ជាតិ
នយោបាយជាតិ
លោក ជា ប៉ូច ថាលិខិតសុំដកលោកចេញពីប្រធានក្រុមការងារCNRP ជាលិខិតអនាមិក 08, Jun 2015 , 10:40 am
លោក ជា ប៉ូច នៅខាងឆ្វេងដៃ
× ភ្នំពេញ: លោក ជា ប៉ូច ប្រធានក្រុមការងារគណបក្សសង្គ្រោះជាតិ ប្រចាំខេត្តកំពត បដិសេធចំពោះលិខិតដែលស្នើសុំដករូបលោកចេញពីប្រធានក្រុមខេត្តកំពតនេះថា ជាលិខិតអនាមិកដែលមិនអាចចាត់ទុកជាផ្លូវការនោះទេ។
ប្រធានក្រុមការងារបក្សសង្គ្រោះជាតិខេត្តកំពត ដែលមានសកម្មជនបក្សដាក់លិខិតស្នើទៅកាន់ថ្នាក់ដឹកនាំគណបក្សសុំដករូបលោកចេញនោះ បានបញ្ជាក់ថា លិខិតនោះគឺមិនមានការសម្រេចណាមួយពីថ្នាក់ដឹកនាំឡើយ ដោយសារតែលិខិតមិនមានអ្នកហ៊ានចេញមុខអះអាង និងបញ្ជាក់ពីអត្តសញ្ញាណខ្លួន។ថ្លែងប្រាប់សារព័ត៌មានថ្មីៗនៅថ្ងៃចន្ទនេះ លោក ជា ប៉ូច បានបញ្ជាក់យ៉ាងខ្លីដូច្នេះថា៖«ខ្ញុំសូមមិនធ្វើអត្ថាធិប្បាយទេចំពោះលិខិតនោះ ព្រោះវាជាលិខិតអនាមិក អត់បានការទេ ដែលមានជនមិនស្គាល់មុខដាក់មកគណបក្ស ហើយមិនមានការសម្រេចឡើយ»។
នៅក្នុងលិខិតដែលលោក ជា ប៉ូច ចាត់ទុកជាអត់បានការនោះ បានដាក់ទៅលោក សម រង្ស៊ី និងលោក កឹមសុខា ដោយបញ្ជាក់ថា ការដឹកនាំរបស់លោក ជា ប៉ូច មានភាពផ្តាច់ការ អសីលធម៌ បក្ខពួកនិយម ចរិតកោងកាច ជេរប្រមាថសកម្មជនថ្នាក់មូលដ្ឋាន មិនថាចាស់មិនថាក្មេង ដែលទង្វើទាំងអស់នេះ ប្រាស់ចាកនូវក្រមសីលធម៌របស់គណបក្សសង្គ្រោះជាតិទាំងស្រុង។ ហើយកត្តាទាំងអស់នេះ អាចជំរុញឲ្យមានការបែកបាក់សាមគ្គីផ្ទៃក្នុងបក្សជាក់ជាមិនខាន ប្រសិនបើលោកប្រធាន និងលោកអនុប្រធានទុក្ខឲ្យលោក ជា ប៉ូច បន្តដឹកនាំសកម្មជនគណបក្សសង្គ្រោះជាតិខេត្តកំពតបន្តទៀត ពីព្រោះសកម្មជនគណបក្សសង្គ្រោះជាតិ និងអ្នកគាំទ្រនៅលើទឹកដីខេត្តកំពត មិនអាចទទួលយកអ្នកដឹកនាំ ដែលតាំងខ្លួនជាអធិរាជផ្តាច់ការឡើយ។
នៅក្នុងលិខិតដដែលក៏ស្នើចំនួន ២ចំណុចដល់លោកសម រង្ស៊ី និងលោកកឹមសុខា គឺ ទី១ ស្នើដកលោក ជា ប៉ូច ជាបន្ទាន់ និងទី២ ស្នើសុំឲ្យសើរើសមាសភាពថ្នាក់ដឹកនាំខេត្ត និងស្រុកឡើងវិញ ចៀសវាងមានហានិភ័យដល់គណបក្ស៕
© រក្សាសិទ្ធិដោយ thmeythmey.com