ជាតិ
អ្នកជំនួញនៅខេត្តបាត់ដំបងព្រមសហការបញ្ចុះតម្លៃ ដល់អ្នកកាន់កាត TI 08, Jun 2015 , 1:43 pm
![យុវជនអង្គការតម្លាភាពកម្ពុជាកំពុងស្វែងរកកិច្ចសហការពីម្ចាស់ស្ថាប័នឯកជនដើម្បីចូលរួមក្នុងយុទ្ធនាការប្រើប្រាស់កាត TI](https://image.thmeythmey.com/pictures/2015/06/08/thumb2/11419737_1639027043011590_402931775_n.jpg)
យុវជនអង្គការតម្លាភាពកម្ពុជាកំពុងស្វែងរកកិច្ចសហការពីម្ចាស់ស្ថាប័នឯកជនដើម្បីចូលរួមក្នុងយុទ្ធនាការប្រើប្រាស់កាត TI
×![]()
បាត់ដំបង៖ ម្ចាស់សហគ្រាស និងម្ចាស់អាជីវកម្មនៅខេត្តបាត់ដំបងសំដែងការពេញចិត្ត និងយល់ព្រមសហការបញ្ចុះតម្លៃទំនិញរបស់ពួកគេ ដល់អ្នកដែលមានកាតរបស់អង្គការតម្លាភាពកម្ពុជា (Transparency International)។
លោក ឈុំ ពុទ្ធិ ដែលជាតំណាងអោយសាកលវិទ្យាល័យអន្តរជាតិ ឌូវី បានប្រាប់អោយដឹងថា គាត់ពិតជារីករាយក្នុងការសហការជាមួយអង្គការតម្លាភាពកម្ពុជា ពីព្រោះលោកយល់ថា នេះជាការចូលរួមចំណែកមួយក្នុងការជួយសង្គមជាតិសង្គមកម្ពុជា។ លោកបានបញ្ជាក់បន្ថែមទៀតថា៖«ពេលខ្ញុំបានឃើញគម្រោងនេះខ្ញុំសប្បាយចិត្តណាស់ព្រោះវាអាចជួយសង្គមផង បានសម្រូលដល់ប្អូនៗមួយផ្នែកស្រាប់ការបញ្ចុះតម្លៃ។ ខ្ញុំសង្ឃឹមថាម្ចាស់សហគ្រាស ឬម្ចាស់អាជីវកម្មដទៃទៀតក្នុងខេត្តនឹងចូលរួមសហការជាមួយអង្គការតម្លាភាពកម្ពុជា។ ខ្ញុំរីករាយនៅពេលបានឃើញយុវជន ចេះស្អប់ខ្ពើមអំពើពុករលួយ»។
លោក លឹម វណ្ណារិទ្ធ ដែលជាម្ចាស់ក្លិប ការ៉ាត់តេដូ ខេត្តបាត់ដំបង បានប្រាប់ថា លោកពិតជាមានការត្រេកអរពេលបានឃើញមានសហការជាមួយអង្គការតម្លាភាព ហើយគាត់កំពុងពិភាក្សាជាមួយសមាជិកអំពីទំហំនៃការបញ្ចុះតម្លៃដែលក្លិបរបស់លោកអាចផ្តល់បាន? «ខ្ញុំពិតជាត្រេកអរណាស់ពេលដែលបានបញ្ចុះតម្លៃអោយយុវជនដែលមានកាតរបស់TI ព្រោះវាបានជួយដល់សង្គមម្យ៉ាងដែរ»។
ចំនែកក្រុមយុវជនរបស់អង្គការតម្លាភាពដែលជាអ្នកចុះចែកកាត និងរកដៃគូសហការបាននិយាយថា ពួកគេបានបានព្រួយបារម្ភច្រើន មុនចុះធ្វើកិច្ចការនេះ។ ពួកគេគិតថា វានឹងមានការលំបាកក្នុងការងារបញ្ចុះបញ្ចូលអាជីវករឲ្យចូលរួមសហការជាមួយអង្គការតម្លាភាពកម្ពុជា។ ផ្ទុយទៅវិញ ការងារជាក់ស្តែង វាមិនដូចការគិតរបស់ពួកគេឡើយ។
សមាជិកក្រុមការងារម្នាក់បានថ្លែងយ៉ាងដូច្នេះថា៖«មុនដំបូងពួកខ្ញុំគិតថា វាលំបាក។ តែពេលបានចុះធ្វើការ ពួកគាត់មិនបដិសេធទេ។ ប៉ុន្មានថ្ងៃចុងក្រោយនេះ ខ្ញុំបានទៅជួបក្រុមហ៊ុនចំនួន៥ ដែលបានព្រមសហការជាមួយយើងទាំងអស់។ ពួកខ្ញុំរំពឹងទុកថា យើងនឹងអាចរកបាន៦ក្រុមហ៊ុនទៀត»។
គួរបញ្ជាក់ផងដែលថា គម្រោងចែកកាត និងរកដៃគូសហការបញ្ចុះតម្លៃដល់អ្នកដែលមានកាតTI គឺចែកកាតដែលមានលេខទំនាក់ទំនងរាយការណ៍អំពើពុករលួយ អោយដល់ពលរដ្ឋ ១០០០កាត រួមទាំងរកសហគ្រាស ដើម្បីបញ្ចុះតម្លៃអោយបានតិចបំផុត២០ក្រុមហ៊ុន៕
© រក្សាសិទ្ធិដោយ thmeythmey.com