ជាតិ
វគ្គបញ្ជ្រាបការប្រឆាំងអំពើពុករលួយ ធ្វើទៅដោយរលូនក្នុងវិទ្យាល័យ ត្បែង 08, Jun 2015 , 3:48 pm
× កំពង់ធំ៖ នៅក្នុងឆ្នាំសិក្សា២០១៤-២០១៥នេះ ក្រសួងអប់រំបានបញ្ចូលកម្មវិធីបញ្ជ្រាបការយល់ដឹងពីបញ្ហាពុករលួយតាមវិទ្យានានាទូទាំងប្រទេស។ ដោយឡែកវិទ្យាល័យ ហ៊ុន សែន ត្បែង បានផ្សព្វផ្សាយពីការប្រឆាំងអំពើពុករលួយទៅសិស្សានុសិស្សខ្លួនដោយរលូន ស្របទៅតាមគោលការណ៍របស់ក្រសួងអប់រំ។
តាមការកំណត់របស់ក្រសួង កម្មវិធីថ្មីដែលបញ្ចូលមេរៀនអំពើពុករលួយ ត្រូវបង្រៀនដោយអ្នក លោកគ្រូមានឯកទេសក្នុងមុខវិជ្ជា សីលធម៌-ពលរដ្ឋ។ ម្យ៉ាងទៀត ការបញ្ជ្រាបនេះដែរ ត្រូវបែងចែក ជាពីរជំពូក ដែលក្នុងមួយជំពូកមានពីរមេរៀន។ តាមការបែងចែក ជំពូក១ ត្រូវបង្រៀន ក្នុងឆមាសទី១ ហើយជំពូកទី២ នឹងត្រូវបញ្ចប់ក្នុងឆមាសទី២ដែរ។
អ្នកគ្រូ ហុង សុមិច មានប្រសាសន៍ថា ក្រសួងអប់រំបានតម្រូវឲ្យមានការបង្រៀនមុខវិជ្ជានេះ នៅថ្នាក់ទី១០ ទី១១ និងទី១២ ដោយក្នុងកម្រិតនីមួយៗត្រូវមាន៤មេរៀនផ្សេងៗគ្នា។
នៅក្នុងការបង្រៀននេះដែរ អ្នកគ្រូសង្កេតឃើញថា សិស្សរបស់គាត់អាចយល់ដឹងច្រើនពីអត្ថន័យ ខ្លឹមសារមេរៀន ដែលធ្វើឱ្យពួកគេដឹងអ្វីជាអំពើខុសឆ្គង នៅក្នុងការប្រព្រឹត្តិអំពើពុករលួយ។ អ្នកគ្រូក៏បានបញ្ជាក់ផងដែរថា សម្រាប់មេរៀនប្រឆាំងនឹងអំពើពុករលួយនេះ វាគឺជំហានសាកល្បងថ្មី១ ដូច្នេះ គឺគ្រាន់តែឱ្យពួកគេយល់ និងដឹងពីអ្វីជាអំពើពុករលួយតាមរយៈរូបភាពផ្សេងៗ ។ តាមការបញ្ជាក់របស់អ្នកគ្រូ សុមិច បើទោះបីជាអ្នកគ្រូបានប្រាប់ថា សាកល្បងប្រាប់សិស្សរបស់អ្នកគ្រូអំពីការលាក់អត្តសញ្ញាណនៃអ្នករាយការណ៍ករណីអំពើពុករលួយក៏ដោយនោះ សិស្សរបស់អ្នកគ្រូបានបង្ហាញអំពីការរារែកក្នុងការរាយការណ៍ករណីពុករលួយ ប្រសិនបើពួកគេជួបប្រទះករណីពុករលួយ។
ប៉ុន្តែវាច្បាស់ណាស់ថា សិស្សដែលបានរៀនមេរៀននេះ ពិតជាបានយល់ហើយអំពីផលប៉ះពាល់នៃអំពើពុករលួយនោះ។ យុវសិស្សឈ្មោះ ជាង អ៊ុំ សិស្សថ្នាក់ទី១១នៃវិទ្យាល័យត្បែងបានប្រាប់សារព័ត៌មានថ្មីៗ យ៉ាងដូច្នេះថា៖«ក្រោយពីខ្ញុំបានរៀនចប់ ខ្ញុំបានយល់ដឹងច្បាស់ពីអំពើពុករលួយ។ មានអំពើពុករលួយ វានឹងមានអំពើអយុត្តិធម៌»។ ប្អូនប្រុស ជាង អ៊ុំ បន្តថា គេត្រូវនាំគ្នាបំបាត់នូវភាពអយុត្តិធម៌ ដែលមនុស្សម្នាក់ៗមិនចង់បាន។ នៅពេលដែលអ្នកសារព័ត៌មានសួរប្អូនប្រុស ជាង អ៊ុំ ថាតើអំពើពុករលួយអាចកើតឡើងនៅទីណាខ្លះនោះ យុវសិស្សរូបនេះឆ្លើយថា ករណីពុករលួយអាចកើតនៅគ្រប់ទីកន្លែងដូចជាក្នុងសាលារៀន ដែលសិស្សសូកប៉ាន់គ្រូ ដើម្បីទទួលបានពិន្ទុច្រើន នៅក្នុងករណីគ្រោះថ្នាក់ចរាចរណ៍ ដែលប៉ូលីសផ្តល់ហេតុផលឲ្យតែអ្នកដែលផ្តល់លុយសំណូកឲ្យខ្លួនជាដើម៕
© រក្សាសិទ្ធិដោយ thmeythmey.com