ជាតិ
សង្គមជាតិ
គ្មានការផ្សាយផ្ទាល់ពី ពិធីដង្ហែសពលោក ជា ស៊ីម ឡើយ 11, Jun 2015 , 10:01 am
![រូបថត៖ AKP](https://image.thmeythmey.com/pictures/2015/06/11/thumb2/akp-kanharith.jpg)
រូបថត៖ AKP
×![]()
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ដែលជាសមាជិកនៃគណៈកម្មការរៀបចំបុណ្យសពលោក ជា ស៊ីម បានជំនុំមន្ត្រីរបស់ខ្លួននៅថ្ងៃទី១០មិថុនា ដើម្បីរៀបចំការផ្សព្វផ្សាយអំពីពិធីដង្ហែសព លោក ជា ស៊ីម។ ប៉ុន្តែថា វានឹងមិនមានការផ្សាយផ្ទាល់តាមទូរទស្សន៍ និងវិទ្យុជាតិនោះឡើយ។
មិនមានការផ្សាយផ្ទាល់អំពីពិធីដង្ហែសព និងពិធីបូជាសពលោក ជា ស៊ីម នៅតាមប្រព័ន្ធផ្សព្វផ្សាយរបស់ជាតិនោះទេ។ ប៉ុន្តែការងាររបស់ទូរទស្សន៍ និងវិទ្យុជាតិ ត្រូវផ្តិតយករាល់សកម្មភាពនៃពិធីនៅថ្ងៃទី១៩មិថុនានោះទាំងអស់ ដើម្បីការចាក់ផ្សាយទាំងស្រុងនៅយប់ថ្ងៃទី១៩មិថុនានោះ។ នេះបើតាមការទីភ្នាក់ងារព័ត៌មានកម្ពុជា AKP ដែលបានស្រង់ប្រសាសន៍របស់លោករដ្ឋមន្ត្រី ខៀវ កាញារីទ្ធ។
លោករដ្ឋមន្ត្រីបានពន្យល់មន្ត្រីទទួលបន្ទុកការផ្សព្វផ្សាយនៅក្នុងកិច្ចប្រជុំមួយនៅថ្ងៃទី១០មិថុនាយ៉ាងដូច្នេះថា៖«ពិធីដង្ហែ និងបុណ្យបូជាសពរបស់សម្តេចអគ្គមហាធម្មពោធិសាល ជា ស៊ីម នឹងប្រារព្ធធ្វើត្រឹមតែ៤០% នៃព្រះរាជពិធីបុណ្យព្រះបរមសព ព្រះករុណា «ព្រះបរមរតនកោដ្ឋ»ប៉ុណ្ណោះ។មានពិធីដង្ហែជាក្បួននិងផែនផ្សេងៗដូចគ្នា ប៉ុន្តែត្រូវកាត់បន្ថយចំនួនមនុស្សដង្ហែនៅតិចជាង»។
ថ្វីដ្បិតវាមិនមានការផ្សាយផ្ទាល់មែន ក្រុមការងាររបស់ទូរទស្សន៍ និងវិទ្យុជាតិត្រូវធ្វើប្រមូលរូបភាពឲ្យបានច្រើន និងបានល្អ ដើម្បីទុកជាឯកសាររបស់ជាតិ។ នេះបើតាមការពន្យល់របស់លោករដ្ឋមន្ត្រីក្រសួងព័ត៌មាន ដែលបន្ថែមថា៖ «ម្យ៉ាងទៀតគឺដើម្បីអាចផ្សព្វផ្សាយឱ្យប្រជាជនបានដឹងថា តើពិធីបុណ្យសម្រាប់ថ្នាក់ដឹកនាំប្រទេសជាតិនីមួយៗធ្វើឡើងត្រឹមកម្រិតណាខ្លះ? ហើយមានលក្ខណៈយ៉ាងណាខ្លះ»?
យោងតាមAKP ដដែល លោករដ្ឋមន្ត្រីបានប្រាប់មន្ត្រីក្រសួងព័ត៌មានជួយសម្របសសម្រួលផ្តល់ភាពងាយស្រួលដល់អ្នកសារព័ត៌មានទូទៅ ដើម្បីពួកគេអាចយកព័ត៌មាន និងផ្តិតយករូបភាពនៃពិធីដង្ហែ និងពិធីបូជាសពនោះ។
ចំណែកឯលោក ម៉ៅ អាយុទ្ធ ដែលជារដ្ឋលេខាធិការក្រសួងព័ត៌មាន និងជាប្រធានសមាគមទូរទស្សន៍កម្ពុជាវិញ នឹងត្រូវតាមដានស្ថានីយទូរទស្សន៍ទាំងអស់ ដើម្បីកុំឲ្យពួកគេចាក់ផ្សាយកម្មវិធីសប្បាយរីករាយ និងមិនឲ្យពិធីករ ពិធីការិនីស្លៀកពាក់ឆើតឆាយហួសធម្មតា៕
ប្រភព៖ AKP
© រក្សាសិទ្ធិដោយ thmeythmey.com