ជាតិ
សង្គមជាតិ
អាជ្ញាធរអប្សរាចែករំលែកការងារគ្រប់គ្រងរមណីយដ្ឋានអង្គរដល់មីយ៉ាន់ម៉ា 23, Jun 2015 , 3:07 pm
![](https://image.thmeythmey.com/pictures/2015/06/23/thumb2/apsara-myanmar_3nd.jpg)
×![]()
សៀមរាប៖ ប្រទេសមីយ៉ាន់ម៉ា ដែលគ្រោងនឹងរៀបចំឯកសារនានា ដើម្បីស្នើសុំចុះក្នុងបញ្ជីប្រាសាទបុរាណរបស់ខ្លួនជាសម្បត្តិបេតិកភណ្ឌលោកនាពេលខាងមុខនោះ បានចុះមកសិក្សានិងស្វែងយល់ការងារអភិរក្ស និងអភិវឌ្ឍរមណីយដ្ឋានអង្គរពីអាជ្ញាធរជាតិអប្សរា។ នេះជាលើកទីបីហើយ ដែលគណៈប្រតិភូនៃប្រទេសមីយ៉ាន់ម៉ា សុំឲ្យអាជ្ញាធរអប្សរា ប្រាប់ពីគន្លឹះសំខាន់ ក្នុងការគ្រប់គ្រងរមណីយដ្ឋានប្រវត្តិសាស្ត្រឲ្យមានប្រសិទ្ធិភាព។
គណៈប្រតិភូមីយ៉ាន់ម៉ា ដឹកនាំដោយលោក Myint Zaw ប្រធាននាយកដ្ឋានបុរាណវិទ្យា និងសារមន្ទីរនៃក្រសួងវប្បធម៌មីយ៉ាន់ម៉ា បានមកបំពេញដំណើរទស្សនកិច្ចរបស់ខ្លួននៅទីស្នាក់ការនៃអាជ្ញាធរអប្សរា។ ដំណើរទស្សនកិច្ចសិក្សារយៈពេល៥ថ្ងៃ របស់មីយ៉ាន់ម៉ា គឺផ្តោតលើការងារគ្រប់គ្រង និងអភិរក្សរមណីយដ្ឋានអង្គរ ដែលអាជ្ញាធរអប្សរា ទទួលបានជោគជ័យនាពេលកន្លងមក។
នៅទីស្នាក់ការអាជ្ញាធរអប្សរា លោក ប៊ុន ណារិទ្ធ អគ្គនាយកអាជ្ញាធរអប្ស និងមន្ត្រីជំនាញជាច្រើនរូប បានធ្វើបទបង្ហាញជាច្រើនទាក់ទងនឹងការងារគ្រប់គ្រង អភិរក្ស និងអភិវឌ្ឍរមណីយដ្ឋានអង្គរ ដូចជាការជួសជុល និងអភិរក្សប្រាសាទ ការគ្រប់គ្រងទេសចរណ៍ និងជាពិសេសគឺការលើកតម្លៃបេតិកភណ្ឌអរូបីក្នុងរមណីយដ្ឋានអង្គរជាដើម។
ក្នុងដំណើរទស្សនកិច្ចសិក្សារបស់ខ្លួន ប្រតិភូមីយ៉ាន់ម៉ា គ្រោងនឹងចុះទៅតាមការដ្ឋានមួយចំនួន ដើម្បីមើលផ្ទាល់ពីការងារជួសជុលប្រាសាទផងដែរ។ អាជ្ញាធរអប្សរា បានក្លាយជាគំរូល្អដល់ពិភពលោក ក្នុងការងារអភិរក្ស និងជួសជុលប្រាសាទបុរាណ និងដែលបានទទួលសិទ្ធិរៀបចំកិច្ចប្រជុំអន្តរជាតិ អាយស៊ីស៊ីអង្គរ (ICC-Angkor) ចាប់ពីឆ្នាំ២០១៣មក។
គួរបញ្ជាក់ថា នេះជាលើកទីបីហើយ ដែលប្រតិភូមីយ៉ាន់ម៉ា បានចុះមកសិក្សា និងស្វែងយល់ការងារគ្រប់គ្រង និងអភិរក្សរមណីយដ្ឋានអង្គរនៅទីស្នាក់អាជ្ញាធរអប្សរា ខេត្តសៀមរាប។ ក្នុងជំនួបដំបូង គឺរវាងអនុប្រធានាធិបតីនៃសាធារណរដ្ឋសហភាពមីយ៉ាន់ម៉ា លោក U Nyan Tun និងលោក សុខ អាន ឧបនាយករដ្ឋមន្ត្រី និងជាប្រធានអាជ្ញាធរអប្សរា កាលពីថ្ងៃទី២ មេសា ឆ្នាំ២០១៥កន្លងទៅ៕
© រក្សាសិទ្ធិដោយ thmeythmey.com