ជាតិ
សេដ្ឋកិច្ច
GMSនិងADBជួបពិភាក្សាគ្នាដើម្បីជំរុញកំណើនសេដ្ឋកិច្ច និងពាណិជ្ជកម្មឆ្លងដែន 11, Jun 2015 , 7:39 pm
× រដ្ឋមន្ដ្រីនិងមន្ដ្រីជាន់ខ្ពស់នៃប្រទេសមហាអនុតំបន់មេគង្គGMSនិងអនុប្រធានធនាគារអភិ វឌ្ឍន៍អាស៊ី(ADB)បានជួបប្រជុំគ្នានៅថ្ងៃនេះ នៅក្នុងវេទិកាច្រករបៀងសេដ្ឋកិច្ចមហាអនុតំបន់មេគង្គលើកទី៧ ដើម្បីពិភាក្សាពីរបៀបបន្ដអភិវឌ្ឍច្រករបៀងសេដ្ឋកិច្ច សម្រួលដល់ការដឹកជញ្ផូន លើកកម្ពស់កិច្ចសហប្រតិបត្ដិការនិងការធ្វើពាណិជ្ផកម្មឆ្លងដែន ការចូលរួមរបស់វិស័យឯកជននិងការអភិវឌ្ឍតំបន់សេដ្ឋកិច្ចពិសេសជាដើម។
យោងតាមសេចក្តីប្រកាសព័ត៌មានរបស់ADBនៅក្នុងវេទិកានេះតំណាងប្រទេសក្នុងមហាអនុតំបន់មេគង្គ នឹងដោះស្រាយបញ្ហាប្រឈមនានាដែលបានលើកឡើងនៅក្នុងកិច្ចប្រជុំមុនៗ ដូចជាការកាត់បន្ថយរបាំងមិនមែនពន្ធ ការបង្កើនការភ្ផាប់ទំនាក់ទំនងខាងសហ្វវែរ ការពន្លឿនការអនុវត្ដកិច្ចព្រមព្រៀងសម្រួលការដឹកជញ្ផូនឆ្លងដែនក្នុងមហាអនុតំបន់មេគង្គ និងការបង្កើតតំបន់សេដ្ឋកិច្ចពិសេសនៅតាមផ្នែកមួយចំនួននៃច្រករបៀងទាំងនេះ។
លោក Stephen Groffអនុប្រធានធនាគារអភិវឌ្ឍន៍អាស៊ី បានមានប្រសាសន៍ថា៖ «ទីក្រុងគុនមីង គឺជាទីក្រុងសំខាន់ជាងគេនៃច្រករបៀងសេដ្ឋកិច្ចជើង-ត្បូងរបស់GMS ដែលលាតសន្ធឹងទៅភាគខាងត្បូង ចូលទៅប្រទេសវៀតណាម មីយ៉ាន់ម៉ា ឡាវ និងប្រទេសថៃ។ លោក បន្តថា៖«ច្រករបៀងសេដ្ឋកិច្ចនៃមហាអនុតំបន់មេគង្គនេះ គឺជាសមាសភាគសំខាន់នៃបណ្ដាញផ្លូវទូទាំងអាស៊ីទាំងមូល ដែលជំរុញឱ្យមានកំណើនពាណិជ្ផកម្ម និងសេដ្ឋកិច្ច»។
សូមបញ្ជាក់ថា ប្រធានបទនៃវេទិកាច្រករបៀងសេដ្ឋកិច្ចមហាអនុតំបន់មេគង្គលើកទី៧នៅឆ្នាំនេះគឺ «ការជម្រុញកិច្ចសហប្រតិបត្ដិការជាក់ស្ដែង ដើម្បីអនាគតនៃច្រករបៀងសេដ្ឋកិច្ចនៃមហាអនុតំបន់មេគង្គ»។ ក្រៅពីរដ្ឋមន្ដ្រី វេទិកានេះក៏មានការចូលរួមពីមន្ដ្រី រដ្ឋាភិបាលថ្នាក់ជាតិ និងថ្នាក់ខេត្ដ នៃប្រទេសមហាអនុតំបន់មេគង្គ និងតំណាងមកពីវេទិកាធុរកិច្ចមហាអនុតំបន់មេគង្គ និងដៃគូអភិវឌ្ឍន៍នានាផងដែរ។
វេទិកានេះធ្វើឡើងនៅក្នុងកម្មវិធី«សបា្ដហ៍ច្រករបៀងសេដ្ឋកិច្ចមហាអនុតំបន់មេគង្គ»នៅទីក្រុងគុនមីង ដែលរៀបចំដោយខេត្ដយូណាន ក្រសួងពាណិជ្ផកម្មចិន និងADB។ព្រឹត្ដិការណ៍គួរឱ្យកត់សម្គាល់ផ្សេងទៀតនៅក្នុងសបា្ដហ៍នេះដែរ ដូចជាវេទិកាអភិ បាលនៃមហាអនុតំបន់មេគង្គ និងពិព័រណ៍ពាណិជ្ផកម្មទំនិញនៃមហាអនុតំបន់មេគង្គ ពីថ្ងៃទី១២-១៦ ខែមិថុនា។
ប្រទេសមហាអនុតំបន់មេគង្គGMSមានសមាជិក៦ប្រទេស ដែលស្ថិតនៅជាប់ទន្លេមេគង្គដូចគ្នា ដូចជា ប្រទេសកម្ពុជា ចិន ឡាវ មីយ៉ាន់ម៉ា ថៃ និងប្រទេសវៀតណាម៕
© រក្សាសិទ្ធិដោយ thmeythmey.com