ជាតិ
សង្គមជាតិ
ផ្លូវមុខប្រាសាទអង្គរវត្តនឹងបិទចរាចរណ៍នៅថ្ងៃប្រារព្ធទិវាអន្តរជាតិយូហ្គា 16, Jun 2015 , 9:47 am
![](https://image.thmeythmey.com/pictures/2015/06/16/thumb2/166201595040sangkran.jpg)
×![]()
សៀមរាប៖ ទិវាអន្តរជាតិស្តីពី យូហ្គា (International Day of Yoga) នៅឆ្នាំនេះ នឹងប្រារព្ធធ្វើនៅមុខបរិវេណនៃប្រាសាទអង្គរវត្ត។ ដើម្បីសម្រួលចរាចរណ៍នៅថ្ងៃប្រារព្ធទិវានោះឲ្យបានល្អ អាជ្ញាធរនឹងធ្វើការបិទផ្លូវមុខប្រាសាទអង្គរវត្តមួយរយៈ រហូតដល់ចប់កម្មវិធី។
ក្រសួងទេសចរណ៍ សហការនឹងស្ថានទូតឥណ្ឌាប្រចាំកម្ពុជា នឹងរៀបចំប្រារព្ធទិវាអន្តរជាតិស្តីពី យូហ្គា នៅថ្ងៃទី២១ មិថុនា ឆ្នាំ២០១៥ នៅបរិវេណខាងមុខនៃប្រាសាទអង្គរវត្ត។ ដើម្បីបង្កលក្ខណៈងាយស្រួលដល់កម្មវិធីខាងលើ អាជ្ញាធរជាតិអប្សរា ដែលមានតួនាទីគ្រប់គ្រងក្នុងតំបន់រមណីយដ្ឋានអង្គរ នឹងធ្វើការបិទចរាចរណ៍ជាបណ្តោះអាសន្ន រង់ចាំរហូតដល់ចប់កម្មវិធី ទើបបើកចរាចរណ៍ជាធម្មតាវិញ។
ក្នុងសេចក្តីជូនដំណឹងរបស់ខ្លួនដែលចេញផ្សាយនៅថ្ងៃទី១៥ មិថុនា អាជ្ញាធរអប្សរាបានបញ្ជាក់ពីប្លង់ដែលត្រូវផ្អាកដំណើរនៅក្នុងថ្ងៃប្រារព្ធទិវានោះផងដែរ។ ហាមយានជំនះគ្រប់ប្រភេទ មិនឲ្យចរាចរណ៍ចូលទីលានខាងមុខប្រាសាទអង្គរវត្តតាមច្រកទាំង៣ គឺត្រង់ចំណុចកែងផ្លូវប៉មយាមនគរបាលបេតិកភណ្ឌ ចំណុចកែងផ្លូវមកពីព្រលានយន្តហោះ និងចំណុចកែងផ្លូវត្រពាំងសេះ។ ទីលានមុខប្រាសាទ អនុញ្ញាតតែចំពោះដំណើរថ្មើរជើងតែប៉ុណ្ណោះ។ ផ្លូវស្របកសិណខាងលិចឆ្ពោះទៅអង្គរធំ ឫភ្នំបាខែង ចាប់ពីចំណុចកែងផ្លូវកូម៉ៃទៅជើងទល់នឹងប៉មយាមនគរបាលបេតិកភណ្ឌបត់ទៅលិចទល់នឹងផ្លូវថ្មី ត្រូវបង្វែរជាផ្លូវឯកទិស។ ចរាចរណ៍ដែលត្រឡប់ពីអង្គរធំ ឫភ្នំបាខែងឆ្លងកាត់មុខអង្គរវត្ត ត្រូវបើកតាមផ្លូវវាងត្រពាំងសេះខាងលិច បត់ទៅផ្លូវព្រលានយន្តហោះ ឫបង្ហួសទៅផ្លូវកូម៉ៃតែម្តង។
លោក សុខ លក្ខិណា ក្នុងនាមជាអគ្គនាយកស្តីទីនៃអាជ្ញាធរជាតិអប្សរា បានបញ្ជាក់ក្នុងសេចក្តីជូនដំណឹងខាងដើមថា ការប្តូរទិសចរាចរណ៍នេះ នឹងចាប់អនុវត្តចាប់ពីម៉ោង ១២ថ្ងៃត្រង់ ថ្ងៃទី២០ មិថុនាតទៅ រហូតដល់ចប់កម្មវិធី។ ចំពោះសាធារណជន មគ្គុទ្ទេសក៍ ក៏ដូចជាភ្ញៀវទេសចរជាតិ និងអន្តរជាតិ អាជ្ញាធរជាតិអប្សរា ស្នើសុំឲ្យមានការយោគយល់ខ្ពស់ ចំពោះការប្តូរទិសចរាចរណ៍នេះ៕
© រក្សាសិទ្ធិដោយ thmeythmey.com