ជាតិ
សង្គមជាតិ
អ្នកសារព័ត៌មានតំបន់ទន្លេមេគង្គជាង ១០នាក់ចុះកម្មសិក្សានៅទំនប់វារីអគ្គិសនីសេសាន 23, Jun 2015 , 8:59 am
![](https://image.thmeythmey.com/pictures/2015/06/22/thumb2/phirun.jpg)
×![]()
ភ្នំពេញ៖ បណ្តាញអ្នកសារព័ត៌មានតំបន់ទន្លេមេគង្គជាង ១០នាក់ នឹងចាប់ផ្តើមចុះសិក្សា ស្រាវជ្រាវលើប៉ះពាល់នៃគម្រោងអភិវឌ្ឍសង់ទំនប់វារីអគ្គិសនីសេសានក្រាម២ រយៈពេល ៥ថ្ងៃ ចាប់ពីថ្ងៃទី២២ ដល់២៦ ខែមិថុនា ឆ្នាំ២០១៥នេះ។
អ្នកសារព័ត៌មានទាំងនោះ រួមមានមកពីប្រទេសកម្ពុជា ថៃ វៀតណាម មីយ៉ាន់ម៉ា ឡាវ និងចិន។ ពួកគេនឹងចុះទៅស្រាវជ្រាវ និងជួបសម្ភាសន៍ជាមួយប្រជាជនដែលរងប៉ះពាល់នានា ក្នុង គម្រោងទំនប់វារីអគ្គិសនីសេសាន២ ខេត្តស្ទឺងត្រែង។
នាកិច្ចពិភាក្សាតុមូល នៅថ្ងៃទី២២ មិថុនានេះ លោក Adam Hunt នាយកប្រតិបត្តិប្រព័ន្ធផ្សព្វ ផ្សាយ និងសារគមនាគមន៍ នៃអង្គការភាពជាដៃគូក្នុងតំបន់ទន្លេមេគង្គ បានថ្លែងឲ្យដឹងពី គោលបំណងនៃការចុះកម្មសិក្សាថា ការចុះកម្មសិក្សារបស់អ្នកសារព័ត៌មាននៅពេលនេះ គឺ ជាគម្រោងការពារបរិស្ថានក្នុងតំបន់ទន្លេមេគង្គ។ លោកបន្ថែមថា បណ្តាញអ្នកសារព័ត៌មាន គ្រប់ប្រភេទ នឹងទទួលបទពិសោធន៍ថ្មីជាក់ស្តែងជាច្រើន នៅពេលពួកគេចុះជួបជាមួយ ប្រជាជន ក៏ដូចជាបរិស្ថានក្នុងតំបន់។ លោកថា៖«យើងនឹងចុះទៅក្នុងតំបន់សង់វារីអគ្គិសនី ហើយយើងនឹងជួបជាមួយប្រជាជនក្នុងតំបន់នោះ យើងជឿជាក់ថា តំបន់នោះ នឹងផ្តល់មេរៀន ថ្មីជាច្រើន សម្រាប់ក្រុមអ្នកសារព័ត៌មានក្នុងតំបន់ទន្លេមេគង្គ»។
ទំនប់វារីអគ្គិសនីសេសានក្រោម២ កម្លាំង៤២០មេហ្គាវ៉ាត់ស្ថិតក្នុង ស្រុកសេសាន ខេត្តស្ទឹងត្រែងគឺជាគម្រោងទំនប់វារីអគ្គិសនីធំជាងគេបំផុតនៅ កម្ពុជា ដែលវិនិយោគដោយក្រុមហ៊ុនរ៉ូយ៉ាល់គ្រុប (Royal Group) របស់កម្ពុជា និងក្រុមហ៊ុនចិន Hydrolancang International Energy Co.Ltd លើគម្រោងទឹកប្រាក់ជិត៩០០ លានដុល្លារអាមេរិក។ គម្រោងនេះ បានដំណើរការសាងសង់ដ៏ចម្រូងចម្រាស អស់រយៈពេលជាងមួយឆ្នាំមកហើយ។ គម្រោងនេះ នឹងចាប់ផ្តើមនៅឆ្នាំ ២០១៧ ។
គម្រោងដែលមានភាពចម្រូងចម្រាសនេះ ដែលនឹងបិទទន្លេសេសាន និងទន្លេស្រែពក គឺជាគម្រោងមួយ ដែលក្រុមអ្នកជំនាញបានព្រមានបន្ទាប់ពីការសិក្សាស្រាវជ្រាវលើ ផលប៉ះពាល់ថា គម្រោងនេះនឹងនាំឲ្យមានវិបត្តិសន្តិសុខស្បៀងនៅតំបន់ទន្លេមេគង្គ ក្រោម ដែលនឹងប៉ះពាល់ប្រជាជនរាប់ម៉ឺននាក់នៅកម្ពុជា វៀតណាម ថៃ និងឡាវ។ ប៉ុន្តែមន្ត្រីរដ្ឋាភិបាលកម្ពុជា បានលើកឡើងថា គម្រោងនេះ នឹងជួយធ្វើឲ្យកម្ពុជាមានថាមពលអគ្គិសនីប្រើប្រាស់ច្រើន ជាងប៉ះពាល់ពីគម្រោង។
លោក ប៊ុន ណារិទ្ធិ អគ្គនាយករងនៃថាមពល នៃក្រសួង រ៉ែ និងថាមពល បានថ្លែងថា គម្រោងនេះ នឹងអាចជួយឲ្យប្រជាជនកម្ពុជាមានថាមពលអគ្គិសនីប្រើប្រាស់ នៅទូទាំងប្រទេស ក្នុងឆ្នាំ ២០៣០។ ហើយថា ផលប៉ះពាល់នានា ក្នុងគម្រោងនោះ ត្រូវបានរដ្ឋាភិបាលកម្ពុជា និងក្រុមហ៊ុនវិនិយោគចិនដោះស្រាយរួចហើយដែរ។
លោកថា៖មកទល់ពេលនេះ ប្រជាជនដែលរងប៉ះពាល់ទទួលដី៥ហិចតាក្នុងមួយគ្រួសារ ហើយក្នុងចំណោមចំណោមប្រជាជនទាំងអស់ ៨៧២គ្រួសារ មានជាង ៧០ភាគរយ ដែលព្រមទទួលយកសំណងនេះ។ ក្រុមហ៊ុនមានកញ្ចប់ថវិកាចំនួន ៤១លានដុល្លារអាមេរិក សម្រាប់ដោះស្រាយលើប៉ះពាល់នានា»៕
© រក្សាសិទ្ធិដោយ thmeythmey.com