ជាតិ
សង្គមជាតិ
EU រៀបចំការប្រកួតប្រជែងរូបថតស្ដីពីការប្រែប្រួលអាកាសធាតុនៅកម្ពុជា 19, Jun 2015 , 8:39 pm
![](https://image.thmeythmey.com/pictures/2015/06/19/thumb2/1962015171733eu.jpg)
×![]()
សហភាពអឺរ៉ុបនឹងរៀបចំកម្មវិធីប្រកួតប្រជែងរូបថតដោយផ្ដោតទៅលើការប្រែប្រួលអាកាសធាតុ ដើម្បីជំរុញឲ្យប្រជាពលរដ្ឋកម្ពុជាចាប់ផ្ដើមសកម្មភាពរបស់ខ្លួនក្នុងការឆ្លើយតប និងចូលរួមកាត់បន្ថយការប្រែប្រួលអាកាសធាតុ ដើម្បីបង្ហាញទៅកាន់ពិភពលោកថា កម្ពុជា «ចាប់ផ្ដើមឥឡូវនេះ»។
សហភាពអឺរ៉ុបបានឲ្យដឹងថា ការចូលរួមក្នុងការប្រកួតប្រជែងរូបថតនេះនឹងផុតកំណត់ត្រឹមថ្ងៃចន្ទទី១៧ ខែសីហា ហើយការប្រគល់រង្វាន់នឹងធ្វើឡើងនៅថ្ងៃសុក្រទី២១ខែសីហា ដែលជាកាល បរិច្ឆេទដាក់ឱ្យដំណើរការកម្មវិធីទូរស័ព្ទ smartphone “ការរាប់ថយក្រោយចំនួន១០០ថ្ងៃមុនដល់ថ្ងៃសន្និសីទលើកទី២១ នៃភាគីហត្ថលេខីស្តីពីការប្រែប្រួលអាកាសធាតុ (100-day countdown to COP21)” ។ ចំពោះអ្នកដែលចូលរួមក្នុងការប្រកួតប្រជែងនេះ ត្រូវពិគ្រោះជាមួយនឹងវិធាននៃការប្រកួតប្រជែង ដែលមាននៅលើទំព័រFacebookរបស់ប្រតិភូសហភាពអឺរ៉ុបប្រចាំកម្ពុជា https://www.facebook.com/eu.cambodia ។
អ្នកចូលរួមប្រកួតដែលជាប់ចំណាត់ថ្នាក់ទទួលបានរង្វាន់លើកទឹកចិត្ត រួមមានម៉ាស៊ីនថតរូបបែបកីឡា Go-PRO ជារង្វាន់ទីមួយ កង់កីឡាមួយគ្រឿងជារង្វាន់ទីពីរ បន្ទះសូឡាមួយឈុតជារង្វាន់ទីបី នាឡិកាដៃ “Ready to Act!” ចំនួន៥០គ្រឿងជារង្វាន់ទីបួន និងអាវយឺតរួមនឹងមួកកាតិប “Ready to Act!” ចំនួន៥០រង្វាន់ជារង្វាន់ទីប្រាំ។
លោកឯកអគ្គរដ្ឋទូតសហភាពអឺរ៉ុបប្រចាំកម្ពុជា ហ្សង់ហ្វ្រង់ស័រ កូតាំង (Jean-François Cautain) មានប្រសាសន៍ថា ក្នុងនាមជាដៃគូឈានមុខគេរបស់ប្រទេសកម្ពុជា សហភាពអឺរ៉ុបគាំទ្រកម្ពុជាក្នុងការប្រយុទ្ធប្រឆាំងនឹងការ ប្រែប្រួលអាកាសធាតុ និងកាត់បន្ថយការប្រឈមនឹងគ្រោះមហន្តរាយ ។ លោកថា មូលហេតុដែលប្រតិភូសហភាពអឺរ៉ុប និងបណ្តាស្ថានទូតនៃរដ្ឋជាសមាជិករបស់ខ្លួនចាប់ផ្តើមចាប់ដៃជាមួយប្រជាជនកម្ពុជា ក្នុងការបើកយុទ្ធ នាការការទូតអំពីអាកាសធាតុ ក្រោមប្រធានបទ «យើងត្រូវចាប់ផ្តើមឥឡូវនេះ»។
ចំពោះយុទ្ធនាការ «យើងត្រូវចាប់ផ្តើមឥឡូវនេះ!» របស់សហភាពអឺរ៉ុបនៅប្រទេសកម្ពុជា ត្រូវបានចាប់ផ្តើមក្រោមគំនិតផ្ដួចផ្តើមការទូតសហភាពអឺរ៉ុប ដែលបានចុះហត្ថលេខានៅទីក្រុងប្រ៊ុសែល កាលពីថ្ងៃទី១៩ខែមករាឆ្នាំ២០១៥ កន្លងទៅនេះ ។ យុទ្ធនាការនេះនឹងកៀរគរទាំងប្រតភូសហភាពអឺរ៉ុប និងតំណាងការទូតរបស់រដ្ឋជាសមាជិក នៃសហភាពអឺរ៉ុបនៅក្នុងប្រទេសកម្ពុជាឲ្យផ្ដួចផ្ដើម សកម្មភាពការទូតមុនដល់ថ្ងៃប្រារព្ធសន្និសីទ COP21 ដើម្បីបង្កើនការយល់ដឹង អំពីសារៈសំខាន់នៃសន្និសីទនេះនៅក្នុងប្រទេសកម្ពុជា៕
© រក្សាសិទ្ធិដោយ thmeythmey.com