ជាតិ
លោក គួច ម៉េងលី ផ្តល់អនុសាសន៍ដល់ប្រតិភូយុវជននៃកម្មវិធីផ្លាស់ប្តូរអភិវឌ្ឍយុវជនអន្តរជាតិ 18, Sep 2015 , 10:31 am
![](https://image.thmeythmey.com/pictures/2015/09/18/thumb2/1892015103235ais.jpg)
×![]()
ប្រតិភូយុវជនកម្ពុជាចំនួន10នាក់ ត្រូវបានជ្រើសរើសទៅចូលរួមក្នុងកម្មវិធីផ្លាស់ប្តូរអភិវឌ្ឍយុវជនអន្តរជាតិ នៅប្រទេសជប៉ុន ដែលនឹងប្រព្រឹត្តទៅរយៈពេល15ថ្ងៃ ចាប់ពីថ្ងៃទី22 ខែកញ្ញា ដល់ថ្ងៃទី07 ខែតុលា ឆ្នាំ2015 ។ ហើយកាលពីសប្តាហ៍កន្លងទៅនេះផងដែរ លោកឧកញ៉ា វេជ្ជបណ្ឌិត គួច ម៉េងលី ប្រធាន និងប្រធានចាងហ្វាង នៃវិទ្យាស្ថាន និងសាលារៀន អន្ដរទ្វីប អាមេរិកាំង បានអនុញ្ញាតឱ្យក្រុមយុវជនកម្ពុជាចូលជួបសម្ដែងការ គួរសម សុំការណែនាំបទពិសោធន៍ និងផ្តល់អនុសាសន៍ផ្ដាំផ្ញើមួយចំនួនមុនពេលចេញទៅចូលរួមក្នុងកម្មវិធីផ្លាស់ប្តូរអភិវឌ្ឍ យុវជនអន្តរជាតិ។
កម្មវិធីនេះមានការចូលរួមពីបណ្តាយុវជនមកពី5តំបន់ផ្សេងគ្នារួមមាន អាស៊ីអាគ្នេយ៍ មជ្ឈឹមបូព៌ា អាហ្វ្រិក អឺរ៉ុប និងអាមេរិកកណ្តាល ឬអាមេរិកខាងត្បូង។ ឆ្នាំនេះគឺជាលើកទី7 ដែលយុវជនកម្ពុជាបានចូលរួមកម្មវិធីផ្លាស់ ប្តូរអភិវឌ្ឍយុវជនអន្តរជាតិ ដូច្នេះដើម្បីធ្វើឲ្យការចូលរួមរបស់ប្រតិភូយុវជនទាំង10នេះ ប្រព្រឹត្តទៅដោយរលូន និងប្រសិទ្ធភាព ប្រតិភូយុវជនត្រូវបានបណ្តុះបណ្តាលផ្តោតទៅលើសកម្មភាពនានា ដើម្បីពង្រឹងចំណេះដឹងទូទៅ ចែករំលែកបទពិសោធន៍ កសាងសមត្ថភាពផ្ទាល់ខ្លួន និងក្រុម។
![](http://www.thmeythmey.com/imgs/image/1Cl/123/AII.jpg)
មានប្រសាសន៍សំណេះសំណាលក្នុងអង្គពិធីទាំងមូល លោកឧកញ៉ា គួច ម៉េងលី បានសម្ដែងនូវក្ដីរីករាយ និងស្វាគមន៍អបអរសាទរចំពោះក្រុមប្រតិភូយុវជនកម្ពុជា ហើយបានផ្តល់អនុសាសន៍ដល់យុវជនយើងត្រូវធ្វើយ៉ាង ណាខិតខំប្រឹងប្រែងឱ្យអស់ពីសមត្ថភាព ត្រូវបង្ហាញជាតិសាសន៍ដទៃអំពីការអភិវឌ្ឍសេដ្ឋកិច្ច សន្តិសុខសង្គម វប្បធម៌ អារ្យធម៌ ប្រពៃណីទំនៀមទម្លាប់របស់ខ្មែរ ជាពិសេសវិស័យអប់រំនៅកម្ពុជាដែលកំពុងតែមានការរឹងបន្តឹងខ្លាំង ដើម្បីធានាបាននូវគុណភាពធនធានមនុស្ស។
យុវជន ត្រូវមានទំនាក់ទំនងល្អរវាងគ្នាទៅវិញទៅមក និងក្នុងចំណោម យុវជនមកពីប្រទេសផ្សេងៗផងដែរ ព្រោះថានេះជាដំណើរមួយដែលតំណាងឱ្យព្រះរាជាណាចក្រកម្ពុជាទាំងមូល ពោលគឺមិនមែនតំណាងឱ្យតែក្រុមយុវជនកម្ពុជាតែប៉ុណ្ណោះទេ។ លោកឧកញ៉ា បានបន្ថែមទៀតថា ដើម្បីទទួលបាន ជោគជ័យរាល់កិច្ចការត្រូវចេះអនុវត្ដនូវ5ចំណុចសំខាន់ៗគឺ រៀបចំគម្រោង អនុវត្ដគម្រោង តាមដានការអនុវត្ដ កែតម្រូវរាល់កំហុសឆ្គង និងអនុវត្តម្ដងទៀត។
មិនតែប៉ុណ្ណោះ ត្រូវស្គាល់ខ្លួនឯងឱ្យបានច្បាស់ ដោយឧស្សាហ៍សួរខ្លួនឯងនូវ3សំនួរគឺ តើអ្នកជានរណា? តើអ្នកមានទំនួលខុសត្រូវអ្វីខ្លះ? តើតួនាទី និងទំនួលខុសត្រូវរបស់អ្នកមានសារៈ សំខាន់ប៉ុនណា? ប៉ុន្ដែដើម្បីឱ្យសម្រេចគោលដៅបាន ល្គឹកណាយុវជនមានភាពក្លាហាន តស៊ូ ហ៊ានសួរ ហ៊ានឆ្លើយ ខិតខំប្រឹងប្រែងរៀនសូត្រ ត្រូវចេះចែករំលែកចំណេះដឹងឱ្យគ្នាទៅវិញទៅមក និងមានការគិតពិចារណាឲ្យបានត្រឹម ត្រូវមុននឹងនិយាយ ឬធ្វើអ្វីមួយ។
លោកឧកញ៉ា បានបន្តទៀតថា សាមគ្គីភាពជាភាពបរាជ័យ បើគ្មានឯករាជ្យភាព មានន័យថា យុវជនទាំងអស់ ត្រូវមានភាពម្ចាស់ការលើខ្លួនឯង ប្រឹងប្រែងដោយខ្លួនឯង ដោយមិនត្រូវពឹងផ្អែកលើអ្នកដទៃទាំងស្រុងឡើយ ទោះបីជាយើងកំពុងធ្វើការជាក្រុមក៏ដោយ។ ជាមួយគ្នានេះផងដែរ យុវជនត្រូវប្រកាន់ភ្ជាប់ នូវភាសាការទូតក្នុងការទាក់ទងគ្នា ត្រូវចេះតាំងពីការនិយាយស្តី ការគោរព ចេះសំណេះសំណាល ចេះក្បួនចាប់ដៃ មានភាពរហ័សរហួន និងរួសរាយរាក់ទាក់ជាដើម។
ជាចុងក្រោយ លោក បានសំណូមពរឱ្យយុវជនទាំងអស់ ត្រូវមានវប្បធម៌ទំនាក់ទំនងល្អ និងកិច្ចសហប្រតិបត្ដិការល្អ ជាមួយយុវជនដទៃទៀតនៅពេលចុះបេសកកម្ម ដើម្បីឱ្យពួកគេឃើញថា យុវជនខ្មែរយើង បច្ចុប្បន្នមានសមត្ថភាព និងចំណេះដឹងទូលំទូលាយ ហើយត្រូវពាំនាំមកនូវចំណេះដឹងថ្មីៗ បទពិសោធន៍ល្អៗ និងគំនិតយោបល់ប្លែកៗ មកចែករំលែកដល់យុវជន និងប្រជាពលរដ្ឋកម្ពុជាយើងបន្ទាប់ពីត្រឡប់មកវិញ។
(អត្ថបទសាលា)
© រក្សាសិទ្ធិដោយ thmeythmey.com