កីឡាជាតិ
ជាតិ
ស៊ីហ្គេម៖ U-23 កម្ពុជាប៉ះម្ចាស់ផ្ទះសឹង្ហបុរីនាវេលាម៉ោង៧ និង៣០នាទីល្ងាចនេះ 08, Jun 2015 , 2:52 pm
× ក្រុមកីឡាបាល់ទាត់ជម្រើសអាយុក្រោម២៣ឆ្នាំកម្ពុជា (U-23) ត្រូវប៉ះម្ចាស់ផ្ទះសឹង្ហបុរីនាវេលាម៉ោង៧ និង៣០នាទី ល្ងាចថ្ងៃចន្ទ ទី៨ ខែមិថុនា នេះ នៅកីឡដ្ឋាន Jalan Besar សម្រាប់ការប្រកួតលើកទីបីពូល A នៃព្រឹត្តិការណ៍កីឡាស៊ីហ្គេមលើកទី២៨ ។
ខណៈមីយ៉ាន់ម៉ារកំពុងនាំមុខគេលើតារាងជាមួយនឹងជ័យជម្នះទាំងបីប្រកួតក្នុងពូលនោះ កម្ពុជា និងសឹង្ហបុរី ត្រូវការជ័យជម្នះជាចាំបាច់រៀងៗខ្លួន ខណៈក្រុមទាំងពីរសុទ្ធតែមាន៣ពិន្ទុក្នុងដៃស្មើឥណ្ឌូនេស៊ី។ U-23 កម្ពុជា ក្រោមការដឹកនាំរបស់គ្រូបង្វឹកកូរ៉េខាងត្បូង Lee Tae Hoon បានទទួលជ័យជម្នះ ៣-១ លើហ្វីលីពីនក្នុងការប្រកួតដំបូង ប៉ុន្តែបានចាញ់ឥណ្ឌូនេស៊ីរហូតដល់ទៅ ៦-១ កាលពីថ្ងៃសៅរ ទី៦ ខែមិថុនា ខណៈសឹង្ហបុរីឈ្នះហ្វីលីពីន ១-០ និងចាញ់មីយ៉ាន់ម៉ារ ២-១ ។
យោងតាមកំណត់ត្រាប្រកួតកន្លងមក កម្ពុជា មិនដែលធ្លាប់មានប្រវត្តិឈ្នះសឹង្ហបុរី ឬក៏ជាម្ចាស់ផ្ទះនោះឡើយក្នុងព្រឹត្តិការណ៍កីឡាស៊ីហ្គេម។ ក្នុងជំនួបទាំង៥លើកកន្លងមក សឹង្ហបុរីទទួលបានជ័យជម្នះទាំងអស់ ហើយជំនួបចុងក្រោយ កាលពីឆ្នាំ២០១១ សឹង្ហបុរីឈ្នះក្នុងលទ្ធផល ២-១ ដោយ ខ្សែបម្រើ ឈិន ឈឿន ជាអ្នករកបានមួយគ្រាប់ឲ្យកម្ពុជា។ សម្រាប់ជំនួបជាមួយក្រុមជាម្ចាស់ផ្ទះវិញ កម្ពុជាធ្លាប់ចាញ់៥លើក និងស្មើ១លើក៕
© រក្សាសិទ្ធិដោយ thmeythmey.com