ជាតិ
នយោបាយជាតិ
លោក សម រង្ស៊ី ប្ដេជ្ញាគោរពតាមបណ្ដាំចុងក្រោយលោក ជា ស៊ីម 11, Jun 2015 , 11:00 am
![](https://image.thmeythmey.com/pictures/2015/06/11/thumb2/1162015110213sam_rainsy.png)
×![]()
ប្រធានគណបក្សសង្គ្រោះជាតិ លោក សម រង្ស៊ី ប្ដេជ្ញាថា រូបលោកនឹងអនុវត្តតាមបណ្ដាំរបស់លោក ជា ស៊ីម ដែលបានផ្ដាំលោកជាលើកចុងក្រោយ កាលពីចុងឆ្នាំ២០១៤កន្លងមក។ លោកសម រង្ស៊ី បញ្ជាក់ពីបណ្ដាំដែល លោក ជា ស៊ីមប្រាប់ខ្លួនថា ឲ្យអ្នកស្នេហាជាតិទាំងអស់រួបរួមគ្នា ដើម្បីការពារទឹកដី និងរៀបចំប្រទេសកម្ពុជាឲ្យបានល្អ ក្លាយជាប្រទេសរីកចម្រើន។
ក្នុងពិធីគោរពវិញ្ញាណក្ខន្ធលោក ជា ស៊ីម ប្រធានគណបក្សប្រជាជនកម្ពុជា និងជាប្រធានព្រឹទ្ធសភា នៅព្រឹកថ្ងៃទី១១ មិថុនានេះ លោក សម រង្ស៊ី បានបញ្ជាក់យ៉ាងនេះថា៖«ខ្ញុំតែងតែគោរពសម្ដេច ជា ស៊ីម ជានិច្ច ក្រោយពីការបោះឆ្នោតឆ្នាំ១៩៩៣ ។ខ្ញុំបានតាមដាន ហើយគាំទ្រជំហរសម្ដេច ជា ស៊ីម គាំទ្រដោយដឹងគុណ ពីព្រោះសម្ដេច ជា ស៊ីម តែងតែលើកតម្កើង ការបង្រួបបង្រួមជាតិ ការផ្សះផ្សាជាតិយ៉ាងស្មោះត្រង់។ ចង់ឲ្យខ្មែរយើងចេះស្រលាញ់គ្នា ដើម្បីការពារផលប្រយោជន៍ជាតិជាមួយគ្នា។ នេះជាឧត្តមគតិរបស់យើងទាំងអស់គ្នា ហើយយើងមិនភ្លេចបណ្ដាំសម្ដេច ជា ស៊ីម ទេ យើងនឹងធ្វើតាមបណ្ដាំរបស់លោក»។
សូមស្ដាប់សំឡេង៖
ការគោរពវិញ្ញាណក្ខន្ធ លោក ជា ស៊ីម ប្រធានគណបក្សប្រជាជនកម្ពុជាជាផ្លូវការ បានចាប់ផ្តើមពីព្រឹកថ្ងៃទី១០មិថុនា រហូតដល់ថ្ងៃទី១៨មិថុនា។ព្រះមហាក្សត្រ សម្ដេចព្រះ នរោត្តម សហមុនី និងសម្ដេចម៉ែ បានយាងទៅគោរពវិញ្ញាណក្ខន្ធលោក ជា ស៊ីម នៅព្រឹកថ្ងៃទី១០មិថុនា។ បន្តបន្ទាប់មករហូតដល់ថ្ងៃទី១៨មិថុនា គឺប្រតិភូអង្គទូតនានាប្រចាំនៅកម្ពុជា និងថ្នាក់ដឹកនាំក្រសួងស្ថាប័នរដ្ឋ ថ្នាក់ដឹកនាំខេត្តរាជធានី។ ចំណែកនៅថ្ងៃទី១៩ មិថុនា ជាថ្ងៃបូជាសពរបស់ លោក ជា ស៊ីម នៅលើទីធ្លាសួនច្បារមុខវត្តបទុមវត្តី៕
© រក្សាសិទ្ធិដោយ thmeythmey.com