ជាតិ
សង្គមជាតិ
ជំងឺផ្លូវដង្ហើមមិនទាន់រកឃើញនៅកម្ពុជាទេ គិតត្រឹមថ្ងៃ២០មិថុនា 21, Jun 2015 , 9:06 am
![](https://image.thmeythmey.com/pictures/2015/06/21/thumb2/216201590824mers_thailand.jpg)
×![]()
គិតត្រឹមថ្ងៃទី២០ ខែមិថុនានេះ នាយកដ្ឋានប្រយុទ្ធប្រឆាំងជំងឺឆ្លងរបស់ក្រសួងសុខាភិបាល ពុំទាន់រកឃើញករណីជំងឺផ្លូវដង្ហើមមជ្ឈឹមបូព៌ា (MERS) នៅក្នុងប្រទេសកម្ពុជានៅឡើយទេ ។ ក្រសួងសុខាភិបាលកំពុងតាមដានជំងឺនេះយ៉ាងយកចិត្តទុកដាក់ ទាំងនៅប្រទេសថៃ ឧបទ្វីបមជ្ឈឹមបូព៌ា និងប្រទេសកូរ៉េខាងត្បូង និង ពង្រឹងប្រព័ន្ទតាមដានក្នុងប្រទេសជានិច្ច ។នេះបើតាមការចុះផ្សាយរបស់គេហទំព័នាយកដ្ឋានប្រយុទ្ធជំងឺឆ្លង។
មន្ត្រីជំនាញនាយកដ្ឋានបញ្ជាក់ថា វិធានការណ៏បង្ការនិងឆ្លើយតបរបស់ក្រសួងសុខាភិបាល រួមមាន ការផ្សព្វផ្សាយអប់រំអំពីជំងឺផ្លូវដង្ហើមមជ្ឈឹមបូព៌ានេះជូនប្រជាពលរដ្ឋ។ ការតាមដានសុខភាពអ្នកដំណើរមកពីបរទេស ជាពិសេសអ្នកដំណើរពីកូរ៉េខាងត្បូង និងមជ្ឈឹមបូព៌ា។ ក្រសួងត្រៀមលក្ខណៈមន្ត្រីក្រុមឆ្លើយតបបន្ទាន់ ២៤/៧ ។ ត្រៀមមន្ទីរពិសោធន៏សំរាប់រកអត្តសញ្ញាណមេរោគលើករណីអ្នកជំងឺសង្ស័យ។ ត្រៀមមន្ទីរពេទ្យព្យាបាល និងដាក់អ្នកជំងឺដោយឡែក និងការរៀបចំទូរស័ព្ទទាន់ហេតុការណ៏ជូនប្រជាពលរដ្ឋរាយការណ៍មកក្រសួង (១១៥, ០១២៤៨៨៩៨១, ០៨៩៦៦៩៥៦៧)។
ជាមួយគ្នានេះនាយកដ្ឋានជំងឺឆ្លងក៏ស្នើឲ្យប្រជាពលរដ្ឋទាំងអស់ ជាពិសេសពលរដ្ឋកម្ពុជានិងអ្នកធ្វើដំណើរមក ពីប្រទេសកូរ៉េខាងត្បូង មជ្ឈឹមបូព៌ា និងតាមច្រកព្រំដែនអន្តរជាតិគប្បីទៅត្រួតពិនិត្យសុខភាពរបស់ខ្លួននៅមន្ទីពេទ្យ ឬរាយការណ៍ទៅនាយកដ្ឋានប្រយុទ្ធជំងឺឆ្លង បើសង្ស័យថាមានជំងឺផ្លូវដង្ហើមមជ្ឈឹមបូព៌ានេះ។ ចំណែកក្នុងគ្រួសារ ក្នុងភូមិ ក្នុងគ្រឹះស្ថានសុខាភិបាល មានជំងឺផ្លូវដង្ហើមច្រើនខុសធម្មតា គួរតែរាយការណ៏ទៅនាយកដ្ឋានប្រយុទ្ធជំងឺឆ្លង ដើម្បីបញ្ជូនមន្ត្រីជំនាញចុះអង្គេតស្រាចជ្រាវជាបន្ទាន់ ។ ហើយមន្ត្រីជំនាញ ត្រូវពង្រឹងតាមដានសុខភាពអ្នកដំណើរនៅច្រកព្រំដែនអន្តរជាតិ ដើម្បីបង្កាជំងឺផ្លូវដង្ហើមនេះ កុំឲ្យឆ្លងចូលប្រទេសកម្ពុជា។
អនុប្រធានមន្ទីរសុខាភិបាល ខេត្តបន្ទាយមានជ័យ បានចុះត្រួតពិនិត្យ និងដាក់វិធានការពង្រឹងដល់មន្ត្រីសុខាភិបាល ប្រចាំច្រកអន្តរជាតិប៉ោយប៉ែត ដើម្បីត្រួតពិនិត្យភ្ញៀវអន្តរជាតិ ដែលធ្វើដំណើរឆ្លងកាត់ពីប្រទេសថៃ ចូលមកប្រទេសកម្ពុជា ក្នុងការការពារជំងឺផ្លូវដង្ហើម (MERS) ។
នាយកដ្ឋានប្រយុទ្ធជំងឺឆ្លងបញ្ជាក់ថា ការប្រុងប្រយ័ត្នទូទៅក្នុងការកាត់បន្ថយការប្រឈមនៃជំងឺផ្លូវដង្ហើម (MERS)នេះ ចៀសវាងប៉ះពាល់ជិតស្និតជាមួយអ្នកមានជំងឺផ្លូវដង្ហើមស្រួច។ លាងដៃឲ្យបានញឹកញាប់ជាមួយសាប៊ូ និងទឹក បន្ទាប់ពីប៉ះពាល់ជាមួយអ្នកជំងឺ ឬបរិស្ថានជុំវិញគាត់។ ចៀសវាងបរិភោគផលិតផលសត្វដែលចម្អិនមិនឆ្អិនល្អ ដូចជា ទឹកដោះ សាច់។ ចៀសវាងប៉ះពាល់ជិតស្និតជាមួយសត្វកសិដ្ឋាន ឬសត្វរស់ ដែលជាកន្លែងមេរោគចំលង។
គួរបញ្ជាក់ថា ប្រទេសថៃបានរកឃើញករណីជំងឺផ្លូវដង្ហើមមជ្ឈឹមបូព៌ាជាលើកដំបូងលើពាណិជ្ជករមកពីប្រទេសអូម៉ង់ (តំបន់មជ្ឈឹមបូព៌ា) ដោយអ្នកជំងឺមានអាយុ ៧៥ឆ្នាំ ភេទប្រុស គាត់មកស្វែងរកការព្យាបាលជំងឺបេះដូងនៅប្រទេសថៃ។ តែគ្រូពេទ្យមានការសង្ស័យថាមានជំងឺផ្លូវដង្ហើម ក៏យកគាត់ទៅពិនិត្យមើលឃើញមានមេរោគជំងឺផ្លូវដង្ហើមមជ្ឈឹមបូព៌ា ។ ចំណែកអ្នកប៉ះពាល់ជាមួយអ្នកជំងឺចំនួន ៥៩នាក់បានដាក់អោយ នៅដោយឡែក ក្នុងនោះរួមមាន សមាជិកគ្រួសារ អ្នកអង្គុយលើយន្ត ហោះជិតគាត់ អ្នកបំរើលើយន្តហោះ គ្រូពេទ្យ បុគ្គលិក សណ្ឋាគារ អាហារដ្ឋាន អ្នកលក់ទំនិញ និង អ្នករត់ តាក់ស៊ីដែលរកឃើញថាបាន ប៉ះពាល់ជាមួយគាត់ ។
ដោយឡែកនៅកូរ៉េខាងត្បូងបានរកឃើញករណីជំងឺផ្លូវ ដង្ហើមមជ្ឈឹមបូព៌ា (MERS) ចំនួន ១៦៦ករណី និងក្នុងនោះ ២៥នាក់ បានស្លាប់ និងដាក់អ្នកបានប៉ះពាល់ ជាមួយជំងឺចំនួន ៦៧២៩នាក់ឲ្យនៅដោយឡែកពីគេ (ដាក់ក្នុងផ្ទះឬមន្ទីពេទ្យ) និងតាមដានសុខភាព ដើម្បីបង្ការចំលងទៅអ្នកដ៏ទៃទៀត៕
© រក្សាសិទ្ធិដោយ thmeythmey.com