បារាយណ៍ទឹកថ្លាគោកដោយការបង្ហូរទឹកចេញដើម្បីជួសជុលប្រាសាទ

ជាតិ

សង្គមជាតិ

បារាយណ៍ទឹកថ្លាគោកដោយការបង្ហូរទឹកចេញដើម្បីជួសជុលប្រាសាទ

06, Jun 2015 , 12:35 pm

រូបភាព

រូបភាពបារាយណ៍ទឹកថ្លា ឫបារាយណ៍ខាងលិចនារដូវប្រាំង

ដោយ: អុីសា រ៉ហានី (Isa Rohany)

សៀមរាប៖ មន្ត្រីនៃអាជ្ញាធរជាតិអប្សរា បានប្រាប់អ្នកសារព័ត៌មានថា មូលហេតុដែលធ្វើឲ្យទឹកនៅក្នុងបារាយណ៍ទឹកថ្លាគោកគ្មានទឹកនោះ គឺបណ្តាលមកពីការបង្ហូរទឹកចេញ។ ការបង្ហូរទឹកចេញនេះ ក៏ដោយសារក្រុមការងារជួសជុលប្រាសាទនៃអាជ្ញាធរអប្សរា កំពុងដំណើរការជួសជុលប្រាសាទមេបុណ្យខាងលិច នៅស្ថិតនៅចំកណ្តាលនៃបារាយណ៍ទឹកថ្លា។

ចុចទីនេះដើម្បីទទួលបានព័ត៌មានរហ័ស

អគ្គនាយករងអាជ្ញាធរអប្សរា ទទួលបន្ទុកផែ្នកធនធានទឹក បានឲ្យដឹងថា បច្ចុប្បន្នក្រុមការងាររបស់លោក កំពុងចាប់ផ្តើមដំណើរការជួសជុលប្រាសាទមេបុណ្យ។ លោក ហង្ស ពៅ បានបន្ថែមថា អាជ្ញាធរអប្សរាបានសម្រេចបង្ហូរទឹកក្នុងបារាយណ៍ចេញ ដើម្បីងាយស្រួលដឹកគ្រឿង និងសម្ភារជួសជុលប្រាសាទមេបុណ្យខាងលិច ហើយគម្រោងនេះនឹងបញ្ចប់ក្នុងពេលឆាប់ៗខាងមុខនេះ។

លោក ហង្ស ពៅ មិនបានបញ្ជាក់លម្អិតពីដំណើរការជួសជុលប្រាសាទមេបុណ្យខាងលិចទេ តែលោកអះអាងថា ទឹកក្នុងប្រាសាទនឹងមានជាធម្មតាវិញនៅឆ្នាំ ក្រោយពេលជួសជុលប្រាសាទរួច។ ចំពោះគម្រោងបន្ទាប់ គឺថាអាជ្ញាធរអប្សរា បានអនុញ្ញាតឲ្យយកទឹកក្នុងបារាយណ៍ ដើម្បីធ្វើការផ្គត់ផ្គង់ទឹកស្អាតដល់ខេត្តសៀមរាបទាំងមូល។ ការបូមទឹកពីក្រោមដីត្រូវបានហាមឃាត់ ដោយសារខ្លាចប៉ះពាល់ដល់គ្រឹះប្រាសាទនានាក្នុងតំបន់អង្គរ។

គួរបញ្ជាក់ថា ភ្ញៀវចាប់ផ្តើមស្ងាត់ គួបផ្សំខែធ្លាក់ភ្ញៀវនេះ ធ្វើឲ្យបារាយណ៍ទឹកថ្លា ប្រែពីភាពអ៊ូអរមកពីភាពស្ងប់ស្ងាត់។ ធ្លាប់តែសម្បូរភ្ញៀវទេសចរជាតិ និងអន្តរជាតិ ចុះងូតទឹកលេងនៅពេលល្ងាចនោះ បារាយណ៍ទឹកថ្លា ប្រែជាគោក និងអាចដើរឆ្លងកាត់បានយ៉ាងងាយស្រួលបំផុត៕