ជាតិ
សង្គមជាតិ
ជនជាតិបរទេស ៣រូបទទួលបានចំណាត់ថ្នាក់លេខ១ក្នុងការប្រកួតនិយាយពីភាសាខ្មែរជាលើកដំបូង 14, Jun 2015 , 8:30 pm
![](https://image.thmeythmey.com/pictures/2015/06/14/thumb2/146201517415411541097_794258677359484_1890384627_n.jpg)
×![]()
ភ្នំពេញ៖ ជនបរទេស ៣រូបទទួលបានចំណាត់ថ្នាក់លេខ ១ ក្នុងការប្រកួតប្រជែងនិយាយ ភាសាខ្មែរ ដែលចែកជា ៣កម្រិតផ្សេងគ្នា កាលពីរសៀលថ្ងៃទី១៣ មិថុនា។ លទ្ធផលការប្រកួត កម្រិតមធ្យមជ័យលាភីលេខ១ បានលើជនជាតិកូរ៉េខាងជើងកញ្ញា Su Rim Ko រីឯជ័យលាភី កម្រិតខ្ពស់ គឺជនជាតិបារាំង លោកស្រី Anne Laure Poree ហើយជ័យលាភីកម្រិតជំនាញ គឺជនជាតិបារាំងលោក Blaise Kilian។
ក្នុងការប្រកួតកម្រិតធម្យមមានបេក្ខជន ៩រូប កម្រិតខ្ពស់មានបេក្ខជនចំនួន ៧រូប និង កម្រិតជំនាញមានបេក្ខជន ៦រូប។ បេក្ខជនទាំង ២២នាក់នេះ មកពី៩ ប្រទេសបានចូលរួម រួមមាន ប្រទេសជប៉ុន បារាំង ប៊ែលស្សិក កូរ៉េខាងត្បូង កូរ៉េខាងជើង អូស្ត្រាលី អ៊ីតាលី អង់គ្លេស និង អាមេរិក។ បេក្ខជនទាំងអស់មានរយៈពេល៣នាទី ដើម្បីនិយាយពីប្រធានបទទាក់ទងនឹងកត្តាដែលជំរុញឲ្យពួកគេសិក្សាភាសាខ្មែរ និយាយពីសំនួនពាក្យនៅក្នុងភាសាខ្មែរ និងនិយាយពីអនុស្សាវរីយ៍ដែលពួកគេចងចាំបំផុតនៅកម្ពុជា។
ជ័យលាភីកម្រិតមធ្យម កញ្ញា Su Rim Ko អាយុ ២០ឆ្នាំ មានអារម្មណ៍សប្បាយរីករាយ នៅពេលដែលទទួលបានជ័យលាភី។ និស្សិតនៃសាកលវិទ្យាល័យ Limkokwing ភ្នំពេញ រូបនេះ អាចចេះនិយាយភាសាខ្មែរជាង ២ឆ្នាំហើយដែរ។
ដោយឡែក ជ័យលាភីកម្រិតខ្ពស់លោកស្រី Anne Laure Poree ជនជាតិបារាំង បាននិយាយ លោកស្រីបានស្នាក់នៅ និងធ្វើនៅក្នុងប្រទេសកម្ពុជាជាង ១០ឆ្នាំហើយ ដូចនេះ លោកស្រីក៏ អាចចេះនិយាយ និងស្តាប់ភាសាខ្មែរបានយ៉ាងល្អ។ លោកស្រីរៀបរាប់ថា ពេលលោកស្រី សិក្សាភាសាខ្មែរ មានការលំបាកខ្លាំង។ ការលំបាកដែលលោកស្រីជួបនោះគឺ វេយ្យាករណ៍ និងការសរសេរអក្សរខ្មែរតែម្តង។ យ៉ាងណា លោកស្រីអះអាង គាត់នៅតែព្យាយាមនិយាយ ជាមួយជនជាតិខ្មែរ និងស្តាប់ចម្រៀងខ្មែររហូតទល់តែចេះ។
ជាមួយគ្នានេះ ជ័យលាភីកម្រិតជំនាញ លោក Blaise Kilian ជាជនជាតិបារាំង ដែលបានមកស្នាក់នៅកម្ពុជាជាង ២០ឆ្នាំហើយនោះ បាននិយាយថា លោករីករាយនឹងចេះ ភាសាខ្មែរ ដោយលោកលើកឡើងថា ភាសាខ្មែរអាចជួយឲ្យការទំនាក់ទំនងការងាររបស់ លោកក្នុងតែមានភាពស្និតស្នាលល្អប្រសើរ។ ជាងនេះទៀត មន្ត្រីទូតបារាំងរូបនេះ អះអាងថា លោកចាប់អារម្មណ៍នឹងបន្តសិក្សាលើផ្នែកប្រវត្តិសាស្ត្រខ្មែរ ឲ្យកាន់តែស៊ីជម្រៅបន្ថែមទៀត។ លោក Blaise Kilian បានប្រកួតប្រជែងឈ្នះបេក្ខជនមកពីប្រទេសអូស្ត្រាលី ១នាក់ ជប៉ុន៣នាក់ និងអង់គ្លេស ១នាក់។
លោកស្រី Sonia CAUTAIN ប្រធានវិទ្យាស្ថានសិក្សាភាសាខ្មែរ និងជាប្រតិភូនៃសហភាពអឺរ៉ុប ដែលជាអ្នករៀបចំកម្មវិធីនេះ បាននិយាយថា គោលបំណងនៃការប្រកួតនេះ គឺដើម្បីជំរុញឲ្យ ជនបរទេសសិក្សាភាសាខ្មែរ។ ម្យ៉ាងទៀត លោកស្រីចង់លើកទឹកចិត្តឲ្យមានការប្រកួតបែប នេះ ឲ្យច្រើនទៀត ដើម្បីរក្សាទំនាក់ទំនងជនជាតិបរទេសក្នុងប្រទេសកម្ពុជា។
គួរបញ្ជាក់ថា ពិធីប្រកួតប្រជែងនេះ រៀបចំនៅក្នុង សាកលវិទ្យាល័យបញ្ញាសាស្ត្រកម្ពុជា ទីតាំងខាងត្បូងវិមានឯករាជ្យ ហើយបេក្ខជនចំនួន ២២នាក់ មកពី៩ ប្រទេសបានចូលរួម។ គណៈកម្មការក្នុង ការប្រកួតនេះ រួមមាន រដ្ឋមន្ត្រីក្រសួងអប់រំ និងកីឡា លោក ហង់ ជួនណារ៉ុន រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា ព្រមទាំងមានការចូលរួមពី សំណាក់ឯកអគ្គរដ្ឋទូតនៃបណ្តាប្រទេសមួយចំនួន សាស្ត្រាចារ្យ និងនិស្សិតសរុបជាង ៥០០នាក់។
រដ្ឋមន្ត្រីក្រសួងអប់រំ លោក ហង់ ជួនណារ៉ុន បានបង្ហាញចំណាប់អារម្មណ៍ថា កម្មវិធីនេះ បានជួយលើកទឹកចិត្តដល់ជនបរទេសដែលកំពុងតែធ្វើការ និងរស់នៅក្នុងប្រទេសកម្ពុជាឲ្យចេះនិយាយភាសាខ្មែរ។ លោកបន្ថែមថា ជនបរទេសមិនត្រឹមតែសិក្សាភាសាខ្មែរនោះទេ តែពួកគេថែមទាំងធ្វើការសិក្សាស្រាវជ្រាវស្វែងយល់ដឹងពីវប្បធម៌ខ្មែរបន្ថែមទៀតផង៕
© រក្សាសិទ្ធិដោយ thmeythmey.com