ឥទ្ធិពលនៃចំណេះដឹង

ជាតិ

ឥទ្ធិពលនៃចំណេះដឹង

18, Jul 2015 , 8:30 pm

រូបភាព

ដោយ: ថ្មីៗ

ដោយ អ៊ិត សាន អនុបណ្ឌិត វិទ្យាសាស្ត្រនយោបាយ៖

ចុចទីនេះដើម្បីទទួលបានព័ត៌មានរហ័ស

យើងបានដឹងគ្រប់ៗគ្នាហើយថា ការពុំមានចំណេះដឹងជាសត្រូវមួយយ៉ាងធំ សម្រាប់ខ្លួននិងសង្គមមនុស្សទាំងមូល។ហេតុដូច្នេះហើយបានតាំងពីបុរាណរហូតដល់បច្ចុប្បន្នក៏ដូចទៅអនាគត មនុស្សមានការស្វះស្វែងយ៉ាងខ្លាំងក្លាក្នុងការសិក្សាស្រាវជ្រាវដើម្បីទុកជាចំណេះដឹងល្អៗសម្រាប់ការអភិវឌ្ឍខ្លួននិងសង្គមទាំងមូល ឈានទៅរកភាពរីកចម្រើន។

    មនុស្សមានចំណេះដឹងគឺមានការអភិវឌ្ឍផ្ទាល់ខ្លួន ព្រោះមនុស្សម្នាក់ៗកើតមកពុំចេះដឹងអ្វីឡើយ។ដូច្នេះហើយបានជាមនុស្សមួយចំនួនធំលើលោកអាចមានការយល់និងអនុវត្តការងារបានជោគជ័យ។បញ្ហានេះគឺដោយសារបានមកពីការចេះដឹងរបស់បុគ្គលម្នាក់នោះឯង។ការចេះដឹងនោះពុំមែនបានមកដោយឯកឯងនោះទេ គឺបានមកពីការខិតខំសិក្សារៀនសូត្រនិងស្វែងយល់គ្រប់បែបយ៉ាងរបស់ពួកគេទោះជាស្ថិតក្នុងកាលៈទេសៈពិបាកៗយ៉ាងណាក៏គេមិនរុញរាដែរ។

គេឃើញថានៅពេលពួកគេមានចំណេះដឹងខ្ពស់ៗគឺអាចធ្វើអ្វីអោយបុគ្គលគេផ្ទាល់មានការរីកចម្រើនយ៉ាងខ្លាំងសម្រាប់ជួយខ្លួនគេមានទ្រព្យសម្បត្តិនិងកេរ្តិ៏ឈ្មោះនិងមានការងារធ្វើមានលក្ខណៈល្អជាជាច្រើនដូចជាលោក ហេហ្គើលយល់ថា ការងារគឺជាមធ្យោបាយនៃការស្រោចស្រង់ខ្លួនឯង។ព្រោះការងារគឺជាការអនុវត្តនៃចំណេះដឹងដែលគេមានក្នុងខ្លួននេះហើយ។ក្រៅពីមានចំនុចទាំងអស់នេះហើយ ចំណេះដឹងក៏បានធ្វើអោយបុគ្គលម្នាក់ចេះគិតនូវអ្វីដែលពុំត្រឹមត្រូវនិងត្រឹមត្រូវក្នុងន័យលើកតម្លៃផ្នែកសីលធ៌មរបស់ខ្លួនឯងដែរ។ដូច្នេះឃើញថាចំណេះដឹងមានសារៈសំខាន់ណាស់ចំពោះមនុស្សម្នាក់ៗជាប្រទីបមួយនាំផ្ឡូវបុគ្គលទាំងនោះឈានទៅរកសុភមង្គលនិងសេចក្ដីរុងរឿងមួយជីវិតលើលោកយើងនេះ។

    ជាមួយគ្នានេះដែរការអភិវឌ្ឍសហគមន៏ក៏ទាមទារនូវចំណេះដឹង។ព្រោះសង្គមជាតិនីមួយៗដែលមានអរិយធ៌មខ្ពង់ខ្ពស់ទៅបាន អាស្រ័យដោយសង្គមនោះបានគិតគូរយ៉ាងខ្លាំងចំពោះចំណេះដឹងរបស់ពលរដ្ឋរបស់ខ្លួនទាំងអស់។ចំណេះដឹងផ្ដល់ដល់សមាជិកសង្គមជាបញ្ហាមួយលំបាកស្មុកស្មាញបំផុត ប៉ុន្តែជាករណីកិច្ចមួយចាំបាច់ដែរដែលត្រូវធ្វើដើម្បីអភិវឌ្ឍសង្គម។សង្គមមានការរីកចម្រើន ស៊ីវិល័យ អាស្រ័យតែលើភាពសម្បូរបែបនៃសម្ភារៈឯកឯងនោះទេ វាត្រូវទាក់ទងផ្នែកចំណេះដឹងផងដែរ។ចង់បានសង្គមមួយមានការអភិវឌ្ឍលើគ្រប់វិស័យនិងចម្រើនលូតលាស់ទាន់សម័យលុះត្រាពលរដ្ឋគ្រប់ៗរូប គ្រប់សហគមន៏ផ្សេងៗត្រូវមានចំណេះដឹងទូលំទូលាយដែលរួមមាន ផ្នែកវិទ្យាសាស្ត្របច្ចេកទេស គំនិតប្រាជ្ញានិងសីលធ៌មរស់នៅផងដែរ។តម្លៃរបស់ចំណេះដឹងមានសារៈសំខាន់ណាស់ចំពោះមនុស្សនិងសង្គមមនុស្ស។បើសិននៅតាមស្ថាប័ន សមាគម អង្គការ ក្រុមហ៊ុន ទីភ្នាក់ផ្សេងៗ ពោរពេញទៅដោយអ្នកមានចំនេះដឹងភាគច្រើននោះទីកន្លែងការងារទាំងនោះពិតជាមានការអភិវឌ្ឍល្អជាក់ជាពុំខាន។យើងឃើញថាសព្វថ្ងៃនេះមានប្រទេសខ្លះរីកចម្រើនហើយក៏មានប្រទេសខ្លះអន់ខ្សោយដែលកត្តានេះមួយផ្នែកធំកើតចេញពីប្រទេសដែលសម្បូរទៅដោយអ្នកគ្មានចំណេះដឹងច្រើននិងអ្នកមានចំណេះដឹងតិចនេះ។

    ដូច្នេះការដែលនាំគ្នាយកចិត្តទុកដាក់ផ្ដល់នូវចំណេះដឹងដល់មនុស្សក្នុងសហគមន៏មួយៗជាការចាំបាច់សម្រាប់ធ្វើអោយសហគមន៏ទាំងនោះមានភាពលូតលាស់និងមានដំណើរការសកម្មភាពល្អជានិច្ច។

    ជាពិសេសទៅទៀតនោះការដឹកនាំប្រទេសជាតិរឹតតែត្រូវការជាចាំបាច់នូវចំណេះដឹង។ព្រោះក្រុមអ្នកដឹកនាំប្រទេសនីមួយៗតែងតែខិតខំគ្រប់បែបយ៉ាងសម្រាប់អភិវឌ្ឍផ្ទៃក្នុងលើគ្រប់វិស័យទាំងអស់ដើម្បីអោយប្រជាពលរដ្ឋរស់នៅបានសុខស្រួល។ក្រៅពីនេះទៀតក៏ត្រូវទាមទារធ្វើការទំនាក់ទំនងជាមួយឆាកអន្តរជាតិសម្រាប់កិច្ចសហប្រតិបត្តិការលើវិស័យផ្សេងៗនិងការជួយគ្នាទៅវិញទៅមកផងដែរ។ការអភិវឌ្ឍក្នុងប្រទេសក្ដីការទំនាក់ទំនងអន្តរជាតិក្ដីសុទ្ធតែមានក្បួនខ្នាតក្នងការអនុវត្តយ៉ាងពិតប្រាកដ។ទាំងអស់នេះពុំមែនជាការងាយស្រួលប៉ុន្មានទេបើសិនជាគេពុំបានរៀបចំចាត់ចែងមនុស្សដែលមានចំណេះដឹងមកប្រតិបត្តិការ ការងារទាំងនោះ។

    ដូច្នេះចំណេះដឹងជាកត្តាមួយយ៉ាងសំខាន់បំផុតសម្រាប់ជួយខ្លួនឯង ជួយសហគមន៏ ក៏ដូចជាប្រទេសជាតិនិងសង្គមមនុស្សទាំងមូល។ព្រោះចំណេះដឹងបានគ្របដណ្ដប់ទៅលើ ចំណេះដឹងផ្នែកទ្រឹស្ដី ចំណេះដឹងក្នុងការអនុវត្ត ចំណេះដឹងផ្នែកសីលធ៌ម ចំណេះដឹងរបៀបរស់នៅក្នុងការទំនាក់ទំនងល្អ។ការដែលមានចំណេះដឹងមានន័យថាបានរំដោះខ្លួននិងប្រទេសជាតិចេញពីភាពក្រីក្រលំបាកវេទនាផ្ទុយមកវិញគ្មានចំណេះដឹងការអភិវឌ្ឍទាំងឡាយដែលនាំទៅរកភាពរុងរឿងនោះពិតជាជូបនូវវិបត្តិផ្សេងៗជាក់ពុំខាន៕