ជាតិ
បទវិភាគ
លោក ជា ស៊ីម, ជាអ្នករំដោះជាតិ, ជាអ្នករក្សាសន្តិភាព និងជាអ្នកអភិវឌ្ឍន៍ប្រទេសជាតិ 08, Jun 2015 , 8:00 pm
× ភ្នំពេញ៖ ក្រោយការដួលរលំនៃរបបប៉ុលពតឆ្នាំ១៩៧៩ មេដឹកនាំគណបក្សប្រជាជនកម្ពុជាចំនួន៣រូប គឺលោក ជា ស៊ីម លោក ហ៊ុន សែន និងលោក ហេង សំរិន ទទួលបានប្រជាប្រិយភាពយ៉ាងខ្លាំងនៅក្នុងចំណោមមហាជន និងនៅក្នុងគណបក្សប្រជាជនកម្ពុជា។ ប្រជាប្រិយភាពនៃបុគ្គលទាំងបីនេះ បានធ្វើអោយគណបក្សប្រជាជនកម្ពុជាទទួលជ័យជន្នះនៅរាល់ការបោះឆ្នោត លើកលែងតែការបោះឆ្នោតឆ្នាំ១៩៩៣មួយចេញ។ នៅពេលនេះ លោក ជា ស៊ីម ប្រធានគណបក្សប្រជាជនកម្ពុជា និងជាប្រធានព្រឹទ្ធសភាបានលាចាកលោកហើយ តើការបាត់បង់លោក ជា ស៊ីម អាចប៉ះពាល់ប្រជាប្រិយភាពបក្សប្រជាជនកម្ពុជាឬទេនាពេលអនាគត?
ការបាត់បង់លោក ជា ស៊ីម គឺជាការបាត់បង់អ្នកតស៊ូរំដោះជាតិមាតុកម្ពុជាដ៏អង់អាចក្លាហានម្នាក់។ នៅក្នុងបេះដូងប្រជាពលរដ្ឋខ្មែរ លោក ជា ស៊ីម គឺជាអ្នកសង្គ្រោះជីវិតពលរដ្ឋខ្មែរអោយចេញពីរបបអាវខ្មៅប៉ុលពតខ្មែរក្រហម។
គ្មានវត្តមានលោក ជា ស៊ីម ក្នុងការរំដោះជាតិនៅឆ្នាំ១៩៧៩ទេ ពលរដ្ឋខ្មែរជាច្រើននាក់ថែមទៀត អាចត្រូវបានខ្មែរក្រហមសម្លាប់ចោលបន្ថែមទៀត។ និយាយអោយសាមញ្ញ មានន័យថា លោក ជា ស៊ីម គឺជាអ្នករំដោះជាតិអោយចេញពីរបបប្រល័យពូជសាសន៍ប៉ុលពត ជាអ្នករក្សាសន្តិភាព និងជាអ្នកអភិវឌ្ឍន៍ប្រទេសជាតិក្នុងរយៈពេល៣៥ឆ្នាំចុងក្រោយនេះ។ លោក ជា ស៊ីម ក្នុងនាមជាប្រធានគណបក្ស និងក្នុងនាមជាប្រធានព្រឹទ្ធសភាមិនសូវចេញមុខជាសាធារណៈដូចលោកនាយករដ្ឋមន្ត្រី ហ៊ុន សែន ឬលោក ហេង សំរិន មែន។ ប៉ុន្តែ ប្រជាប្រិយភាពរបស់លោកបានដក់ជាប់នៅក្នុងក្រអៅបេះដូងនៃប្រជាពលរដ្ឋខ្មែរភាគច្រើន។
តើការបាត់បង់រូបលោក ជា ស៊ីម នៅពេលនេះអាចប៉ះពាល់ប្រជាប្រិយភាពគណបក្សប្រជាជនកម្ពុជាឬទេ? អ្នកវិភាគមួយចំនួនបានអត្ថាធិប្បាយថា គណបក្សប្រជាជនកម្ពុជាមានធនធានមនុស្សច្រើនដើម្បីដឹកនាំគណបក្សបន្ត មានទាំងធនធានមនុស្សវ័យចំណាស់ និងធនធានមនុស្សវ័យក្មេង។ ដូច្នេះ ការបាត់បង់រូបលោក ជា ស៊ីម មិនមានអ្វីប៉ះពាល់ប្រជាប្រិយភាពនៃគណបក្សប្រជាជនកម្ពុជាឡើយ។ តែទោះជាយ៉ាងនេះក្តី ក៏អ្នកវិភាគមួយចំនួនផ្សេងទៀត អត្ថាធិប្បាយថា ការបាត់បង់ឥស្សរជនកំពូលរបស់គណបក្សប្រជាជនកម្ពុជារូបនេះ ក៏ជាក្តីបារម្ភមួយដែរសម្រាប់ប្រជាប្រិយភាពនៃគណបក្សប្រជាជនកម្ពុជានាពេលអនាគត៕
© រក្សាសិទ្ធិដោយ thmeythmey.com