ជាតិ
មជ្ឈមណ្ឌលសហគ្រិនស្ត្រីជួយស្ត្រីធ្វើអាជីវកម្មពីការចាប់ផ្តើមរហូតទទួលបានជោគជ័យ 20, Sep 2015 , 4:00 pm
![](https://image.thmeythmey.com/pictures/2015/09/20/thumb2/we4.jpg)
×![]()
មជ្ឈមណ្ឌលសហគ្រិនស្រី្ត ជាមណ្ឌលដំបូងដែលត្រូវបានឡើងនៅកម្ពុជា ដើម្បីជួយជ្រោមជ្រែងស្ត្រីក្នុងការធ្វើអាជីវកម្ម។ គណៈគ្រប់គ្រងបានអះអាងថា មជ្ឈមណ្ឌលនេះនឹងជួយគាំទ្រស្ត្រីកម្ពុជាគ្រប់រូប ក្នុងការធ្វើអាជីវកម្ម តាំងពីការចាប់ផ្តើម រហូតទទួលបានជោគជ័យ។
លោកស្រី ចន្ទ ដាវី នាយិកា នៃមជ្ឈមណ្ឌលសហគ្រិនស្ត្រី (WECREATE) បានអះអាងថា បងប្អូនស្ត្រីរូបណាដែលមានបំណងចង់ចាប់ផ្តើមបង្កើតអាជីវកម្មដោយខ្លួនឯង គឺអាចអញ្ជើញទៅមជ្ឈមណ្ឌសហគ្រិនស្ត្រី ដើម្បីស្វែងរកការប្រឹក្សាយោបល់ និងបទពិសោធទាក់ទាង់នឹងការធ្វើអាជីវកម្មនេះ។
លោកស្រីបន្ថែថា មជ្ឈមណ្ឌលនឹង ផ្តល់អ្នកជំនាញ និងអ្នកដែលបទពិសោធស្រាប់ក្នុងការធ្វើអាជីវកម្ម ដើម្បីណែនាំពួកគាត់ដោយផ្ទាល់ពីបទពិសោធ និងគន្លឹះសំខាន់ៗក្នុងការធ្វើអាជីវកម្ម ។ នាយិការូបនេះបញ្ជាក់យ៉ាងដូច្នេះថា៖ «យើងនឹងធ្វើជាមួយពួកគាត់ យើងដឹកដៃគាត់ទៅធ្វើ ហើយយើងតាមដានគាត់រហូត រហូតគាត់ជោគជ័យ ទើបយើងឈប់។ យើងមិនមែនណែនាំគាត់ថ្ងៃនឹង ហើយឲ្យគាត់ធ្វើតែឯងនោះទេ គឺយើងឥតប្រលែងគាត់ទេ»។
ជាងនេះទៅទៀត លោកស្រី ចន្ទ ដាវី ក៏បានលើកឡើងដែរថា កន្លងមក ស្រី្តកម្ពុជាតែងតែជួបឧបសគ្គក្នុងការចាប់ផ្តើមមុខជំនួយដោយខ្លួនឯង។ មានមូលហេតុជាច្រើន ដែលរាំងស្ទះការចាប់ផ្តើមអាជីវកម្មរបស់ស្ត្រី ដូចជា ការមិនយល់ដឹងពីការចាប់ផ្តើមអាជីវកម្ម, គ្មានអ្នកគាំទ្រ, ខ្វះការតាំងចិត្ត ឬក៏យល់ថាដើមទុនមិនគ្រប់គ្រាន់ ជាដើម។
លោកស្រី បញ្ជាក់ថា៖ «បងប្អូនស្រី្តខ្លះគិតក្នុងចិត្តចង់ធ្វើអាជីវកម្ម តែគាត់មិនមានការតាំងចិត្តពិតប្រាកដ ហើយរួមផ្សំកត្តាពាក់ព័ន្ធក្នុងក្រុមគ្រួសារ ដែលមិនបានគាំទ្រ និងមិនផ្តល់លក្ខណៈងាយស្រួលដល់ពួកគាត់។ ហើយជួនកាលគាត់យល់ថា អាជីវកម្មដែលគាត់ចង់ចាប់ផ្តើម គឺអស់ទុនច្រើន តែពេលដែលគាត់បានជួបជាមួយអ្នកមានបទពិសោធក្នុងការធ្វើអាជីវកម្ម ទើបគាត់ដឹងថាអាជីវកម្មហ្នឹង អស់ទុនតិច ហើយគាត់អាចចាប់ផ្តើមបាន នឹងត្រូវដោយរបៀបណា»។
សូមរំឭកថា មជ្ឈមណ្ឌលសហគ្រិនស្ត្រីត្រូវបានបង្កើតដំបូងនៅកម្ពុជា ហើយក៏ជាលើកទីមួយដែរ នៅក្នុងតំបន់អាស៊ីអាគ្នេហ៍។ មជ្ឈមណ្ឌលនេះត្រូវបានសម្ពោធឲ្យដំណើរការ កាលពីថ្ងៃទី១៨ ខែកញ្ញា ឆ្នាំ២០១៥ ៕
© រក្សាសិទ្ធិដោយ thmeythmey.com