ជាតិ
នយោបាយជាតិ
យុវជនសម្ព័ន្ធសេនានាគចេញមុខស្បថជំនួសលោក ហ៊ុន សែន នៅមុខវាំង 15, Jun 2015 , 5:07 pm
![](https://image.thmeythmey.com/pictures/2015/06/15/thumb2/pankhem_bunthan_mao_pises.jpg)
×![]()
ក្រុមយុវជនសម្ព័ន្ធសេនានាគ បានចេញមុខស្បថជាមួយលោក ម៉ៅ ពិសេស ប្រធានសហព័ន្ធនិស្សិតបញ្ញវន្តកម្ពុជា នៅមុខព្រះអង្គដងកើ នៅថ្ងៃទី២១ខែមិថុនាខាងមុខនេះ។ លោក ប៉ាន់ខែម ប៊ុនថន ប្រធានប្រតិបត្តិក្រុមយុវជនសម្ព័ន្ធសេនានាគ បញ្ជាក់ថាការចេញមុខស្បថនេះ គឺម្បីការពារកិត្តិយស និងភាពស្អាតស្អំរបស់បក្ស ហើយថាការកំដរលោក ម៉ៅ ពិសេស ស្បថនៅពេលនេះ គឺក្នុងនាមជាមិត្ត មិនមែនជាសត្រូវនោះទេ។ លោករដ្ឋមន្ត្រីក្រសួងព័ត៌មាន ខៀវ កាញារីទ្ធ បានសរសេរនៅលើទំព័រហ្វេសប៊ុករបស់លោកថា ប្រសិនបើមានព្រឹត្តិការណ៍ស្បថនេះមែន លោកនឹងបញ្ជូនក្រុមអ្នកកាសែតនៃទូរទស្សន៍ជាតិទៅយកព័ត៌មាននៅទីកន្លែងរៀបចំពិធី។
ក្រុមយុវជនសម្ព័ន្ធសេនានាគ បានចេញមុខកំណត់ថ្ងៃទៅស្បថនៅមុខព្រះអង្គដងទង់(ដងកើ) ជាមួយលោក ម៉ៅ ពិសេស ប្រធានសហព័ន្ធនិស្សិតបញ្ញវន្តកម្ពុជា ជំនួសលោកនាយករដ្ឋមន្ត្រីហ៊ុន សែន។ ការកំណត់ថ្ងៃស្បថជាមួយលោក ម៉ៅ ពិសេសនេះ កើតឡើងបន្ទាប់ពីលោកម៉ៅ ពិសេស បានស្នើឲ្យលោកនាយករដ្ឋមន្ត្រីហ៊ុនសែន កំណត់ថ្ងៃស្បថដើម្បីបញ្ជាក់ពីភាពស្អាតស្អំរបស់គណបក្សប្រជាជនជុំវិញលទ្ធផលបោះឆ្នោតជ្រើសតាំងតំណាងរាស្ត្រនីតិកាលទី។
លោក ប៉ាន់ខែម ប៊ុនថន ប្រធានប្រតិបត្តិនៃក្រុមយុវជនសម្ព័ន្ធសេនានាគ បានប្រាប់សារព័ត៌មានថ្មីៗ នៅព្រឹកថ្ងៃទី១៥មិថុនាថា៖«ឋានៈលោក ម៉ៅ ពិសេស ហ៊ានអញ្ជើញលោកនាយករដ្ឋមន្ត្រីឲ្យទៅស្បថជាមួយ ដូចជាតម្កើងខ្លួនឯងពេក។ បើចង់ស្បថ ក្រុមយុវជនសម្ព័ន្ធសេនានាគ អាចកំដរគាត់បាន មិនចាំបាច់ដល់លោកនាយករដ្ឋមន្ត្រីនោះទេ ត្រឹមតែយុវជនបក្សវាលើសលប់ពេកផង»។ ប្រធានប្រតិបត្តិនៃក្រុមយុវជនសម្ព័ន្ធសេនានាគរូបនេះ ក៏បានបញ្ជាក់ដែរថា ការចេញស្បថនេះ គឺធ្វើឡើងក្នុងនាមជាមិត្ត មិនមែនជាសត្រូវរវាងជាតិសាសន៍ឯងនោះទេ ហើយថា បើសិនជាលោក ម៉ៅ ពិសេស មិនហ៊ានទៅស្បថនៅថ្ងៃទី២១មិថុនាខាងមុខនោះមានន័យថា ការដែលលោកម៉ៅ ពិសេសចេញលិខិតអញ្ជើញលោកនាយករដ្ឋមន្ត្រីនោះ គឺគ្រាន់តែចង់ល្បីឈ្មោះប៉ុណ្ណោះ។
តែយ៉ាងណាក៏ដោយទាក់ទងនឹងគម្រោងស្បថដែលមានការចូលរួមពីយុវជនសម្ព័ន្ធសេនានាគ ជាង១ពាន់៥រយនាក់នាក់នេះ នៅមិនទាន់មានការអនុញាតពីសាលារាជធានីភ្នំពេញនៅឡើយទេ។
លោក ម៉ៅ ពិសេសប្រធានសហព័ន្ធនិស្សិតបញ្ញវន្តកម្ពុជា បានថ្លែងប្រាប់សារព័ត៌មានថ្មីៗនៅថ្ងៃនេះថា លោក មិនចាប់អារម្មណ៍សេចក្តីប្រកាសរបស់ក្រុមយុវជនសម្ព័ន្ធសេនានាគនោះទេ ហើយលោក ក៏មិនទៅស្បថជាមួយក្រុមយុវជនសម្ព័ន្ធសេនានាគនោះដែរ។
នៅក្នុងកិច្ចប្រជុំនាវិមានរដ្ឋសភានៅថ្ងៃទី៨ ខែមិថុនាកន្លងទៅ លោកនាយករដ្ឋមន្ត្រីហ៊ុនសែនបានថ្លែងខ្លាំងៗថា លោករង់ចាំ លោក សម រង្ស៊ីត្រឡប់មកពីក្រៅប្រទេសវិញ ដើម្បីស្បថនៅមុខព្រះអង្គដងកើបញ្ហាសំខាន់ៗពីរ ដែលធ្វើឲ្យលោក ហ៊ុន សែន បបួលលោក សម រង្ស៊ី ស្បថគឺបញ្ហាលួចបន្លំសន្លឹកឆ្នោត និងបញ្ហាកាកបាទក្រហមចែកអំណោយ«រើសមុខ»ដែលចោទដោយគណបក្សប្រឆាំង។ លោក ម៉ៅ ពិសេស បានចេញមុខជំនួសលោក សម រង្ស៊ី ដើម្បីបបួលលោកនាយករដ្ឋមន្ត្រីស្បថ ដែលតម្រូវឲ្យយុវជនគណបក្សប្រជាជនកម្ពុជាចេញមុខតទល់នឹងលោក ម៉ៅ ពិសេស៕
© រក្សាសិទ្ធិដោយ thmeythmey.com