ជាតិ
សង្គមជាតិ
កម្ពុជាធ្វើជាម្ចាស់ផ្ទះកិច្ចប្រជុំឧត្ដមមន្ត្រីអប់រំតំបន់អាស៊ីអាគ្នេយ៍លើកទី៥
08, Jun 2015 , 9:49 am
×![]()
ដោយ: ខន ចំប៉ា
ចាប់ពីថ្ងៃទី១១ដល់ថ្ងៃទី១២ខែមិថុនាខាងមុខ កម្ពុជា នឹងធ្វើជាម្ចាស់ផ្ទះ នៃកិច្ចប្រជុំឧត្ដមមន្ត្រីអប់រំ ថ្នាក់តំបន់អាស៊ីអាគ្នេយ៍លើកទី៥ ដែលនឹងប្រព្រឹត្តទៅនៅខេត្តសៀមរាប។ «ក្របខ័ណ្ឌធានាគុណភាពសម្រាប់ការអប់រំជាមូលដ្ឋាន» គឺជាប្រធានបទ នៃកិច្ចប្រជុំឧត្ដមមន្ត្រីអប់រំថ្នាក់តំបន់អាស៊ីអាគ្នេយ៍លើកទី៥នេះ។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា នឹងអញ្ជើញជាអធិបតីភាពនៅក្នុងកិច្ចប្រជុំ ឧត្ដមមន្ត្រីអប់រំថ្នាក់តំបន់អាស៊ីអាគ្នេយ៍លើកទី៥ ដែលនឹងប្រព្រឹត្តទៅចាប់ពីថ្ងៃទី១១ដល់ថ្ងៃទី១២ ខែមិថុនា នៅសណ្ឋាគារ Angkor Paradise ខេត្តសៀមរាប។ «ក្របខ័ណ្ឌធានាគុណភាពសម្រាប់ការអប់រំជាមូលដ្ឋាន» គឺជាប្រធានបទ នៃកិច្ចប្រជុំរយៈពេល២ថ្ងៃនេះ។
យោងតាមសេចក្តី ជូនដំណឹងរបស់ក្រសួងអប់រំ យុវជន និងកីឡា កិច្ចប្រជុំនេះ នឹងមានការអញ្ជើញចូលរួមពីសំណាក់ប្រធានលេខាធិការដ្ខាន Southeast Asia Minters of Education Organization (SEAMEO) និងគណៈប្រតិភូឧត្ដមមន្ត្រីអប់រំមកពីបណ្ដាប្រទេសជាសមាជិក SEAMEO ដែលមានដូចជា ប្រទេសព្រុយណេ កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ ទីម័រខាងកើត វៀតណាម និងប្រទេសដៃគូសមាជិកSEAMEO។
កិច្ចប្រជុំនេះ មានគោលបំណងពិនិត្យទៅលើបញ្ហាអប់រំក្នុងតំបន់ ដូចជាការធានាគុណភាពអប់រំរបស់សិស្ស ប្រកបដោយសមត្ថភាពពេញលេញ និងជំនាញវិជ្ជាជីវៈ ការកំណត់កម្មវិធីសិក្សាពីថ្នាក់មូលដ្ឋានដល់ឧត្ដមសិក្សាប្រកបដោយគុណភាពស្របតាមស្តង់ដារអាស៊ាន ការទទួលបាននូវការអប់រំប្រកបដោយគុណភាពរបស់កុមារគ្រប់ៗរូប និងការពង្រឹងគុណភាព សមត្ថភាពគ្រូបង្រៀន ដែលត្រូវបានចាត់ទុកជាបញ្ហាចម្បងក្នុងការពង្រឹងគុណភាពក្នុងវិស័យអប់រំ។
កិច្ចប្រជុំក៏នឹងពិភាក្សាលើការលើកទិសដៅ និងផែនការសកម្មភាពមួយចំនួន ដើម្បីធានាឱ្យបាននូវគុណភាពនៃការសិក្សារបស់សិស្ស និងគុណភាពនៃការបង្រៀនរបស់គ្រូតាមរយៈការអនុវត្តកម្ម វិធីសិក្សា ការគ្រប់គ្រងការអប់រំច្បាប់នៃការអប់រំ និងការពិនិត្យតាមដានគុណភាពអប់រំសំដៅឆ្ពោះទៅរកការសម្រេចគោលដៅអភិវឌ្ឍ សហស្សវត្ស ការអប់រំសម្រាប់ទាំងអស់គ្នា និងផែនការសកម្មភាពអប់រំក្រោយឆ្នាំ២០១៥ ៕
© រក្សាសិទ្ធិដោយ thmeythmey.com
