កីឡាជាតិ
ជាតិ
FFC ផ្តល់រង្វាន់១ម៉ឺនដុល្លារដល់ក្រុមជម្រើសជាតិដែលបានឈ្នះមីយ៉ាន់ម៉ារ ១-០ 05, Jun 2015 , 11:37 pm
![](https://image.thmeythmey.com/pictures/2015/06/05/thumb2/562015234652borey.jpg)
×![]()
សហព័ន្ធកីឡាបាល់ទាត់កម្ពុជា (FFC) បានសម្រេចផ្តល់ប្រាក់រង្វាន់ចំនួន១ម៉ឺនដុល្លារអាមេរិកដល់ក្រុមកីឡាបាល់ទាត់ជម្រើសជាតិកម្ពុជាដែលយកឈ្នះមីយ៉ាន់ម៉ារ ១-០ នាការប្រកួត មិត្តភាពនៅកីឡដ្ឋាន Nonthaburi Stadium ប្រទេសថៃ នាថ្ងៃទី៥ ខែមិថុនា ឆ្នាំ២០១៥។ ល្ងាចថ្ងៃដដែល លោក ខៀវ សាម៉េត អនុប្រធាន FFC បានបញ្ជាក់ប្រាប់សារព័ត៌មានថ្មីៗថា ការ ផ្តល់ប្រាក់រង្វាន់គឺដើម្បីលើកទឹកចិត្តក្រុមជម្រើសជាតិដែលបង្ហាញទម្រង់លេងយ៉ាងល្អក្នុងជំនួបមិត្តភាពនេះ។
ជ័យជម្នះរបស់ក្រុមជម្រើសជាតិកម្ពុជា សម្រេចបានដោយខ្សែប្រយុទ្ធ ឃឹម បូរី នៅនាទី ទី៣៨ ។ ទាំងកម្ពុជា និងមីយ៉ាន់ម៉ារសុទ្ធតែត្រៀមខ្លួនសម្រាប់ការប្រកួតជម្រុះជុំទីពីរប្រចាំតំបន់អាស៊ីនៃព្រឹត្តិការណ៍ World Cup។
សម្រាប់ការប្រកួតជម្រុះ World Cup នៅថ្ងៃទី១១ ខែមិថុនា កម្ពុជាក្រោមការដឹកនាំរបស់គ្រូបង្វឹកជប៉ុន Kazunori Oharaទទួលភ្ញៀវ សឹង្ហបុរី មុននឹងមានការប្រកួតជាបន្តបន្ទាប់ជាមួយអាហ្វហ្គានីស្ថាន ជប៉ុន និងស៊ីរី រីឯ មីយ៉ាន់ម៉ារបើកការប្រកួតជាមួយម្ចាស់ផ្ទះឡាវក្នុងពូល G មុននឹងជួបកូរ៉េខាងត្បូង គូវែត និងលីបង់។
យោងតាមតារាងចំណាត់ថ្នាក់ FIFA World Ranking ដែលផ្សាយកាលពីថ្ងៃទី៤ ខែមិថុនា មីយ៉ាន់ម៉ារស្ថិតនៅចំណាត់ថ្នាក់ទី១៤៣ ខណៈកម្ពុជាស្ថិតនៅចំណាត់ថ្នាក់ទី១៧៨ បន្ទាប់ពីទទួលបានលទ្ធផលស្មើ ១-១ ជាមួយឡាវ៕ © រក្សាសិទ្ធិដោយ thmeythmey.com