ជាតិ
ជំនន់ទឹកភ្លៀងខេត្តកំពតបណ្ដាលឲ្យខូចខាតដីស្រែ១៥០០ហិកតា
17, Sep 2015 , 8:59 pm
×![]()
ដោយ: ថ្មីៗ
ភ្នំពេញ៖ ជំនន់ទឹកភ្លៀងនៅខេត្តកំពត បានធ្វើឲ្យដីស្រែប្រជាពលរដ្ឋ១៥០០ ហិកតាខូចខាត និងប៉ះពាល់ដល់ប្រជាពលរដ្ឋ៣៦០០គ្រួសារ។ នេះបើតាមលោក កែវ វី នាយកខុទ្ទកាល័យនៃគណៈកម្មាធិការជាតិគ្រប់គ្រងគ្រោះមហន្តរាយ។
លោក កែវ វី បានឲ្យដឹងថា រហូតមកពេលនេះជំនន់ទឹកភ្លៀងហូរចូលក្នុងក្រុងកំពត ដែលបានធ្វើឲ្យឃុំចំនួន៥ លិចនោះ មានឃុំម៉ាក់ប្រាំង ឃុំស្ទឹងកែវ ឃុំព្រៃឃ្មុំ ឃុំត្រពាំងធំ និងឃុំកំពង់គ្រែង ក្នុងស្រុកឈូ ។ លោកថា មូលហេតុដែលជំនន់ទឹកភ្លៀងនៅខេត្តកំពតនេះ ដោយសារការធ្លាក់ភ្លៀងច្រើនជាបន្ដបន្ទាប់ មានទឹកធ្លាក់ពីលើភ្នំហៀចូលមកសមុទ្រអត់ស្រក និងការបើកទំនប់ទឹកកំចាយ។
ថ្លែងប្រាប់សារព័ត៌មានថ្មីៗ នាយខុទ្ទកាល័យរូបនេះ បញ្ជាក់ថា នៅពេលនេះក្រុមកាកបាទក្រហមកំពុងជួយជម្លៀសប្រជាពលរដ្ឋ និងសត្វពាហនៈ នៅតំបន់ដែលមានជំនន់ទឹកភ្លៀងទាំងនោះ ទៅកន្លែងមានសុវត្ថិភាព។ លោក កែវ វី បន្ថែមទៀតថា បើទឹកភ្លៀងនៅតែបន្តធ្លាក់ជាគំហុកបន្ដបន្ទាប់ទៀតនោះ ក៏អាចបណ្ដាលឲ្យខេត្តកំពង់ស្ពឺ និងរាជធានីភ្នំពេញទទួលរងជំនន់ទឹកភ្លៀងដែរ។ «បើភ្លៀងនៅតែបន្ដធ្លាក់ទៀត អាចធ្វើឲ្យទឹកស្ទឹងសំរោងនៅផ្លូវជាតិលេខ៤ ជន់ឡើង ហើយបន្ដមកទឹកស្ទឹងព្រែកត្នោតខេត្តកំពង់ស្ពឺជនឡើង ដែលអាចមកដល់ភ្នំពេញ»។ នេះជាការបញ្ជាក់របស់លោក កែវ វី។
បើតាមនាយខុទ្ទកាល័យរូបនេះ គណៈកម្មាធិការជាតិគ្រប់គ្រងគ្រោះមហន្តរាយ កំពុងតាមដានស្ថានការណ៍ទឹកភ្លៀង ហើយអាជ្ញាធរបានត្រៀមវិធានការនានា ដើម្បីដោះស្រាយនិងទប់ស្កាត់ជំនន់ទឹកភ្លៀងនេះ។
លោក ចាន់ យុត្ថា អ្នកនាំពាក្យ និងជានាយកខុទ្ទកាល័យក្រសួងធនធានទឹក និងឧតុនិយម ឲ្យដឹងដែរថា ភ្លៀងរយៈពេល៣ថ្ងៃមកនេះ មានកំពស់ទឹកកើនឡើង ពី៩០ ទៅ១៣០មីលីម៉ែត្រ ដែលជាធម្មតាកំពស់ទឹកមានតែពី៣០ ទៅ៥០មីលីម៉ែត្រប៉ុណ្ណោះ។ បើតាមលោក ចាន់ យុត្ថាចាប់ពីថ្ងៃទី១៨ ដល់ថ្ងៃទី២០ សម្ពាធទឹកអាចស្រកចុះវិញ ដោយសារផុតឥទ្ធិពលខ្យល់នៅក្នុងសមុទ្រចិនភាគខាងត្បូង។
អ្នកនាំពាក្យរូបនេះ អំពាវទៅដល់ប្រជាពលរដ្ឋនៅតំបន់មាត់សមុទ្របង្កើន ការប្រុងប្រយ័ត្នខ្ពស់ ជាពិសេសប្រជានេសាទ និងអ្នកធ្វើដំណើរទេសចរតាមសមុទ្រ សូមផ្អាកសកម្មភាពនេសាទ និងការធ្វើដំណើរកម្សាន្តលើផ្ទៃសមុទ្រ ដើម្បីចៀសវាងគ្រោះថ្នាក់ដែលអាចកើតឡើងជាយថាហេតុ។
បើតាមសេចក្តីជូនដំណឹងក្រសួងធនធានទឹក និងឧតុនិយម កាលពីថ្ងៃទី១១ កញ្ញា រាជធានី-ខេត្តចំនួន៨ នឹងបន្តប្រឈមនឹងជំនន់ទឹកភ្លៀងរហូតដល់ថ្ងៃទី១៨ខែកញ្ញា ដោយសារតែឥទ្ធិពលមួយដែលកើតឡើងនៅក្នុងសមុទ្រចិនភាគខាងត្បូង ។ រាជធានី-ខេត្តទាំងនោះ រួមមានរាជធានីភ្នំពេញ ខេត្តកំពង់ស្ពឺ កណ្តាល តាកែវ កំពត កំពង់ធំ ព្រះសីហនុ និងខេត្តសៀមរាប៕
Tag:
ជំនន់ទឹកភ្លៀង
© រក្សាសិទ្ធិដោយ thmeythmey.com
