ជាតិ
អ្នកនាំពាក្យ៖ ជំនន់ទឹកភ្លៀងហូរចូលក្រុងកំពត ខណៈទឹកភ្លៀងបន្តធ្លាក់ 17, Sep 2015 , 9:33 am
![រូបថត កំពតជាស្រុកកំណើតខ្ញុំ](https://image.thmeythmey.com/pictures/2015/09/17/thumb2/179201593401_______________________________________________________________.jpg)
រូបថត កំពតជាស្រុកកំណើតខ្ញុំ
×![]()
ភ្នំពេញ៖ ជំនន់ទឹកភ្លៀងបានហូរចូលក្នុងក្រុងកំពតហើយ នៅព្រលឹមថ្ងៃទី១៧នេះ ដោយសារតែឥទ្ធិពលមួយដែលកើតឡើងនៅក្នុងសមុទ្រខាងត្បូង។ នេះបើតាមការបញ្ជាក់របស់លោក ចាន់ យុត្ថា អ្នកនាំពាក្យ និងជានាយកខុទ្ទកាល័យក្រសួងធនធានទឹក និងឧតុនិយម។
លោក ចាន់ យុត្ថា ឲ្យដឹងថ្ងៃពុធនេះថា ប្រសិនបើភ្លៀងបន្តធ្លាក់ទៀតនោះ ជំនន់ទឹកភ្លៀង អាចនឹងជន់លិចតំបន់ស្ទឹងតាមបណ្តាខេត្តមួយចំនួន រួមមាន ខេត្តបាត់ដំបង ពោធិ៍សាត់ ព្រះសីហនុ កោះកុង បន្ទាយមានជ័យ និងខេត្តកំពង់ធំដែលមានស្ទឹងធំៗ ដូចជា ស្ទឹងសង្កែ ស្ទឹងមង្គលបូរី ស្ទឹងក្រាំងពន្លៃ ស្ទឹងត្រែង និងស្ទឹងសែន។ អ្នកនាំពាក្យសូមអំពាវទៅដល់ប្រជាពលរដ្ឋនៅតំបន់មាត់សមុទ្របង្កើន ការប្រុងប្រយ័ត្នខ្ពស់ ជាពិសេសប្រជានេសាទ និងអ្នកធ្វើដំណើរទេសចរតាមសមុទ្រ សូមផ្អាកសកម្មភាពនេសាទ និងការធ្វើដំណើរកម្សាន្តលើផ្ទៃសមុទ្រ ដើម្បីចៀសវាងគ្រោះថ្នាក់ដែលអាចកើតឡើងជាយថាហេតុ។
គួរបញ្ជាក់ថា បើតាមសេចក្តីជូនដំណឹងក្រសួងធនធានទឹក និងឧតុនិយម កាលពីថ្ងៃទី១១ កញ្ញា រាជធានី-ខេត្តចំនួន៨ នឹងបន្តប្រឈមនឹងជំនន់ទឹកភ្លៀងរហូតដល់ថ្ងៃទី១៨ខែកញ្ញា ដោយសារតែឥទ្ធិពលមួយដែលកើតឡើងនៅក្នុងសមុទ្រចិនភាគខាងត្បូងនៅ ថ្ងៃទី១៣ ខែកញ្ញាខាងមុខ។ រាជធានី-ខេត្តទាំងនោះ រួមមានរាជធានីភ្នំពេញ ខេត្តកំពង់ស្ពឺ កណ្តាល តាកែវ កំពត កំពង់ធំ ព្រះសីហនុ និងខេត្តសៀមរាប។ ឥទ្ធិពលព្យុះនេះ នឹងបង្កឲ្យផ្ទៃមេឃនៅកម្ពុជាមានពពកច្រើនដេរដាស ព្រមទាំងមានភ្លៀងបន្តធ្លាក់ច្រើនក្នុងក្របខណ្ឌទូទាំងប្រទេសផងដែរ ពិសេសចាប់ពីថ្ងៃទី១៥ដល់ថ្ងៃទី១៨ខែកញ្ញា។ ផ្ទៃមេឃនៅតំបន់មាត់សមុទ្រ និងនៅលើផ្ទៃសមុទ្រ មានសភាពអាប់អួ ព្រមទាំងមានភ្លៀង និងមានខ្យល់បោកបក់ខ្លាំង ហើយរលកសមុទ្រអាចមានកម្ពស់ពី១ម៉ែត្រ ទៅ២.៥ម៉ែត្រ៕
© រក្សាសិទ្ធិដោយ thmeythmey.com