ជាតិ
លោក ហ៊ុន ម៉ានី៖«ជីវិតមិនអាចមានជោគជ័យរហូតនោះទេ តែត្រូវចេះរៀនពីបរាជ័យ» 17, Sep 2015 , 9:59 pm
ភ្នំពេញ៖ ប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី បាននិយាយលើកទឹកចិត្ត សិស្សធ្លាក់បាក់ឌុបឆ្នាំ២០១៥នេះ ឲ្យបន្តព្យាយាមសិក្សារៀនសូត្រ ពិសេសគឺព្យាយាម សិក្សាពីភាពបរាជ័យ ប្រែក្លាយទៅរកភាពជោគជ័យវិញ។ លោកថា អ្វីៗក្នុងជីវិតមនុស្សមិន អាចមានជោគជ័យរហូតនោះទេ តែមនុស្សត្រូវចេះរៀនសូត្រ ពីភាពបរាជ័យនោះមកវិញ ដើម្បីត្រៀមខ្លួនទៅកាន់ជោគជ័យ។
លទ្ធផលប្រឡងបាក់ឌុបឆ្នាំ ២០១៥ មានភាពប្រសើរជាងឆ្នាំមុន ខណៈដែលបេក្ខជនជាប់មានប្រមាណ ៥៥ ភាគរយហើយក្នុងនោះនិទ្ទេស A មានដល់ទៅ ១០៨ នាក់បើធៀបនឹងលទ្ធផលឆ្នាំ ២០១៤ ការប្រឡងលើកទី ១ ដែលបេក្ខជនជាប់មានប្រមាណតែ ២៥ ភាគរយហើយនិទ្ទេស A មានត្រឹមតែ ១១ នាក់។
នាយករដ្ឋមន្ត្រីលោក ហ៊ុន សែន បានផ្តល់ទឹកប្រាក់ផ្ទាល់ខ្លួនដល់សិស្សបាក់ឌុបនិទ្ទេស A ចំនួន ១០៨នាក់ ម្នាក់ៗចំនួន ២ លានរៀល Samsung Tablet ម្នាក់ៗមួយគ្រឿង កាក់ប្រាក់ និងសៀវភៅអនុស្សាវរីយ៍មួយក្បាល។ ចំណែកអាហារូបករណ៍សិក្សាថ្នាក់បរិញ្ញាបត្រ គឺអាស្រ័យទៅលើសាកលវិទ្យាល័យក្នុងប្រទេស។
ផ្ទុយមកវិញ កាលពីឆ្នាំ ២០១៤ ខណៈដែលសិស្សនិទ្ទេស A មានចំនួនត្រឹមតែ ១១ នាក់ លោកនាយករដ្ឋមន្ត្រី ហ៊ុន សែន បានផ្តល់ការលើកទឹកចិត្តដោយក្នុងម្នាក់ៗទទួលបានកុំព្យូទ័រយួរដៃ មួយគ្រឿង IPAD មួយគ្រឿង ម៉ូតូមួយគ្រឿង និងប្រាក់ ១២៥០ ដុល្លារព្រមទាំងការផ្តល់អាហារូបករណ៍ថ្នាក់បរិញ្ញាបត្រផងដែរ។
បេក្ខជន ម៉ាន កូតា អាយុ ១៧ ឆ្នាំជាសិស្សវិទ្យាល័យបាក់ទូកដែលទទួលនិទ្ទេស A ពិន្ទុ ១០០ ពេញ និងខ្ពស់ជាងគេបានឲ្យដឹងថា រូបគេបានជួបសំណេះសំណាលផ្ទាល់ជាមួយ លោកនាយករដ្ឋមន្ត្រី និងបានបង្ហាញពីចំណាប់អារម្មណ៍របស់ខ្លួនចំពោះការសិក្សាថ្នាក់ បរិញ្ញាបត្រផ្នែកវិទ្យាសាស្ត្រ។ កូតា និយាយថា៖ «គាត់បានសួរខ្ញុំហើយខ្ញុំក៏បានឆ្លើយខ្ញុំប្រាប់គាត់ថាពួក ខ្ញុំមិនអន់ចិត្តទេចំពោះអំណោយដែលតិចជាងឆ្នាំមុនពីព្រោះឆ្នាំ នេះមានច្រើនដល់ទៅ ១០៨ នាក់។ គាត់បានផ្តាំផ្ញើឲ្យពួកខ្ញុំបន្តខំរៀនទៀត»។
គួររំឭកថា បេក្ខជនប្រឡងជាប់បាក់ឌុបឆ្នាំ ២០១៥ នេះមានចំនួន ៤៦ ៥៦០ នាក់ត្រូវជា ៥៥,៨៨ ភាគរយនៃបេក្ខជនវត្តមានសរុប ៨៣ ៣២៥ នាក់ហើយក្នុងនោះនិទ្ទេស A មាន ១០៨ នាក់ B មាន ១ ០៨៥ នាក់ C មាន ៣ ២៩២ នាក់ D មាន ៦ ០៩៣ និងនិទ្ទេស E មាន ៣៥ ៩៨២ នាក់៕
© រក្សាសិទ្ធិដោយ thmeythmey.com