ជាតិ
ភ្នំពេញនឹងស្ងាត់នៅល្ងាចនេះ 11, Jun 2015 , 2:22 pm
× នៅលើគ្រប់គណនីហ្វ៊េសប៊ុក មានតែការបង្ហាញសំបុត្រចូលទស្សនាការប្រកួតបាល់ទាត់ រវាងកម្ពុជា និងសិង្ហបុរី ក្នុងការប្រកួតជម្រុះជុំទីពីរប្រចាំតំបន់អាស៊ី ក្នុងដំណើរឆ្ពោះទៅកាន់ព្រឹត្តិការណ៍ World Cup ឆ្នាំ២០១៨ ។ មានតែការបបួលគ្នាឲ្យបានកាន់តែច្រើន ដើម្បីទៅទស្សនាការប្រកួតបាល់ទាត់ និងគាំទ្រក្រុមកីឡាករបាល់ទាត់ជម្រើសជាតិខ្មែរ។
នៅតាមកន្លែងធ្វើការវិញ បុគ្គលិកស្ទើរតែទាំងអស់ ទាំងប្រុស ទាំងស្រីក៏រំឮកគ្នាឲ្យប្រញាប់បញ្ចប់ការងារឲ្យបានលឿន ដើម្បីពួកគេអាចចេញពីកន្លែងធ្វើការឲ្យបានឆាប់។
និយាយពីនិស្សិតដែលមានថ្នាក់ពេលល្ងាចនេះវិញ ច្បាស់ណាស់ ពួកគេនឹងមិនទៅសាកលវិទ្យាល័យទេ ប៉ុន្តែពួកគេនឹងទៅពហុកីឡដ្ឋានជាតិអូឡាំពិក។ ក្រុមនិស្សិតបានបបួលគ្នារួចហើយ ដើម្បីទៅជួយស្រែកគាំទ្រក្រុមជម្រើសជាតិរបស់ពួកគេ។
ល្ងាចនេះ ជុំវិញពហុកីឡដ្ឋានជាតិអូឡាំពិកនឹងត្រូវកកស្ទះ កកកុញ ដោយសារយានយន្តរបស់អ្នកទស្សនាការប្រកួតបាល់ទាត់កម្ពុជាសិង្ហបុរី ជម្រុះជុំទី២ប្រចាំតំបន់អាស៊ី ក្នុងដំណើរឆ្ពោះទៅកាន់ព្រឹត្តិការណ៍ World Cup។
តាមដងផ្លូវក្នុងរាជធានី អាចនឹងស្ងាត់ជាងសព្វដង ដោយសារតែមនុស្សជាច្រើន បើទោះជាមិនបានទៅទស្សនាការប្រកួតដោយផ្ទាល់នៅកីឡដ្ឋាននោះទេ ក៏ពួកគេនឹងប្រញាប់ទៅគេហដ្ឋានដើម្បីទស្សនាការផ្សាយផ្ទាល់ និងទស្សនាជុំគ្នានៅទីកន្លែងសាធារណៈ នៅតាមអាហារដ្ឋាននានា៕
© រក្សាសិទ្ធិដោយ thmeythmey.com