ជាតិ
ជ្រូកព្រៃប្រើចង្កូមជាអាវុធការពារខ្លួន និងរកចំណី 18, Jul 2015 , 6:00 pm
× ជ្រូកព្រៃ(Sus scrofa)
ភិនភាគ៖ ជ្រូកព្រៃជាសត្វមានសម្បុរផ្លាស់ប្តូរទៅតាមវ័យ។ នៅតូចវាមានសម្បុរប្រផេះ-ត្នោត និងប្រែជាប្រផេះសុទ្ធកាលណាវាមានអាយុជាង ៥ឆ្នាំ។ ជ្រូកព្រៃបាមានកន្ទុយបះត្រង់ទៅក្រោយ ឬត្រង់ឡើងលើ ឯជ្រូកព្រៃមេមានកន្ទុយសំយ៉ុងចុះក្រោម។ ជ្រូកព្រៃមានចង្កូមមួយគូដុះលូតចេញជាខ្នាយស្រួច ជួនកាលខ្នាយនេះកោងខុបចុះក្រោមជារង្វង់ ដែលជាអាវុធសំខាន់សម្រាប់ការពារខ្លួន និងសម្រាប់ឈ្មូសដី។ ជ្រូកព្រៃមានវិញ្ញាណវៃបំផុតដោយប្រើច្រមុះ និងត្រចៀក។
ជីវសាស្ត្រ៖ ជាសត្វចូលចិត្តរស់នៅជាយព្រៃស្រោង ព្រៃដែលមានកូនឈើស្នាប់ជិត និងព្រៃស្ងាត់ដែលមាន ថ្លុក ត្រពាំង សម្រាប់ដេកត្រាំភក់នៅពេលថ្ងៃ ហើយចូលចិត្តរស់នៅបំផុតក្នុងព្រៃសើម។ នៅរដូវប្រាំងវាតែងតែនៅតាមបណ្តោយដងស្ទឹង ព្រែក ឬអូរ។ ជ្រូកព្រៃជាសត្វស៊ីអាហារគ្រប់ប្រភេទ មានសត្វឥតតឆ្អឹងកងនានា ផ្សិត ឬសឈើ សាកសពសត្វ មើមឈើ ពន្លកល្បះ ទំពាំង ព្រមទាំងផ្លែឈើ និងបន្លែរាប់ទាំងគ្រប់ធញ្ញជាតិផង។ វារកចំណីដោយប្រើច្រមុះសម្រាប់ឈ្មួសដី រឹង-ទន់។ ជ្រូកព្រៃជាធម្មតារកស៊ីនៅពេលព្រឹកស្រាងៗ និងព្រលប់ ប៉ុន្តែវាអាចរកស៊ីនៅពេលយប់ផងដែរ កាលណាបើមានការរំខានពេលវេលារកស៊ីរបស់វាច្រើន។ វាដោយញី-ឈ្មោលនៅខែវិច្ឆិកា ហើយក្រោយពីមានពពោះរយៈពេល ៥ខែ ជ្រូកមេអាចផ្តល់កំណើតកូនជ្រូកជាលើកដំបូង ពី ៤-៨ក្បាល និងអាចដល់ ១៥-១៧ក្បាល និងបំបៅដោះរហូតដល់ ៣-៤ខែ។ សត្វជ្រូកព្រៃញីអាចបន្តពូជបាននៅអាយុ ៦-៧ខែ។ អាយុកាលរបស់វាជាមធ្យម ១០-១២ឆ្នាំ និងអាចដល់២០ឆ្នាំ។
រប៉ាយរស់នៅ៖ នៅប្រទេសកម្ពុជាវាមានស្ទើរគ្រប់ទីកន្លែង និងមានការរីកសាយភាយ។ ជ្រូកព្រៃមានវត្តមានមានស្ទើរគ្រប់លើពិភពលោកដូចជានៅអឺរ៉ុបភាគខាងជើង ទ្វីបអាហ្វ្រិក អាស៊ី និងប្រទេសជប៉ុន។
ស្ថានភាពអភិរក្ស៖ ជ្រូកព្រៃស្ថិតក្នុងក្រុមប្រភេទមានដោយបង្គួរ ព្រោះវាមានអត្រាខ្ពស់ក្នុងការបង្កកំណើត។
© រក្សាសិទ្ធិដោយ thmeythmey.com