឈិនឡូន វាយកូនឃ្លីលើតុ វាយកូនបាល់ ទូកប្រពៃណី និងវូសូ៕
© រក្សាសិទ្ធិដោយ thmeythmey.com