ជាតិ
សង្គមជាតិ
EU នឹងផ្ដល់ថវិកាជាង ១០លានដុល្លារអាមេរិកសម្រាប់ដំណើរការបោះឆ្នោតដល់ឆ្នាំ ២០១៩
23, Jun 2015 , 7:39 pm
×![]()
ដោយ: ថ្មីៗ
ភ្នំពេញ៖ សហភាពអឺរ៉ុប (EU) គ្រោងផ្ដល់ជំនួយចំនួន ១០លានអឺរ៉ូ ស្មើនឹងប្រមាណ ១១ លានដុល្លារអាមេរិក សម្រាប់ជួយសម្រួលដល់ការបោះឆ្នោតនៅកម្ពុជា ចាប់ពីឆ្នាំ២០១៦ ដល់ឆ្នាំ ២០១៩ ខាងមុខ។ នេះបើតាមការផ្សាយរបស់ទីភ្នាក់ងារសារព័ត៌មានរដ្ឋ (AKP) ។
កញ្ចប់ថវិកាដែលជាជំនួយរបស់សហភាពអឺរ៉ុបនេះ គឺផ្ដោតទៅលើការបោះឆ្នោតជ្រើសរើស ក្រុមប្រឹក្សាឃុំសង្កាត់ក្នុងឆ្នាំ២០១៧ និងការបោះឆ្នោតជ្រើសតាំងតំណាងរាស្ត្រឆ្នាំ២០។
បើតាម AKP បន្ទាប់ពីជំនួបពិភាក្សារវាង គ.ជ.ប EU និងភាគីជប៉ុន នៅទីស្តីការ គ.ជ.ប នារសៀលថ្ងៃទី ២២ ខែមិថុនានេះ លោក ស៊ិក ប៊ុនហុក ប្រធាន គ.ជ.ប និងលោក Jean-Francois CAUTAN ឯកអគ្គរដ្ឋទូតសហគមន៍អឺរ៉ុប លោក Yuji KUMAMARU ឯកអគ្គរាជទូត ជប៉ុន និងលោក ADACHI តំណាងអង្គការ JICA បានបញ្ជាក់ជុំវិញជំនួយនេះថា ទីស្នាក់ការ កណ្ដាល នៃសហភាពអឺរ៉ុបនឹងធ្វើការអនុម័ត នៅខែតុលា ឆ្នាំ២០១៥ខាងមុខ។
ការផ្តល់ជំនួយរបស់សហភាពអឺរ៉ុបនេះ នឹងត្រូវបែងចែកជា ៣រូបភាព ដូចជា ទី១, ការជួយជាអនុសាសន៍លើបទបញ្ជា និងនិតិវិធីសម្រាប់ការចុះឈ្មោះបោះឆ្នោត ដើម្បីរៀបចំបញ្ជីបោះឆ្នោតថ្មី ទី២, អ្នកជំនាញការដែលនឹងមកឈរជើងនៅ គ.ជ.ប ទាំងរយៈពេលវែងនិងខ្លី និងទី៣, ជំនួយជាសំភារៈផ្សេងៗ សម្រាប់ការចុះឈ្មោះ និងដំណើរការបោះឆ្នោត» ។
ជាមួយគ្នានេះ លោក ស៊ិក ប៊ុនហុក ប្រធាន គ.ជ.ប បានថ្លែងអំណរគុណចំពោះកិច្ច ប្រឹងប្រែងរបស់សហភាពអឺរ៉ុប និងជប៉ុន ដែលសន្យាថា នឹងសហការដើម្បីរក្សាតម្លៃ នៃជំនួយ សម្រាប់ដំណើរការបោះឆ្នោតនៅកម្ពុជា៕
© រក្សាសិទ្ធិដោយ thmeythmey.com
