ជាតិ
សង្គមជាតិ
អង្គការស៊ីប៉ាធ្វើយុទ្ធនាការអប់រំអំពីបរិស្ថានតាមរយៈបណ្ណាល័យចល័ត 20, Jun 2015 , 8:05 am
ក្នុងភាពជាដៃគូជាមួយក្រុមហ៊ុនអាកាសយានដ្ឋានកម្ពុជា អង្គការស៊ីប៉ា បានបើកសម្ពោធគម្រោងថ្មី «យុទ្ធនាការអប់រំអំពីបរិស្ថាន» តាមរយៈបណ្ណាល័យចល័ត កាលពីថ្ងៃទី ១៧ ខែមិថុនា នៅភូមិត្រពាំងសុក្រំ ស្រុកអង្គស្នួល ខេត្តកណ្តាល ដែលស្ថិតនៅមិនឆ្ងាយពីអាកាសយានដ្ឋានអន្តរជាតិភ្នំពេញ។
គម្រោង «យុទ្ធនាការអប់រំអំពីបរិស្ថាន» ធ្វើឡើងក្រោមរូបភាពជាបណ្ណាល័យចល័តពិសេសមួយរបស់អង្គការស៊ីប៉ា ដោយទទួលបានការឧបត្ថម្ភទាំងស្រុងពីក្រុមហ៊ុនអាកាសយានដ្ឋានកម្ពុជា។ ក្រៅពីការលើកកម្ពស់អំណានតាមរយៈការផ្តល់លទ្ធភាពទទួលបានសៀវភៅ និងព័ត៌មានបណ្ណាល័យចល័តនេះក៏ធ្វើបេសកកម្មថ្មីមួយបន្ថែមទៀតដែរ គឺការអប់រំបញ្ជ្រាបអំពីការការពារបរិស្ថាន សុវត្ថិភាពចរាចរណ៍ និង អនាម័យទៅដល់ប្រជាជន ជាពិសេសកុមារ និងយុវវ័យ។ បណ្ណាល័យចល័តថ្មីនេះបានចាប់ផ្តើមសកម្មភាពនៅតាមសហគមន៍តាំងពីដើមឆ្នាំ២០១៥ ហើយធ្វើការផ្តោតសំខាន់លើការអប់រំបញ្ជ្រាបតាមរយៈឧបករណ៍ព័ត៌មានផ្សេងៗ ។
ក្នុងឆ្នាំ២០១៥នេះ បណ្ណាល័យចល័ត «បរិស្ថាន» កំពុងប្រតិបត្តិការនៅជុំវិញព្រលានយន្តហោះ នៅតាមសហគមន៍ចំនួន៥ ដែលត្រូវបានជ្រើសរើសដោយអង្គការស៊ីប៉ា និងក្រុមហ៊ុនអាកាសយានដ្ឋានកម្ពុជា ហើយនៅតាមសហគមន៍ចំនួន៦០ផ្សេងទៀត ដែលស្ថិតនៅជាយក្រុងភ្នំពេញ ខេត្តកំពង់ស្ពឺ និងខេត្តតាកែវ។ គម្រោងនេះនឹងមានអ្នកទទួលផលច្រើនជាង៣០០០នាក់ ហើយពួកគេនឹងបានចូលរួមកម្មវិធីអប់រំបញ្ជ្រាបទាក់ទងនឹងបញ្ហាបរិស្ថាន សុវត្ថិភាពចរាចរណ៍ និងអនាម័យចំនួន២ដងក្នុងមួយសប្តាហ៍។ ដូច្នេះ សកម្មភាពអប់រំបញ្ជ្រាបចំនួន១០០ដង នឹងត្រូវធ្វើឡើងដោយបណ្ណាល័យចល័តនេះក្នុងរយៈពេលមួយឆ្នាំ។
ក្នុងមួយដង កម្មវិធីអប់រំបញ្ជ្រាបមានសកម្មភាពជាច្រើនដូចជា ការនិទានរឿងដោយបណ្ណារក្សចល័ត ការអានរឿងដោយសេរី ការអានសាលាកបត្រព័ត៌មាន ការចែកក្រដាសផ្សព្វផ្សាយពីបញ្ហាបរិស្ថានដល់សាធារណៈជន ការឆ្លើយសំណួរ ការបញ្ចាំងវីដេអូខ្លីទាក់ទងនឹងប្រធានបទអប់រំ ឥរិយាបថល្អក្នុងការការពារបរិស្ថាន ការរក្សាអនាម័យ និងការខ្ចីសងសៀវភៅជាដើម។ បណ្ណាល័យចល័តមានបណ្ណារក្សម្នាក់ និងជាធម្មតាមាននិស្សិតស្ម័គ្រចិត្ត២នាក់ដើម្បីជួយដល់សកម្មភាពអប់របញ្ជ្រាប ហើយរថយន្តចល័តមានផ្ទុកសៀវភៅ និងសម្ភារៈអប់រំជាច្រើន។
ពិធីសម្ពោធគម្រោងមានការចូលរួមពីសំណាក់ លោកស្រី ក្លូអេ ឡាពេយ៍ អ្នកគ្រប់គ្រងទូទៅ អាកាសយានដ្ឋានអន្តរជាតិភ្នំពេញ លោក ហុក សុទ្ធិ នាយកអង្គការស៊ីប៉ា តំណាងមកពីមន្ទីអប់រំខេត្តកណ្តាល និងការចូលរួមរបស់ប្រជាជន ដែលទទួលផលពីគម្រោងនេះ៕
© រក្សាសិទ្ធិដោយ thmeythmey.com