កីឡាជាតិ
ជាតិ
កីឡាបាល់ឱប៖ កុមារជនបទចង់ក្លាយជាកីឡាករជម្រើសជាតិកម្ពុជា ទៅប្រកួតក្រៅប្រទេស 06, Jun 2015 , 9:30 am
![](https://image.thmeythmey.com/pictures/2015/06/06/thumb2/6-national_sport.jpg)
×![]()
ខេត្តព្រះវិហារ៖ កុមារាកុមារីជាង ២០នាក់ដែលកំពុងរស់នៅក្នុងព្រៃភ្នំសហគមន៍ឃុំស្រយ៉ង់ ស្រុកគូលែន ខេត្តព្រះវិហារ បាននឹងកំពុងហ្វឹកហាត់កីឡាបាល់ឱបជារៀងរាល់ថ្ងៃ ជាមួយ លោក ហ្វីលីព ម៉ូណាំង (Philippe MONNIN) គ្រូបង្វឹកកីឡាបាល់ឱប និងជាទីប្រឹក្សាសហព័ន្ធកីឡាបាល់ឱបកម្ពុជា។ តាមរយៈនេះ ពួកគេប្តេជ្ញាថា នឹងខិតខំប្រឹងប្រែងហ្វឹកហាត់ឲ្យបានពូកែ ដើម្បីក្លាយជាខ្លួនជាជម្រើសជាតិបាល់ឱបកម្ពុជា ទៅចូលរួមប្រកួតលើឆាកអន្តរជាតិ។
កុមារទាំងនោះ មានឱកាសហ្វឹកហាត់កីឡាប្រភេទថ្មីនេះ តាមរយៈលោក ហ្វីលីព គ្រូបង្វឹក សញ្ជតិបែលហ្ស៊ិក និងជាម្ចាស់ក្រុមហ៊ុនវិនិយោគដាំកៅស៊ូឯកជនមួយ ដែលបានបោះទុនវិនិយោគក្នុងទីតាំងស្រុកគូលែន ខេត្តព្រះវិហារ។ ពួកគេបានទទួលបទពិសោធន៍ថ្មីជាមួយ នឹងកីឡាបាល់ឱប ទោះបីជារស់នៅរាប់រយគីឡូម៉ែត្រពីទីក្រុងភ្នំពេញក៏ដោយ។
មានវ័យ ១១ឆ្នាំ កុមារី វ៉ន ថាត និយាយថា កីឡាបាល់ឱបនេះ គឺជាកីឡាប្រភេទថ្មីបំផុត សម្រាប់នាង ព្រមទាំងកុមារដែលរស់នៅក្នុងតំបន់ព្រៃភ្នំ ដោយនាងអះអាងថា កុមារក្នុង សហគមន៍ធ្លាប់តែឃើញតែអ្នកលេងបាល់ទាត់ និងបាល់ទះប៉ុណ្ណោះ ពោលគឺមិនធ្លាប់ឃើញ អ្នកលេងបាល់ឱបនេះទេ។
កុមារីសម្បុរខ្មៅស្រអែមរូបនេះ បានចូលហ្វឹកហាត់កីឡាបាល់ឱបនេះ រយៈពេលជាង ១ឆ្នាំ ដោយនាងមានឱកាសនេះ តាមរយៈការជ្រើសរើសរបស់លោកគ្រូបង្រៀនក្នុងសាលាបឋម សិក្សាស្រយ៉ង់។ មូលហេតុតែមួយគត់ ដែលធ្វើឲ្យនាងចាប់អារម្មណ៍ចូលហាត់រៀន កីឡាបាល់ឱប គឺដោយសារ នេះជាកីឡាប្លែកថ្មី ធ្វើឲ្យនាងអារម្មណ៍សប្បាយ។ កុមារីនិយាយ មួយៗទាំងអៀនខ្មាស់យ៉ាងដូច្នេះថា៖«ខ្ញុំអត់ចង់ចូលលេងទេដំបូង ព្រោះខ្ញុំឃើញគេរត់ ដណ្តើមបាល់គ្នាខ្លាំង រត់បុកគ្នាដួលហ៊ុយដី តែក្រោយពេលគ្រូណែនាំ ទើបខ្ញុំចង់ចូលលេងកីឡាសប្បាយប្លែកនេះ»។
នៅពេលទំនេរពីការសិក្សា កុមារក្នុងសហគមន៍ទាំងអស់ជារឿយៗតែងប្រមួលគ្នាមក ហ្វឹកហាត់លើវាលដីក្រហមទំហំជាង ១ហិចតាមួយកន្លែង ដែលក្រុមហ៊ុនវិនិយោគចំការ កៅស៊ូបានត្រៀមទុកសម្រាប់ហ្វឹកហាត់ពួកគេ។
សិស្សកំពុងថ្នាក់ទី២ នៃសាលាបឋមសិក្សាស្រយ៉ង់រូបនេះ ជឿជាក់ថា នាងនឹងអាចក្លាយជា កីឡាបាល់ឱបជម្រើសជាតិ ហើយនឹងអាចឈានជើងទៅចូលរួមប្រកួតលើទីលានក្រៅ ប្រទេសទៀតផង។ «ខ្ញុំស្រម៉ៃថា ថ្ងៃមួយខ្ញុំនឹងអាចទៅលេងក្រៅប្រទេសដូចបងៗមុនដែរ។ ខ្ញុំចង់ក្លាយជាជម្រើសជាតិពួកគាត់»។ នេះជាក្តីស្រម៉ៃរបស់កុមារ វ៉ន ថាត។
មិនខុសគ្នាប៉ុន្មានពីកុមារីខាងលើ ប្អូនស្រី ជាវ ស្រីពៅ អាយុ ១២ឆ្នាំ ដែលជាកីឡាករបាល់ឱប កុមារ ក្នុងសហគមន៍ដែរនោះ ក៏មានក្តីស្រម៉ៃទៅប្រកួតនៅក្រៅប្រទេសដែរ។ នាងនិយាយ ជារឿយៗ កុមារទាំងអស់ តែងមានអារម្មណ៍សប្បាយចិត្តនឹងការរៀបចំហ្វឹកហាត់ និងការប្រកួតដែលរៀបចំដោយក្រុមហ៊ុន ហើយថា ពួកគេចង់ឲ្យក្រុមហ៊ុននាំពួកគេទៅ ប្រកួតនៅប្រទេសទៀតផង។
មានសម្បុរសណ្តែកបាយ កុមារី ស្រីពៅ និយាយទាំងសំណើចថា៖«ពេលប្រកួតម្តងៗ ពួកយើងរីករាយ ហើយខំប្រឹងរត់ការពារបាល់ មានខ្លះដួលហុយដី។ យើងចង់លេងបាល់ឱប នៅក្រៅប្រទេស ហើយចង់ឃើញកម្ពុជាមានឈ្មោះល្បីលើពិភពលោក»។
ជាមួយគ្នានេះ លោក ហ្វីលីព ម៉ូណាំង (Philippe MONNIN) ជាទីប្រឹក្សា និងគ្រូបង្វឹកកីឡាបាល់ឱបកម្ពុជាមួយរូប ដែលបានរួមចំណែកជំរុញលើកស្ទួយវិស័យកីឡាបាលឱបក្នុងប្រទេសកម្ពុជា ចាប់តាំងពីឆ្នាំ ១៩៩៩ មក បានប្រាប់ពីគោលបំណងដែលលោក នាំកីឡាបាល់ឱបនេះថា ដោយសារលោកចង់ចូលចិត្តកីឡាប្រភេទនេះ ហើយម្យ៉ាងទៀត លោកចង់ ឃើញយុវជន និងកុមារក្នុងសហគមន៍ជនបទអាចប្រកួតកីឡាគ្រប់ប្រភេទ។
លោកថា៖«ក្រៅពីកីឡាបាល់ឱបនេះ ខ្ញុំនឹងរៀបចំកន្លែងហ្វឹតហាត់កីឡាវាយសីលើតុ និងកីឡាការ៉ាត់តៃដូ ថែមទៀត។ ខ្ញុំចូលចិត្តកីឡា ខ្ញុំចង់ចូលរួមអភិវឌ្ឍន៍ពង្រឹងពង្រីក វិស័យកីឡានៅកម្ពុជា»។
បើតាមគ្រូបង្វឹកជនជាតិបែលហ្ស៊ិកខាងលើ បច្ចុប្បន្ននេះ កីឡាករបាល់ឱបទាំងយុវជន និងកុមារក្នុងសហគមន៍មានចំនួនជាង ៣០នាក់ ហើយកីឡាករផ្សេងទៀត មាននៅតាមខេត្ត កណ្តាល កំពង់ចាម សៀមរាប និងព្រះវិហារជាដើម។
អំឡុងឆ្នាំ២០០០ កីឡាបាល់ឱបកម្ពុជា ត្រូវបានផ្លូវការចុះបញ្ជីក្នុងសហព័ន្ធកីឡាជាតិ ជាសហព័ន្ធកីឡាបាល់ឱបកម្ពុជា (Cambodian Federation of Rugby)។ ទោះបីជាកីឡានេះ ទើបនឹងចាប់ផ្តើមមាននៅកម្ពុជាក្តី តែទទួលបានការចាប់អារម្មណ៍ពីសំណាក់យុវជន និងកុមារនៅកម្ពុជា ហើយលោក Philippe MONNIN មានជំនឿជាក់ថា កីឡាប្រភេទនេះ នឹងរីកចំរើនពេញនិយមដូចកីឡាបាល់ទាត់ និងកីឡានានាដែរ៕
© រក្សាសិទ្ធិដោយ thmeythmey.com