ជាតិ
សង្គមជាតិ
ខ្មែរក្រោមមិនអាចបញ្ចប់ការចម្លងឯកសារទាក់ទងដីកម្ពុជាក្រោមជាង ៥ពាន់ទំព័រត្រឹមខែមិថុនានេះទេ 11, Jun 2015 , 9:33 am
![](https://image.thmeythmey.com/pictures/2015/06/11/thumb2/116201593328852015114301phearun.jpg)
×![]()
ភ្នំពេញ៖ សហគមន៍ខ្មែរកម្ពុជាមិនអាចថតចម្លងឯកសារប្រវត្តិសាស្ត្រជាង ៥ពាន់ទំព័រ ដែលទាក់ទងនឹងអាណានិគមនិយមបារាំងកាត់ទឹកដីខ្មែរក្រោមឲ្យវៀតណាមក្នុងអំឡុង ឆ្នាំ១៩៤៩ តាមការគ្រោងទុកត្រឹមខែមិថុនានេះទេ ដោយសារតែសហគមន៍នៅខ្វះខាតថវិកា និងត្រូវការពេលវេលាបន្ថែមទៀតដើម្បីរៀបចំការថតចម្លង។ នេះបើតាមប្រសាសន៍បញ្ជាក់របស់លោក ថាច់ សេដ្ឋា។
ឯកសារប្រវត្តិសាស្ត្រជាង ៥ពាន់ទំព័រ ត្រូវបានសហគមន៍ខ្មែរកម្ពុជាក្រោម និងសម្ព័ន្ធយុវជនខ្មែរដើម្បីប្រជាធិបតេយ្យស្រាវជ្រាវរកឃើញនៅក្នុងបណ្ណាសារដ្ឋានជាតិបារាំងហើយបច្ចុប្បន្ននេះ ពួកគេបានថតចម្លងរួចជាងពាក់កណ្តាលផង។ ប៉ុន្តែយ៉ាងណា ពួកគេមិនបញ្ចប់ ការថតចម្លងដូចការគ្រោងទុកត្រឹមខែមិថុនា នេះទេ។
ប្រធានសហគមន៍ខ្មែរកម្ពុជាក្រោមលោក ថាច់ សេដ្ឋា មានប្រសាសន៍ថា សមាគមលោកបាននិងកំពុងខ្នះខ្នែងរៀបចំថតចម្លងឯកសារនោះរួច ជាងពាក់កណ្តាល ហើយថា ការថតចម្លង នឹងបញ្ចប់យឺតពេលបន្តិច ដោយសារសមាគមត្រូវការប្រមូលថវិកាបន្ថែមទៀត។ លោកបញ្ជាក់ថា៖« សមាគមខ្មែរកម្ពុជានឹងបញ្ចប់ការថត ចម្លងនៅពាក់កណ្តាលខែកក្កដា ឆ្នាំ២០១៥នេះ។
ខ្ញុំនឹងទៅប្រទេសបារាំងនៅចុងខែមិថុនា ដើម្បីទៅចូលរួមរៀបចំបញ្ចប់ថតចម្លង ហើយខ្ញុំនឹងទៅចូលរួមរៀបចំបុណ្យផ្កាសាមគ្គី ដើម្បីរៃអង្គាសថវិកាយកមកបង្គ្រប់ក្នុងការថតចម្លង»។
សមាគមខ្មែរក្រោមត្រូវការថវិកាចំនួន ១២៥០០អឺរ៉ូ ស្មើនឹង ១៣០០០ដុល្លារអាមេរិក ដើម្បីថតចម្លងឯកសារសំខាន់ៗ ដែលទាក់ទងនឹងទឹកដីកម្ពុជាក្រោមជាង ៥ពាន់ទំព័រនៅក្នុងប្រទេសបារាំងនោះ។ ប៉ុន្តែ មកទល់ពេលនេះ សមាគមខ្មែរក្រោមពុំទាន់មានថវិកាគ្រប់គ្រាន់ទេ។ «យើងនៅខ្វះថវិកាជាង ៨ពាន់អឺរ៉ូ ស្មើនឹងជាង ៩ពាន់ដុល្លារបន្ថែមទៀត ដើម្បីថតចម្លងឯកសារទាំងអស់។ ហើយពេលនេះ យើងថតបានចំនួន ២២៣១ទំព័រហើយដែរ »។ នេះជាប្រសាសន៍បញ្ជាក់របស់ប្រធានសមាគមខ្មែរកម្ពុជាក្រោម។
លោក ថាច់ សេដ្ឋា ក៏បានអំពាវនាវដល់ប្រជាពលរដ្ឋទាំងក្នុង និងក្រៅប្រទេស ជួយចូលរួមថវិកា ក្នុងការថតចម្លងនេះ។ លោកថា៖«ខ្ញុំសូមថ្វាយបង្គំព្រះសង្ឃ ជូនបងប្អូនជនរួមជាតិ សុំជួយចូលរួមជាថវិកា ទោះ១រៀល ២រៀលក្តី ដើម្បីជួយថតចម្លងឯកសារប្រវត្តិសាស្ត្រយើង»។
គួរបញ្ជាក់ថា ឯកសារសំខាន់ៗ ទាក់ទងនឹងទឹកដីកម្ពុជាក្រោមប្រមាណ៥ពាន់ទំព័រនោះត្រូវបាន សហគមន៍ខ្មែរកម្ពុជាក្រោម និងសម្ព័ន្ធយុវជនខ្មែរដើម្បីលទ្ធិប្រជាធិបតេយ្យរកឃើញនៅក្នុងបណ្ណា សារដ្ឋានជាតិបារាំង នៅខេត្តអេអង់ប្រូវ៉ង់ (Aix-en-Provence) តាមរយៈការណែនាំរបស់ស្ថានទូតបារាំងប្រចាំនៅកម្ពុជា។
ឯកសារទាំងនោះ រួមមាន ព្រះរាជសារព្រះករុណាព្រះបាទនរោត្តមផ្ញើរទៅរដ្ឋាភិបាលបារាំង កិច្ចព្រមព្រៀងបារាំងវៀតណាមនៅឆកសមុទ្រហាឡុង នៅដាឡាត់ និងនៅហ្វុងតេនណឺប្លូ ជាដើម។ ជាងនេះទៀត ខ្មែរក្រោមក៏រកឃើញកំណត់ហេតុប្រជុំសភាបារាំងក្នុងការកាត់ទឹកដី ខ្មែរឲ្យវៀតណាមថ្ងៃទី០៤ មិថុនា ឆ្នាំ១៩៤៩ សន្ធិសញ្ញាបារាំងវៀតណាម និងកំណត់ហេតុចរចាផ្សេងៗ ព្រមទាំងលិខិតឆ្លងឆ្លើយសម្ងាត់ដែលទាក់ទងនឹងការកាត់ផ្ទេរទឹកដី ខ្មែរឲ្យវៀតណាមផងដែរ។
បើតាមលោក ថាច់ សេដ្ឋា បន្ទាប់ពីបញ្ចប់ការថតចម្លងសហគមន៍ខ្មែរកម្ពុជាក្រោមនឹងធ្វើ ការបកប្រែជាផ្លូវការនូវឯកសារទាំងនោះពីភាសាបារាំងមកជាភាសាខ្មែរ និងអង់គ្លេស។ រួចហើយ ពួកគេនឹងដាក់ជូនទៅកាន់ក្រសួងអប់រំដើម្បីស្នើសុំបញ្ចូលក្នុង កម្មវិធីសិក្សាតម្កល់នៅរាជ្យបណ្ឌិតសភាកម្ពុជា និងអង្គការយូណេស្តូដើម្បីរក្សាទុកជាប្រវត្តិសាស្ត្រជាតិទៀតផង៕
© រក្សាសិទ្ធិដោយ thmeythmey.com