ជាតិ
នយោបាយជាតិ
អ្នកម្នាង អ៊ុក ផល្លា ចេញពីព្យាបាលនៅថៃត្រឡប់មកកម្ពុជាវិញ 15, Jun 2015 , 2:21 pm
![រូបថត អ្នកម្នាង អ៊ុក ផល្លា និងទ្រង់ រណឫទ្ធិ នៅព្រលានយន្តហោះក្នុងប្រទេសថៃ ពីហ្វេសប៊ុក គណបក្ស ហ៊្វុនស៊ិនប៉ិច](https://image.thmeythmey.com/pictures/2015/06/15/thumb2/11406407_1610972849173369_3212223078527965291_n.jpg)
រូបថត អ្នកម្នាង អ៊ុក ផល្លា និងទ្រង់ រណឫទ្ធិ នៅព្រលានយន្តហោះក្នុងប្រទេសថៃ ពីហ្វេសប៊ុក គណបក្ស ហ៊្វុនស៊ិនប៉ិច
×![]()
ស្ថានភាពសុខភាពរបស់អ្នកម្នាង អ៊ុក ផល្លា ដែលរងគ្រោះដោយសារគ្រោះថ្នាក់ចរាចរណ៍កាលពីចុងខែមេសា កន្លងទៅនោះ មកដល់ពេលនេះ មានភាពល្អប្រសើរហើយ។ អ្នកម្នាង នឹងចាកចេញពីប្រទេសថៃ ហើយវិលត្រឡប់មកដល់ប្រទេសកម្ពុជាវិញនៅម៉ោង ២ កន្លះ ថ្ងៃទី ១៥ ខែមិថុនានេះ ។ នេះបើតាមលោក ញ៉េប ប៊ុនជិន អ្នកនាំពាក្យគណបក្សហ៊្វុនស៊ិនប៉ិច។
មន្រ្តីជាន់ខ្ពស់គណបក្ស ហ៊្វុនស៊ិនប៉ិចជាច្រើនរូប មានលោក លោក ញ៉េប ប៊ុនជិន ជាដើម បានដឹកនាំអ្នកគាំទ្រមួយចំនួនទៅចាំទទួលអ្នកម្នាង ផល្លា នៅព្រលានយន្តហោះអន្តរជាតិនៅថ្ងៃនេះ។ ឯព្រះអង្គម្ចាស់ នរោត្តម រណឫទ្ធិ បានយាងទៅដង្ហែអ្នកម្នាងរបស់ព្រះអង្គពីប្រទេសថៃតែម្តង កាលពីថ្ងៃទី ១២ ខែមិថុនា។ បើតាមលោក ញ៉េប ប៊ុនជិន បើទោះបីជាស្ថានភាពរបួសអ្នកម្នាង ផល្លា បានធូរស្រាលច្រើន ហើយចេញពីមន្ទីរពេទ្យនៅប្រទេសថៃ ត្រឡប់មកកម្ពុជាវិញមែន តែទំនងមានក្រុមគ្រូពេទ្យជំនាញនៅកម្ពុជា នឹងជួយតាមដានស្ថានភាពរបួសរបស់ទ្រង់។
សូមរម្លឹកថា កាលពីថ្ងៃទី ២៤ ខែមេសា ក្រោយពីវិលត្រឡប់មកពីជួបអ្នកគាំទ្រខ្លួនៅក្នុងខេត្តកំពង់ចាម ព្រះអង្គម្ចាស់ នរោត្តម រណឫទ្ធិ និងអ្នកម្នាង អ៊ុក ផល្លា បានជួបគ្រោះថ្នាក់ចរាចរណ៍នៅកំណាត់ផ្លូវជាតិលេខ៧ ក្នុងភូមិព្រៃខ្វិត ឃុំខ្វិតធំ ស្រុកព្រៃឈរ ខេត្តកំពង់ចាម ដោយរថយន្តដឹកដីបានចូលកាត់ក្បួនរថយន្តទ្រង់ ក្នុងដំណើរមកកាន់រាជធានីភ្នំពេញ។ បន្ទាប់ពីរងរបួសធ្ងន់ក្នុងគ្រោះថ្នាក់ចរាចរណ៍នេះ អ្នកម្នាង ផល្លា ត្រូវគេបញ្ជូនមកព្យាបាលនៅមន្ទីរពេទ្យក្នុងរាជធានីភ្នំពេញ ហើយបញ្ជូនបន្តទៅព្យាបាលនៅប្រទេសថៃ៕
© រក្សាសិទ្ធិដោយ thmeythmey.com