ជាតិ
កូរ៉េរៀបចំព្រឹត្តិការណ៍ប្រគុំតន្ត្រី Classic Concert2015 នៅកម្ពុជា នាថ្ងៃ២០ ខាងមុខ
12, Jun 2015 , 8:19 am
×![]()
ដោយ: ថ្មីៗ
ភ្នំពេញ៖ ស្ថានទូតសាធារណៈរដ្ឋកូរ៉េប្រចាំនៅកម្ពុជានឹងរៀបចំព្រឹត្តិការណ៍តន្រី្ត Classic Concert2015ពិសេសមួយ ក្នុងគោលបំណងពង្រឹងទំនាក់ទំនងមិត្តភាពកូរ៉េ កម្ពុជា។ សិល្បករ សិល្បការិនីរបស់កូរ៉េជាច្រើនរូប នឹងរួមគ្នាបង្ហាញសមត្ថភាពជំនាញរបស់ពួកគេទៅកាន់មហាជនកម្ពុជាទាំងអស់ តាមរយៈការចូល ទស្សនាផ្ទាល់ ក៏ដូចជាទស្សនាតាមកញ្ចក់ទូរទស្សន៍។ ព្រឹត្តិការណ៍ប្រគុំតន្ត្រីនេះ នឹងប្រព្រឹត្តិទៅចាប់ពីម៉ោង ៦កន្លះរសៀលថ្ងៃទី២០ ខែមិថុនា ឆ្នាំ២០១៥ នាមជ្ឈមណ្ឌលសហប្រតិបត្តិការកម្ពុជា កូរ៉េ (CKCC) ស្ថិតក្នុងសាកលវិទ្យាល័យភូមិន្ទភ្នំពេញ (RUPP)។
ព្រឹត្តិការណ៍ Classic Concert2015 ដែលរៀបចំឡើងដោយស្ថានទូតកូរ៉េនេះ ទទួលបានឧបត្ថម្ភថវិកាពី មូលនិធិកូរ៉េ (Korea Foundation) ព្រមទាំងទទួលបានកិច្ចសហការពីសិល្បករកូរ៉េនៅកម្ពុជា។ បើតាម សេចក្តីប្រកាសព័ត៌មានរបស់ស្ថានទូតកូរ៉េប្រចាំកម្ពុជា សិល្បករ សិល្បការិនី តន្ត្រីករល្បីៗមកពីប្រទេស កូរ៉េនឹងរួមគ្នាប្រគុំតន្ត្រី ព្រមទាំងសម្តែងសិល្បៈ ជាច្រើនប្រភេទក្នុងព្រឹត្តិការណ៍នេះ ក្នុងនោះ រួមមាន តន្ត្រីករ Soprano, Piano, Cello និងតន្ត្រីករក្លាស៊ីកដ៏ល្បីជា Idol មកពី Uanglevioceរបស់កូរ៉េទៀតផង។
ការប្រគុំតន្ត្រីនេះ មិនមែនបើកទស្សនាសម្រាប់តែសិស្ស និស្សិត និងប្រជាជនទូទៅនោះទេ ស្ថានទូតកូរ៉េក៏បានសហការជាមួយអង្គការជួយជនងាយរងគ្រោះមួយចំនួន ដើម្បីឲ្យពួកគេបានចូល ទស្សនាដែរ ក្នុងនោះ រួមមាន អង្គការគ្រួសារថ្មី អង្គការ The Blind និងThe Underprivileged Children ជាដើម។ ជាងនេះទៀត កម្មករ កម្មការិនីដែលធ្វើការនៅរោងចក្រកូរ៉េនៅកម្ពុជា ក៏ត្រូវបានអញ្ជើញឲ្យ ចូលរួមទស្សនាការប្រគុំតន្រី្តផង។ ព្រឹត្តិការណ៍ប្រគុំតន្ត្រីនេះ ក៏នឹងត្រូវចាក់ផ្សាយនៅលើកញ្ចក់ស្ថានីយ ទូរទស្សន៍ជាតិកម្ពុជា (TVK) ដើម្បីប្រជាជនទូទាំងប្រទេសបានទស្សនាទៀតផង។
ការប្រគុំតន្ត្រីក្នុងគោលបំណងរឹតចំណងមិត្តភាពនេះ ស្ថានទូតកូរ៉េ បានសរសរបញ្ជាក់ថា៖«យើងជឿជាក់ ថា ការប្រគុំតន្រី្តលើកនេះ នឹងក្លាយជាឱកាសរួម ចំណែកដល់ការពង្រឹងចំណងមិត្តភាពរវាងប្រទេសកូរ៉េ និងកម្ពុជា»។
ជាមួយគ្នានេះដែរ ស្ថានទូតកូរ៉េបានបញ្ជាក់តាមរយៈសេចក្តីប្រកាសព័ត៌មានថា ការប្រគុំតន្ត្រីនេះ ក៏មានបង្កប់ អត្ថន័យរំលឹកដល់លោក ជា ស៊ីម ប្រធានព្រឹទ្ធសភា ដែលទើបតែទទួលមរណភាព។ «ជាថ្មីម្តងទៀត យើងខ្ញុំសូមចូលរួមរំលែកមរណទុក្ខដ៏សែនក្រៀមក្រំ ចំពោះការទទួលមរណភាពរបស់ សម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា ជាមួយក្រុមគ្រួសារនៃសព ដោយក្តីសោក សង្វេគដ៏ធំធេង ពោរពេញដោយក្តីសោកស្តាយអាឡោះអាល័យជាទីបំផុត»។ នេះជាការសរសេរបញ្ជាក់ របស់ស្ថានទូតកូរ៉េប្រចាំកម្ពុជា៕
© រក្សាសិទ្ធិដោយ thmeythmey.com
