ជាតិ
សង្គមជាតិ
ក្រសួងទេសចរណ៍៖ លំហាត់យូហ្គាពិតជាធ្វើឲ្យផ្លូវកាយនិងផ្លូវចិត្តដំណើរការល្អ 21, Jun 2015 , 1:29 pm
× រដ្ឋលេខាធិការក្រសួងទេសចរណ៍ លោក សូ ម៉ារ៉ា ដែលបានចូលរួមលំហាត់យូហ្គា នៅព្រឹកថ្ងៃទី២១មិថុនា នៅមុខប្រាសាទអង្គរ ទទួលស្គាល់ថា ការធ្វើលំហាត់យូហ្គា គឺមានលក្ខណៈវិសេសដែលសម្រួលដល់ផ្លូវកាយ និងផ្លូវចិត្ត ដែលផ្ដល់អត្ថប្រយោជន៍ច្រើនដល់សុខភាព ខុសពីលំហាត់ប្រាណបែបធម្មតា ។ ក្រសួងទេសចរណ៍ សហការជាមួយស្ថានទូតឥណ្ឌាប្រចាំកម្ពុជា បានរៀបចំប្រារព្វទិវាអន្តរជាតិស្ដីពីយូហ្គា (International Day of Yoga)នៅថ្ងៃទី២១ មិថុនានេះនៅបរិវេណទីធ្លាខាងមុខប្រាសាទអង្គរវត្ត។
ក្រោយពីចូលរួមលំហាត់ប្រាណជាមួយភ្ញៀវជាតិ និងអន្តរជាតិជាងមួយពាន់នាក់នោះ លោករដ្ឋលេខាធិការក្រសួងទេសចរណ៍ បានបញ្ជាក់ថា លំហាត់យូហ្គា ជាការសម្រួលដល់ផ្លូវដង្ហើម ការគ្រប់គ្រងទម្ងន់ និងបទបែនដងខ្លួនឲ្យមានភាពរហ័សរហួនជាដើម ។ លោកបន្ថែមថា កម្ពុជានឹងប្រារព្វទិវាអន្តរជាតិស្ដីពីយូហ្គា (International Day of Yoga)នៅថ្ងៃទី២១ មិថុនានេះ ជារៀងរាល់ឆ្នាំ។
ចំណែកនៅម៉ោងជាង៥ ថ្ងៃទី២១មិថុនានេះក្រសួងទេសចរណ៍នឹងរៀបចំការធ្វើលំហាត់យូហ្គា នៅមុខទីលានមុខព្រះបរមរាជវាំងដែរ។នេះបើតាមសេចក្ដីជូនដំណឹងក្រសួងទេសចរណ៍។
ការធ្វើលំហាត់ប្រាណ «យូហ្គា» នេះ គឺជាលំហាត់ប្រាណបែបសម្មាធិសម្រួលអារម្មណ៍ទាំងផ្លូវកាយនិងផ្លូវចិត្ត និងការសម្រួលសាច់ដុំ ដើម្បីឲ្យមានសុខភាពមាំមួន។ការរៀបចំទិវាអន្តរជាតិស្ដីយូហ្គាឡើង ក្រោយពីអង្គការសហប្រជាជាតិបានអនុម័តសេចក្តីសម្រេចមួយកំណត់យកថ្ងៃ ២១ ខែមិថុនាជាថ្ងៃ ទិវាYoga អន្តរជាតិ។
គួរបញ្ជាក់ថា កាលពីចុងឆ្នាំមុនមហាសន្និបាតអង្គការសហប្រជាជាតិបានអនុម័តសេចក្តីសម្រេចមួយកំណត់យកថ្ងៃ ២១ ខែមិថុនាជាថ្ងៃ ទិវាYoga អន្តរជាតិ ដោយសេចក្តីសម្រេចនេះរៀបចំឡើងដោយប្រទេស១៧៧ ជាសមាជិកអង្គការសហប្រជាជាតិ។ តាមពិតទៅគំនិតបង្កើតទិវា Yoga នេះដែរផ្តួចផ្តើមឡើងជាផ្លូវការដោយនាយករដ្ឋមន្ត្រីឥណ្ឌាលោក នារិន្ទ្រា ម៉ូឌី ក្នុងពេលដែលលោកថ្លែងសុន្ទរកថានៅក្នុងមហាសន្និបាតអង្គការសហប្រជាជាតិលើកទី៦៩ ខែវិច្ឆិកា ឆ្នាំមុន៕
© រក្សាសិទ្ធិដោយ thmeythmey.com